Alkitab Mobile SABDA
[VER] : [ARALLE]     [PL]  [PB] 
 <<  Roma 7 >> 

1Oa' ingkämmu solasohongku, ungnginsammokoa' laoanna atohang. Dahi ungnginsammia' ungngoatee kita' hupatau nakuasaiingkea' atohanna to ma'pahenta sama masaena tuhokingkea' yaling inde di lino. Ampo' ke matemingkea', ya' damingkete' nakuasai yato atohang.

2Hapanganna mesa bahine ang kemuaneng: naonge tuhoke' yato muanena, ya' umpentokeike' yato atohang kakabenganna sibaha muanena. Ampo' ponna ke mateng muanena, ya' lahpa'mite' di hao mai yato di atohang.

3Dahi hapanganna ke kemuane salai yato bahine naonge tuhoke' yato muane dolunna, ya' diangka'ete' ungngindä'-indä' pa'bannetauang. Ampo' ponna ke mateng muanena, ya' dang umpentokei yato atohang. Anna ponna ke kemuane salai, ya' dante' diangka' ungngindä'-indä' pa'bannetauang.

4Noa tou kita', solasohong. Yato Atohanna Musa mala tapasihapang muane dolunta. Dolu natokeiingkea' Atohanna Musa. Ampo' aka' puhaingkea' mate yaling di Puang Yesus Kristus lambi' yato kasikenteanta sibaha Atohanna Musa bohtung. Anna dinoa naampuimingkea' Puang Yesus Kristus ang tuho sumule di hoi' mai di kamateang. Dinoa aka' yato kasikenteanta Kristus, ya' malaingkea' kekuna dai' di Puang Alataala.

5Dolu, naonge dakingke mampetahpa' pano di Puang Yesus, punno yaling di inahanta pampemala karake. Anna ingkänna yatoo kende' yaling di inahanta aka' melahang Atohanna Musa. Dianto anna yaling di katuhoanta ang dolu pemmai'diingke umbabe dosa, lambi' sihatangngingkea' ditahungkung mate.

6Ampo' dinoa, lahpa'mingkea' di hao mai di Atohanna Musa ang mantokeiingke dolu. Puhamingkea' mate yaling di Puang Yesus Kristus lambi' damingkea' untuhu'i yato lalang masae ungngolai atohang ang tiuki', ampo' dinoa untuhu'imingkea' Puang Alataala ungngolai lalang bakahu yaling di kakuasaanna Inaha Maserona.

7Tatula' langngena' taoate lahpa'mingkea' di hao mai di Atohanna Musa. Ampo' dai mala tapihki'a' taoatee tahuhu yato Atohang. Tula' ang noa indee dai tahpa'! Aka' setonganna mapia Atohanna Musa, aka' ungngolai yatoo tainsang aka yatoo ang disanga dosa. Hapanganna ke dai aha atohang ang mangngoate, "Dakoa' mala umpemala aka-akanna parammu hupatau," ya' dai la kuinsang kuoate karake yatoo ang aha yaling di inahangku.

8Tahpana kuhingngi yato atohang, ya' mengkähämmi yaling di inahangku dosa lambi' tuhtuang mai'di ang kupemala. Hapanganna ke la dai aha Atohanna Musa, ya' datoete' aha kakuasaanna dosa.

9Dolu naonge dake' kuinsang Atohanna Musa, kusanga mapia katuhoangku. Ampo' setonganna, tahpana kuhingngi Atohanna Musa, yato dosa ang aha yaling di inahangku kende' tomande',

10anna kuinsang kuoate sihatangngä' ditahungkung mate. Setonganna suhunna Atohanna Musa dianto anna malaä' ullambi' katuhoang mapia. Ampo' tahpana kuinsang yato Atohanna Musa, ya' kusa'dimmi tama di kalaeku madosa anna sihatangngä' ditahungkung mate.

11Tahpana kuhingngi Atohanna Musa, ya' tuhtuang kehängngämmi pengkähänna dosa yaling di inahangku. Mala dioatee: ungngolai Atohanna Musa yato dosa mantumängngä' lambi' sihatangngä' ditahungkung mate anna dipasikahaoangngä' Puang Alataala.

12Dahi yato Atohanna Musa masero, maroho anna mapia.

13Natahungkung materakakä' yato Atohanna Musa? Tantu anna dai. Ampo' Atohanna Musa ang mapia napolalanne' dosa mantahungkung mateä' anna napakahaoä' di hao mai di Puang Alataala. Ungngolai Atohanna Musa ang mapia maleso dioate madosaä', anna maleso toi dioate karake yato dosa.

14Oa' solasohong, tainsangnga' taoatee mapia Atohanna Musa aka' sule di hao mai di Inaha Masero. Ampo' kodi', malammaä' sinnoa ingkänna hupatau, aka' naposabua'ä' dosa.

15Pembabe mapia ang pemala kubabe, dai si kubabe. Pembabe ang kukahiri', bilang dianto si kubabe! Dai kuinsang akaboi anna si kupanoai.

16Ampo' ponna ke umbabeä' pembabe ang dai kukärä'i, maleso dioatee ungkahiri'ä' pembabe karakeku anna kuakui kamapiaanna yato Atohanna Musa.

17Dahi, tadiaete' kodi' ang umbabe inde pembabe karake, ampo' dosa ang aha yaling di inahangku ang mambabe.

18Aka' inang kuinsang kuoate dai aha kamapiaang yaling di kalaeku, aka' to madosaä'. Pemalaä' la membabe mapia, ampo' dai kubela.

19Pembabe mapia ang kukärä'i, bilang daine' kubabe. Ampo' pembabe karake ang dai kukärä'i, bilang dia kubabe.

20Dahi ponna ke umbabeä' pembabe ang dai kukärä'i, ya' setonganna tadiaete' kodi' ang mambabe, ampo' dosa ang aha yaling di inahangku, dianto ang mambabe.

21Dahi noanto inde ang dahi yaling di katuhoangku: pemalaä' membabe mapia, ampo' setonganna pembabe karake ang si kubabe.

22Yaling di unnä' inahangku kukärä'i atohanna Puang Alataala.

23Ampo' kusa'ding yaling di kalaeku dai si kutuhu'i, aka' aha kakuasaang senga' yaling di katuhoangku ang mantaloä'. Yaling di inahangku pemala liuä' untuhu'i Atohanna Musa, ampo' yato kakuasaanna dosa yaling di katuhoangku umpetaloi yato Atohang, lambi' nataloä' dosa anna katämpä'anna untuhu'iä' pampemala karakeku.

24Dahi, yaling di inahangku pemala liuä' untuhu'i Atohanna Musa, ampo' madosa loloä' aka' pampemala karakeku, nasuhung sihatangngä' ditahungkung mate anna dipasikahaoangngä' Puang Alataala. Tilaka si'da-si'da inde kalaeku! Yaling di inahangku kuoatee, "Umbai damä' aha la mangngalai di hao mai di kakarakeangku ang la mambahaä' pano di kamateang." Ampo' kuhhu' sumanga' dai' di Puang Alataala! Aka' Dianto ang mangngalaiä', yaling di Puang Yesus Kristus, Dehatanta!

25(7:24)



 <<  Roma 7 >> 


Bahan Renungan: SH - RH - ROC
Download
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
© 2010-2019
Alkitab.SABDA.org

Android.SABDA.org
SABDA.mobi
Bantuan
Single Panel

Laporan Masalah/Saran