Alkitab Mobile SABDA
[VER] : [ARALLE]     [PL]  [PB] 
 <<  Roma 8 >> 

1Dahi dinoa, pano di kita' ang tuho yaling di Kristus Yesus, damingkea' la ungngolai pantahungkungang.

2Aka' ungngolai kasikenteanta Kristus Yesus, kakuasaanna Inaha Masero umbeaingkea' katuhoang bakahu anna ullahpa'ingkea' di hao mai di kakuasaanna dosa ang la mebaha pano di kamateang.

3Atohanna Musa dai mala ullahpa'ingkea' di hao mai di kakuasaanna dosa, lambi' dai tabela untuhu'i yato Atohang aka' to madosaingkea'. Ampo' yato ang dai mala nababe Atohanna Musa, nababene' Puang Alataala yaling di Änä'na ang nasuo mentama di lino menghupatau. Situhu' mentolinona bätäng puntinna sinnoa siang bätäng puntinna to madosa. Anna yato Änä'na mate unsulängngi hupatau, lambi' natalo Puang Alataala kakuasaanna dosa ang yaling di inahanna hupatau.

4Pahtuyunna Puang Alataala napanoa indee anna malai nabeaingkea' pengkero maroho ang situhu' Atohanna Musa, lambi' damingke la untuhu'i pampemala karakena inahanta ampo' untuhu'imingke pa'elo'na Inaha Masero.

5Ingkänna tau ang untuhu'i pihki' mentolino, nakuasai yato pihki'na lambi' dia supu napihki'. Tau ang noa yatoo la untahimbo kamateang ang la mampakahao di hao mai di Puang Alataala. Ampo' menna-menna ang untuhu'i pa'elo'na Inaha Masero, ya' nakuasai pa'elo'na Inaha Masero lambi' dia supu napihki', anna la untahimbo katuhoang anna kamasahkeang.

6(8:5)

7Tau ang untuhu'i pihki' mentolino sipa'bali Puang Alataala. Aka' yato tau dai untuhu'i pahentana Puang Alataala aka' dai nabela.

8Tau ang untuhu'i pihki' mentolino dai aha lalang umpamasannang Puang Alataala.

9Ampo' dioa', solasohong, dakoa' dio untuhu'i pihki' mentolino, ampo' untuhu'ikoa' dio pa'elo'na Inaha Masero, aka' yato Inaha Masero inang tohhongnga' yaling di inahammu. Ampo' tau ang daine' aha Inaha Maserona Kristus yaling di inahanna, ya' tadiane' petauanna Kristus.

10Moinnakato anna pahallui mate bätäng puntinta aka' dosa, ampo' ponna ke inang ahang Kristus yaling di inahanta, ya' sungnga'ta la untahimbo katuhoang lambi' sapano-panona, aka' marohoingkea' di olona Puang Alataala.

11Puang Alataala umpatuho sumule Kristus ungngolai kakuasaanna Inaha Masero, anna yato Inaha Masero dianto ang tohho yaling di inahanta. Dahi, moinnakato anna la matei bätäng puntinta, ampo' la napatuho sumule Puang Alataala ungngolai kakuasaanna Inaha Masero ang tohho yaling di inahanta.

12Dahi, ingkämmua' solasohongku, dinoa pahalluingkea' untuhu'i Puang Alataala. Daingkea' pahallu untuhu'i pampemala karaketa.

13Aka' ponna untuhu'iingke pampemala karaketa, ya' kalemba'anna la mateingkea' anna kahaoingkea' di hao mai di Puang Alataala. Ampo' ke dai tatuhu'i yato pembabe karaketa ungngolai kakuasaanna Inaha Masero, ya' la untahimboingke katuhoang sibaha Puang Alataala lambi' sapano-panona.

14Ingkänna tau ang natehte Inaha Masero, dianto änä'na Puang Alataala.

15Dolu, naonge naposabua'ingkea' Atohanna Musa, mahea'ingkea' pano di tahungkunna Puang Alataala. Ampo' dinoa damingkea' mahea', aka' puhamingkea' untahimbo Inaha Masero. Ungngolai inde Inaha Masero lambi' mendahiingkea' änä'na Puang Alataala anna malaingkea' umpoambe si'da-si'da Puang Alataala taoate, "O Papa', O Ambe'!"

16Aka' yato pengkähänna Inaha Masero yaling di inahantaa', lambi' tainsang taoate kita' indee änä'naa' Puang Alataala.

17Dia tuke', ponna ke inang änä'namingkea' Puang Alataala, ya' maleso dioate la untahimboingkea' mana' yaho mai di Puang Alataala. Yato mana' la tatahimbo sinnoa ang puha natahimbo Kristus, aka' madahhaingke yaling inde di lino sinnoa Kristus anna la untahimbo toingke kita' kamatandeang sinnoa kamatandeanna di allo ang la sule.

18Di kodi'na koo, ingkänna kamasuhsaang ang manghoaingkea' dinoa kuangka' santäi kanuku supu, ke dipasiitai kamatandeang ang la nabeaingke di allo ang la sule.

19Dinoa ingkänna ang napapia Puang Alataala lella' ungngempei anna ungkarohhengngi si'da-si'da tempo ang la naonge Puang Alataala umpalanda' kamatandeanna ingkänna änä'na.

20Aka' dolu inde lino sibaha ingkänna ihsinna ditändo lambi' dai mala umpasundung yato ang napopahtuyuing Puang Alataala. Tadia aka' pampemalanna inde lino, ampo' aka' Kalaena Puang Alataala mantändo.

21Dianto anna ingkänna ang napapia Puang Alataala unghannuang tempo ang naonge Puang Alataala la ullahpa' lino di hao mai inde di kamadahhaang. Donetoo lino la dilahpa' di hao mai di kamasuhsaang, korong anna kamateang anna la untahimbo kamatandeang sibaha ingkänna änä'na Puang Alataala.

22Aka' tainsangnga', solasohong, taoate inang mai'dinna kamasuhsaang yaling inde di lino. Mala dioate lino indee mohahaeng lolo sinnoa pohahaenna mesa bahine ang la keänä', lella' ungngempei tempo ang la naonge Puang Alataala umpabakahu ingkänna aka-aka.

23Anna dai lino supu ang mohahaeng, ampo' kita' tou kita' to Sahani mohahaeng yaling di inahanta. Puhamingke untahimbo pebeana Puang Alataala ang uhuna, dianto Inaha Maserona. Ampo' mangngempe tukingke kita' di pihhang la napabeba'ingkea' Puang Alataala di hao mai di dosa anna kamateang, anna napadahiingkea' änä'-änä'na.

24Dinoa puhamingkea' dipasalama', anna tahannuang dai' di Puang Alataala la nabeaingkea' ingkänna ang hali medandiing. Anna yato ang tahannuang, dake' aha tatahimbo. Aka' daete' aha tau ang la unghannuangke' aka ang puhang natahimbo.

25Dahi, ponna ke unghannuangngingkea' aka-aka ang dake' aha tatahimbo, la sa'bara'ingkea' mangngempei.

26Noa toi Inaha Masero unduluiingkea' yaling di kamalammaanta. Aka' daia' tainsang aka ang pahallu tatula' yaling di sambayanta. Ampo' naposolaingkea' Inaha Masero untula' palaunta dai' di Puang Alataala ang daine' mala natula' hupatau.

27Anna yato pihki'na Inaha Masero napähäng Puang Alataala ang ullosa inahanna hupatau. Aka' Inaha Masero ma'sambayang situhu' pa'elo'na Puang Alataala, nasambayangngi asangngingkea' ang mampetahpa' dai' di Puang Alataala.

28Tainsangnga' taoatee yaling di ingkänna kaha-kaha naäto' asang Puang Alataala, lambi' la ungkeboaing kamapiaang pano di tau ang mangkalemui, ang natambai mendahi änä'na, situhu' pahtuyunna pano di kita' mengkalao dolu.

29Aka' mengkalao dolu inang nainsammi Puang Alataala naoate menna yato ang la naangka' mendahi änä'na. Anna napama'tantu mengkalao di pampahandu'anna naoate la napadahi sinnoa Puang Yesus, anna malai Puang Yesus mendahi Änä' Ulua anna kita' to mai'di la mendahi arinna.

30Dahi, kita' ang napama'tantu mengkalao dolu, natambai toingkea' kita' anna malai mendahiingkea' änä'na. Anna kita' ang natambai mendahi änä'na, inang napamarohoingkea' di olona. Anna kita' ang napamaroho di olona, inang la nabea kamatandeang di allo ang la sule.

31Ponna ke tapihki'i ingkänna indee ang puha nababe Puang Alataala, mala taoatee, "Aka' naduluiingkea' Puang Alataala, lambi' dai aha ang nabela mambaliingkea'."

32Änä' Kalaena anna dai nakahimanangngi, ampo' nasuo tama di lino unsulängngiingkea'. Dahi, ponna ke moi Änä' Kalaena dang nakahimanangngi, ya' tantu anna la nabea toingkea' nei' ingkänna aka-aka ang senga'.

33Menna ang la bahani mantanda'ingkea' to napillei Puang Alataala? Dai aha! Aka' Kalaena Puang Alataala ma'kara naoate damingkea' sihatang ditahungkung!

34Menna ang la bahani mampapetahungkungngingkea'? Dai aha! Aka' Kalaena Kristus Yesus mate napobua' dosanta, la'bi-la'binna dipatuho sumule anna mohko'i yaho di ongeang kakeangka'ang, tando kuananna Puang Alataala. Puang Yesusmitoo ang la mepa'tula'ing di olona Puang Alataala.

35Dai aha ang la mala mampasisähä'ingke pa'kalemunna Kristus. Moinnakato ke ahai kamasuhsaang bahtu' kamadahhaang, kabuhohangang bahtu' kapemase-maseang, bahtu' kaha-kaha ang la mala metilakai bahtu' kamateang, ingkänna indee daingkea' mala nalahpa' di hao mai di pa'kalemunna Kristus.

36Yaling inde di lino nahoa si'damingkea' kamasuhsaang, sinnoa ang tiuki' yaling di Suha' Masero naoatee, "O Puang, allo-allo mai'di tau pemala mampateiang aka' kituhu'io. Dipasinnoaang patuhoang ang la ditunu."

37Ampo' moi aka ang manghoaingkea', tontongngingkea' patalo, anna yato kapataloanta sundung si'da-si'da aka' kakuasaanna Puang Yesus ang ungkalemuiingkea'!

38Kupetahpa' kuoatee dai aha ang la mala mampasisähä'ingkea' pa'kalemunna Puang Alataala. Mala dioate: moi mateingkea' bahtu' tuho, tontongkingkea' nakalemui. Moi malaeka' bahtu' kakuasaanna setang, moi aka ang aha di tempo dinoa bahtu' di allo ang la sule, moi kakuasaang yaho di langi' bahtu' yaling di lino, dai aha ang la mala mampasisähä'ingkea' pa'kalemunna Puang Alataala ang talambi' aka' Kristus Yesus, Dehatanta.

39(8:38)



 <<  Roma 8 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel Single Panel