Alkitab Mobile SABDA
[VER] : [ARALLE]     [PL]  [PB] 
 <<  Yohanes 8 >> 

1Ampo' le'ba'ne' Puang Yesus bete' di Tanete Zaitun.

2Tahpana marondonna di buhka' baya tama bumi Puang Yesus di Dasang Ada'na Puang Alataala. Ya' suleng mai'di liu tau mallumba. Umpapiang ohko'na Puang Yesus anna napahandu'i mampakuhu.

3Suleng sangngaka-sangngaka to pampakuhu ada' anna to Farisi umposola mesa bahine ang sika nalambi' membabe tasampa' anna napake'de'i yaling di tängngä-tängngänaii,

4mane sika ma'tula'i pano di Puang Yesus naoatee, "O Tuang, inde bahine aha tau mallambi' lella' sikamahoi tadia muanena.

5Situhu' ang mepaturuing Nabi Musa, bahine ang noa indee pahallu disaleba'i batu lambi' mate. Dahi dinoa umba Dio noa situhu' pihki'mu, Tuang?"

6(Nasuhung sika naoa aka' pemala sika umpeäng lalang anna malai unsahka Puang Yesus ke sala timba'i.) Ampo' dai aha ma'kara Puang Yesus, supung moluhku-luhku mangnguki' naung di tampo umpopeuki' hängkä'na.

7Ampo' aka' tuhtuang sika napa'kutana-tanai, ya' umbua'mi bää'na anna ma'karai naoatee, "Mennakoa' ang unsanga kalaemu dai aha dosammu, ya' dionto ang handang dolu mala unsaleba' inde bahine."

8Puhanna naoa yatoo, moluhku-luhku bung sumule anna mangnguki' boi naung di tampo.

9Sika unghingnginna tula'na Puang Yesus, ya' laonang mono' simesa nakadoluangngi to baha'naii lambi' naderuarang supu Puang Yesus sibaha yato bahine ang menge moke'de'-ke'de' lolo di hao di ongeanna.

10Ya' umbua' bung bää'na Puang Yesus anna ungkutanaii yato bahine naoaintee, "Umbae' sika naola yato tau mai'di? Dae' aha ang mantahungkungngo?"

11Mentimba'mi yato bahine naoatee, "Dae' aha, Tuang." Naoa buminte Puang Yesus, "Mapiantoo. Ponna noa, ya' daturä'to Kodi' la mantahungkungngo. Diare' laomo anna damong umbabe sala bou dosa."

12Ma'tula' bung Puang Yesus pano di tau mai'di naoatee, "Kodi'mito ballo yaling di lino. Menna ang mantindo'ä' dai la mellao yaling di kamalillingang ampo' la ungngampui ballo ang la mamballoi pano di katuhoang."

13Sika naoante yato to Farisi, "Dinoa unsa'bii tobouo Dio Kalaemu. Ne kasa'biammu dai tahpa'."

14Mentimba'mi Puang Yesus naoatee, "Moinnakato unsa'bii tobouä' Kodi' Kalaeku, ampo' inde kasa'biangku tahpa', aka' kuinsang Kodi' umba ang kukasulei anna umba la kuola. Ampo' daia' dio ungnginsang didiona yatoo.

15Manghohto'koa' dio situhu' pihki' to lino, ampo' Koo Kodi', dä' Ko manghohto' noa yatoo pano di moi poro la mesamo tau.

16Anna ponna ke manghohto'ä', ya' tahpa'ete' yato panghohto'ku, aka' dai kumesa, ampo' sibahaä' ang mansuoä' sule.

17Yaling di Atohanna Musa aha tiuki' noa indee: Kasa'biang ang nasa'bii derua tau dianto ang diangka' tahpa'.

18Dahi ponna noa yatoo, ya' tahpa'ete' disanga kasa'biang didiona Kalaeku, aka' deruang ang mansa'bii, dianto Kodi' Kalaeku anna Ambeku ang mansuoä' sule."

19Sika mekutanang naoatee, "Umbaraka Dio naonge ambemu?" Mentimba'mi Puang Yesus naoatee, "Moi Kodi', londonang Ambeku daia' ungnginsang. Aka' ke la ungnginsangngä'a' nei', tantunte' anna ungnginsang toukoa' nei' Ambeku."

20Ingkänna indee natula' Puang Yesus naonge mengei mampakuhu sidungku' pahti derema yaling di Dasang Ada'na Puang Alataala. Ampo' dai aha moi poro la mesa tau ang mansahka aka' dake' lambi' tempona.

21Nalombungngike' tula'na Puang Yesus pano diii naoatee, "La maoä' lambi' la unsipeäng-peängngiä', anna yato ongeang ang la kuongei daia' dio mala ullumba. Ampo' lambi'koa' mate inang dai aha la diampungngi dosammu."

22Sipa'kara-karang yato to pambahananna to Yahudi naoatee, "Umbai mopahtuyu la mentuyo lambi' naoatee yato ongeang ang la naongei mao daia' kita' mala talumba."

23Ma'tula' bung Puang Yesus pano diii naoatee, "Dioa' dio sule yalingkoa' dio mai di lino, ampo' Kodi' tadiaä' Kodi' to lino.

24Dianto suhunna anna kuoaingkoa'tee, 'Lambi'koa' mate inang dai aha la diampungngi dosammu,' aka' daia' ungngaku umpetahpa'ä' ungngoatee Kodi'mito indee To Dilanti' la Mepasalama'."

25Sika mekutanang pano naoatee, "Mennarakako Dio setonganna?" Mentimba'mi Puang Yesus naoatee, "Dang aha kunanna la kupa'tula'ikoa'!

26Setonganna mai'di si'da-si'da kaha-kaha didiomua' ang pemala kutula' anna kuhohto'. Ampo' umpehingngiiä' supu kabohtuanna ang mansuoä' sule, aka' Dianto ang tahpa' anna mala dipetahpa', anna ingkänna ang kuhingngi yaho mai dianto ang kupalambi' tama di lino."

27Yato tau mai'di dai sika napähäng aka ang menge natula' Puang Yesus, dianto didiona Puang Alataala Ambena.

28Dianto anna ma'tula'mi Puang Yesus pano diii naoatee, "Ponna puhamokoa' untoke' Änä' to Lino, dianto Kodi', dai' di kayu sitambeng, mane ungnginsangngia' pole' Kodi'mitoo indee Ang Tontong Aha. Anna la ungnginsang toia' umba noa dä' membabe situhu' pangngelo'ku ampo' mampakuhuä' situhu' aka ang puha napakuhuingkä' Ambeku.

29Dianto ang mansuoä' sule anna tontongngä' naposolai lolo. Dä' aha napamesa aka' membabe loloä' situhu' pangngelo'na."

30Puhanna natula' asang Puang Yesus ingkänna yatoo, ya' mai'ding tau mampetahpa' pano.

31Ma'tula'mi Puang Yesus pano di to Yahudi ang mampetahpa'mi naoaintee, "Ponna ke umpentokei si'da-si'damokoa' pepakuhungku, ya' la kuangka' to pentindo'ku si'damokoa'too,

32anna la ungnginsangkoa' aka ang tahpa' didiona Puang Alataala lambi' la dipabeba'koa'."

33Sika mentimba'mi naoatee, "Kami' indee peänä'annaang Abraham anna dai aha di alla'ki' moi poro mesa tau ang mendahi sabua'. Dahi, aka ne nalahe' tula'mu ungngoate, 'La dipabeba'koa''?"

34Naoa bunte Puang Yesus pano diii, "Kutula'ingkoa' setonganna tau ang umbabe dosa tontong naposabua' dosa.

35Mesa sabua' daete'ne' tihekeng lolo yaling di kasanghapuang, ampo' änä' nei' tihekeng lolone' yaling.

36Dahi noa tungnga' dio, ponna ke mampetahpa' si'da-si'dakoa' pano di Kodi' dianto Änä', ya' la kupabeba'koa', lambi' beba' si'da-si'dakoa'.

37Kuinsang kuoatee peänä'annakoa' Abraham, ampo' aka' daia' ungngaku umpehingngii pepakuhungku, lambi' pemalakoa' umpateiä'.

38Samai ang kuita nababe Ambeku, dia tunto Kodi' ang kutula'. Noa tungnga' dio aka ang napakuhuingkoa' ambemu, dia tungnga' dio umbabe."

39Sika mentimba'mi naoatee, "Ambeki' dianto Abraham." Naoa sala buminte Puang Yesus, "Ponna inang änä'na si'dakoa' Abraham, ya' tantunte' anna la umpembabeingkoa' aka ang puha nababe Abraham.

40Ampo' akaa' dio umbabe? Pemalakoa' umpateiä', moinnakatoo anna kupalambi'ingkoa' aka ang tahpa' ang kuhingngi yaho mai di Puang Alataala Ambeku. Anna nea' pembabemu daete'ne' aha nababe Abraham.

41Dahi umpembabe toboingkoa' dio aka ang nababe ambemu toboua' dio." Sika mentimba'mi naoatee, "Tadiaang änä' bule. Supung mesa Ambeki' dianto Puang Alataala."

42Sika naoa bumintee Puang Yesus, "Ke la inang änä'na si'dakoa' Puang Alataala, ya' tantunte' anna umpakamayaä'. Aka' Kodi' sule yahoä' mai di Puang Alataala; dä' sule aka' pangngelo'ku tobou Kodi', ampo' nasuhung suleä' aka' nasuoä'.

43Akaboi anna daia' ungnginsang yato ang kutula'? Aka' inang daia' mala ungnginsang!

44Aka' änä'namokoa' ambemu Pongkahana setang! Dianto to papateang mengkalao dolu anna si ungkahiri' katahpa'ang. Yaling di kalaena dai aha katahpa'ang. Si ma'loseng-loseng situhu' kau'na, aka' inang to pa'loseng-loseng anna ambena ingkänna to pa'loseng-loseng. Anna didionaa' dio, si ungkärä'i umbabe samai pembabe karakena.

45Dahi dinoa, aka' kutula'ingkoa' katahpa'ang, dianto anna daia' ungngaku mampetahpa' pano di Kodi'.

46Kusanga daia' aha di alla'mu ang la mala mantanda'ä' umbabe dosa. Dahi akaboi anna daia' ungngaku umpetahpa'ä' ke kutula'ingko yato aka ang tahpa'?

47Tau ang mendahi petauanna Puang Alataala umpehingngiietee' ingkänna tula'na Puang Alataala, ampo' dioa' daia' ungngaku umpehingngii, aka' tadiakoa' petauanna."

48Mekutanang yato ingkänna to Yahudi pano di Puang Yesus naoatee, "Salaraka ke kioaingkotee: Dionto ne mesa to Samaria ang napentamai setang?"

49Mentimba'mi Puang Yesus naoatee, "Dä' napentamai setang, supung umpa'käyyängngiä' Ambeku, ampo' daia' dio ungngaku umpa'käyyängngiä'.

50Dä' umpeäng lalang anna malaä' dipa'käyyängngi, ampo' aha ang mampeängngingkä' anna Dianto ang la manghohto'.

51Kutula'ingkoa' setonganna tau ang untuhu'i pepakuhungku inang daine' aha la ungngolai kamateang."

52Sika naoa buntee, "Dinoa kiinsang liung pole' kioatee napentamaio setang! Aka' ungngoae Diotee, 'Tau ang untuhu'i pepakuhungku inang daine' aha la ungngolai kamateang.' Ampo' akana matee' Abraham anna ingkänna senabiang dolu?

53Dahi unsangarakako Kalaemu mayahoang puha andana Abraham anna senabiang ang puhang mate dolu? Bahtu' mennarakato la umpasinnoaing Kalaemu?"

54Mentimba' bung Puang Yesus naoatee, "Ke la hapangannai umpa'käyyängngi tobouä' Kodi' Kalaeku, ya' setonganna dai aha kunanna. Ampo' ang mampa'käyyängngiä' dianto Puang Alataala Ambeku, ang unsanga Ambemu toua' dio,

55moinnakato anna daia' dio ungnginsang. Ampo' kuinsang Kodi'. Hapanganna ke kuoaitee, dai kuinsang menna Yatoo, ya' losendä'te' disanga, kupensinnoaikoa'. Dahi kuoate dinoa, kuinsang si'da-si'da menna Yatoo anna kutuhu'i ingkänna tula'na.

56Kahsi liu ambemua' Abraham tahpana la ungngita allo kasuleangku, anna yatoo puhang naita lambi' kahsi liu nasa'ding."

57Sika mekutana bung yato to Yahudi naoatee, "Umbang Dio noa la hali sängkäo ungngita Abraham anna moi takanna'i limampulo pahiamammu?"

58Mentimba'mi Puang Yesus naoatee, "Kutula'ingkoa' setonganna dolunna dahi Abraham, inang ahamä' Kodi' Ang Tontong Aha."

59Ya' sika pantammi ungngala batu la nasisaleba'-leba'i, ampo' tahpa membuni Puang Yesus anna le'ba'i umpellei yato Dasang Ada'na Puang Alataala.



 <<  Yohanes 8 >> 


Bahan Renungan: SH - RH - ROC
Download
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
© 2010-2019
Alkitab.SABDA.org

Android.SABDA.org
SABDA.mobi
Bantuan
Single Panel

Laporan Masalah/Saran