Alkitab Mobile SABDA
[VER] : [BABA]     [PL]  [PB] 
 <<  1 Korintus 10 >> 

1Kerna sahya mau kasi kamu tahu, hei sudara-sudara, bagimana kita punya nenek-moyang smoa sudah ada di bawah awan, dan smoa-nya sudah jalan trus lautan itu;

2dan dalam awan dan lautan itu smoa-nya sudah di-baptiskan k-pada Musa;

3dan smoa-nya sudah makan sama satu makanan yang rohani itu:

4dan smoa-nya sudah minum sama satu minuman yang rohani itu: kerna dia-orang sudah minum deri-pada batu rohani yang ikut dia-orang: dan itu batu-lah Almaseh.

5Dalam pada itu, kbanyakan dia-orang t'ada berknan k-pada Allah: kerna dia-orang sudah kna binasa di tanah sunyi.

6Ini perkara smoa jadi chontoh k-pada kita, spaya kita pula jangan ingin apa yang jahat, sperti dia-orang pun sudah ingin.

7Dan jangan-lah kamu smbah datok, s-bagimana ada brapa orang itu; sperti ada tersurat, "Itu bangsa dudok makan minum, dan bangun main-main."

8Dan jangan pula kita buat perchabolan, s-bagimana ada brapa orang itu sudah buat, dan satu hari juga jatoh mati dua-laksa tiga-ribu orang.

9Dan jangan pula kita choba sama Tuhan, s-bagimana ada brapa orang itu sudah choba, dan kna binasa oleh ular.

10Dan jangan pula kamu bersungut-sungut, s-bagimana ada brapa orang itu yang sudah bersungut, dan kna binasa oleh mla'ikat kmatian.

11Ini smoa sudah jadi sama dia-orang spaya mnjadi chontoh; dan smoa-nya sudah tersurat spaya mnjadi nasihat kerna kita, yang sudah jumpa pnghabisan sgala jman.

12Sbab itu, orang yang fikir dia ada berdiri, biar-lah dia jaga baik-baik spaya jangan dia jatoh pula.

13Blum pernah kamu kna pnchoba'an yang manusia ta'boleh tahan: ttapi Allah ada stiawan, dan dia t'ada nanti kasi kamu kna choba lbeh deri-pada kamu punya kuasa; ttapi sama-sama itu pnchoba'an dia nanti bikin satu jalan lpas, spaya kamu boleh ada kuasa tahan.

14Sbab itu, hei sgala kkaseh sahya, lari-lah deri-pada smbahyang datok.

15Sahya berchakap sperti k-pada orang yang bijaksana: kamu ini msti timbang apa sahya bilang.

16Itu chawan berkat yang kita berkatkan, bukan-kah dalam-nya kita bersama-sama dapat bhagian dalam darah Almaseh? Itu roti yang kita pchahkan, bukan-kah dalam-nya kita bersama-sama dapat bhagian dalam badan Almaseh?

17Sdang kita yang banyak ini mnjadi roti s-biji, badan s-batang: kerna kita smoa dapat bhagian deri-pada itu satu roti.

18Perhatikan-lah orang bangsa Isra'el: bukan-kah orang yang makan persmbahan itu bersama-sama dapat bhagian dalam tmpat persmbahan?

19Jadi, apa-kah yang sahya ada bilang? itu lauk-datok jadi apa-apa-kah? atau datok itu jadi apa-apa-kah?

20Bukan, ttapi apa-apa yang orang bangsa-asing smblehkan itu dia-orang smblehkan k-pada jin, bukan-nya k-pada Allah: dan sahya ta'mau kamu dapat bhagian sama-sama jin.

21Kamu ta'boleh minum chawan Tuhan, dan chawan jin pun: kamu ta'boleh dapat bhagian deri-pada meja Tuhan, dan deri-pada meja jin pun.

22Atau ada-kah kita bangkitkan Tuhan punya chmburuan? ada-kah kita lbeh kuat deri-pada Tuhan?

23Smoa perkara ada halal; ttapi bukan smoa-nya ada fa'idah. Smoa perkara ada halal; ttapi bukan smoa-nya tgohkan hati.

24Jangan satu orang chari dia sndiri punya perkara, ttapi orang lain punya.

25Apa-apa yang orang jual di pasar, makan-lah, dngan ta'usah tanya-mnanya deri sbab angan-angan hati;

26kerna bumi ini Tuhan-lah punya, dan smoa yang di dalam-nya.

27Jikalau ada orang yang ta'perchaya jmpot sama kamu, dan kamu pun suka pergi; baik apa pun yang orang ltak dpan kamu makan-lah, dngan ta'usah tanya-mnanya deri sbab angan-angan hati,

28Ttapi kalau ada orang kata sama kamu, "Ini-lah datok punya lauk," jangan makan, deri sbab orang yang sudah kasi tahu, dan deri sbab angan-angan hati:

29ttapi bukan-nya angan-angan hati kamu sndiri yang sahya katakan, ttapi itu lain orang punya; kerna apa sbab sahya punya kbebasan di-salahkan oleh lain orang punya angan-angan hati?

30Jikalau sahya ambil sahya punya bhagian dngan trima-kaseh, knapa-kah orang mau jahatkan sahya fasal apa-apa yang sahya mnguchap shukor atas-nya?

31Sbab itu, baik makan, baik minum, baik apa pun kamu buat, buat-lah smoa mau muliakan Allah.

32Jangan-lah kasi terantok baik sama orang Yahudi, baik sama orang bangsa-asing, baik sama eklisia Allah:

33sperti sahya pun jadi berknan sama sgala orang dalam sgala perkara, bukan-nya chari sahya sndiri punya fa'idah, ttapi kbanyakan orang punya, spaya dia-orang boleh dapat slamat.



 <<  1 Korintus 10 >> 


Bahan Renungan: SH - RH - ROC
Download
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
© 2010-2019
Alkitab.SABDA.org

Android.SABDA.org
SABDA.mobi
Bantuan
Single Panel

Laporan Masalah/Saran