Alkitab Mobile SABDA
[VER] : [BABA]     [PL]  [PB] 
 <<  1 Korintus 11 >> 

1Turut-lah sahya punya tuladan, sperti sahya pun turut Almaseh punya.

2Sahya puji sama kamu dalam hal kamu ada ingat sama sahya dalam sgala perkara, dan ada pegang smoa pngajaran sperti yang sahya sudah srahkan k-pada kamu.

3Ttapi sahya suka kamu tahu yang k-pada tiap-tiap orang dlaki, Almaseh-lah jadi kpala-nya; dan k-pada prempuan, orang dlaki-lah jadi kpala-nya; dan k-pada Almaseh, Allah jadi kpala-nya.

4Tiap-tiap orang dlaki yang tudong kpala-nya waktu dia berdo'a atau mngajar orang, dia itu bawa malu k-pada kpala-nya.

5Ttapi tiap-tiap prempuan yang t'ada tudong kpala-nya waktu dia berdo'a atau mngajar, dia itu bawa malu k-pada kpala-nya: kerna itu sama juga sperti dia sudah chukor rambot-nya.

6Kerna jikalau satu prempuan t'ada bertudong, biar-lah rambot-nya pun di-gunting: ttapi jikalau mnjadi malu bila satu prempuan kna rambot gunting atau chukor, biar-lah dia bertudong.

7Kerna orang dlaki t'ada patut bertudong kpala-nya, sbab dia-lah rupa dan kmulia'an Allah: ttapi prempuan jadi orang dlaki punya kmulia'an.

8Kerna orang dlaki bukan asal-nya deri-pada prempuan; ttapi prempuan asal-nya deri-pada orang dlaki:

9lagi pun, bukan-nya dlaki sudah di-jadikan kerna prempuan: ttapi prempuan sudah di-jadikan kerna dlaki:

10itu-lah sbab-nya prempuan patut pakai di atas kpala-nya satu tanda yang dia ada di bawah kuasa, deri sbab sgala mla'ikat.

11Ttapi dalam Tuhan kita, bukan-nya orang dlaki itu dngan t'ada prempuan, dan bukan-nya prempuan dngan t'ada orang dlaki.

12Kerna sperti prempuan asal-nya deri-pada orang dlaki, bgitu juga orang dlaki pula datang oleh prempuan; ttapi smoa perkara asal-nya deri-pada Allah.

13Timbang-lah dalam kamu punya diri, ada-kah snonoh kalau prempuan minta do'a k-pada Allah dngan t'ada bertudong?

14Bukan-kah kamu blajar deri-pada kamu punya tabi'at sndiri pun yang kalau satu orang dlaki ada berrambot panjang, itu jadi satu malu sama dia.

15Ttapi kalau satu prempuan pula ada berrambot panjang, itu jadi mulia sama dia: kerna rambot itu sudah di-brikan k-pada dia mnjadi tudongan.

16Ttapi jikalau barang-siapa suka berbantah-bantah, sama kita ini tidak ada bgitu punya adat, dan sama sgala eklisia Allah pun t'ada juga.

17Ttapi dalam ini psan sahya t'ada puji sama kamu, ia'itu yang kamu punya perhimponan bukan bawa kbaikan, ttapi bawa ta'baik.

18Kerna mula-mula, waktu kamu berhimpon dalam eklisia, sahya dngar yang di antara kamu ada perchraian: dan sahya sparoh perchaya juga.

19Kerna msti ada perchraian antara kamu, spaya boleh nyata siapa-kah orang-orang yang tulus hati di antara kamu.

20Sbab itu bila kamu berhimpon sama-sama, ia'itu bukan-nya mau makan perjamuan Tuhan:

21kerna dalam hal kamu makan, masing-masing makan sndiri punya makanan dhulu; jadi ada orang yang lapar, dan ada pula yang mabok.

22Kerna kamu t'ada-kah rumah-tangga boleh makan minum? atau ada-kah kamu hinakan eklisia Allah itu, dan kasi malu sama orang yang tidak ada rumah-tangga? Apa-kah sahya msti kata sama kamu? patut-kah sahya puji sama kamu dalam ini hal? Sahya t'ada pujikan.

23Kerna sahya sudah trima deri-pada Tuhan apa yang sahya sudah srahkan k-pada kamu, ia'itu bagimana pada malam yang Tuhan lsa sudah kna srah, dia ambil roti;

24dan bila dia sudah mnguchap shukor, dia pchahkan, dan kata, "Ini-lah sahya punya badan yang kerna kamu itu: buat bgini jadi satu peringatan sama sahya."

25Dan bgitu juga itu chawan pun, bila sudah habis makan, dan dia kata, "Ini chawan-lah jadi perjanjian bharu dalam darah sahya: buat bgini, s-brapa kali kamu minum, jadi satu peringatan sama sahya."

26Kerna s-brapa kali kamu makan ini roti dan minum ini chawan kamu ada mashhurkan Tuhan punya kmatian sampai dia datang.

27Sbab itu barang-siapa yang makan roti atau minum chawan Tuhan dngan t'ada padan, dia nanti jadi salah k-pada badan dan darah Tuhan.

28Ttapi biar-lah orang preksa diri-nya sndiri, dan bgini bharu biar-lah dia makan roti dan minum chawan.

29Kerna orang yang, makan-minum, jikalau t'ada bedakan itu badan, dia ada makan-minum hukuman atas diri-nya.

30Deri sbab ini ada banyak orang di antara kamu yang lmah dan sakit, dan brapa orang sudah tidor.

31Ttapi jikalau kita bedakan hal diri kita sndiri, t'ada kita nanti kna hukumkan pula.

32Ttapi jikalau kita kna Tuhan punya hukuman, kita trima seksa, spaya jangan pula kita kna hukuman sama-sama orang dunia.

33Sbab itu, hei sudara-sudara, bila kamu berhimpon mau makan, baik kamu nantikan satu sama lain.

34Dan jikalau ada orang lapar, biar-lah dia makan di rumah, spaya jangan kamu punya perhimponan bawa hukuman atas kamu. Dan lain-lain perkara nanti sahya btulkan bila sahya datang.



 <<  1 Korintus 11 >> 


Bahan Renungan: SH - RH - ROC
Download
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
© 2010-2019
Alkitab.SABDA.org

Android.SABDA.org
SABDA.mobi
Bantuan
Single Panel

Laporan Masalah/Saran