1Bukan-kah sahya ini bebas? Bukan-kah sahya ini satu rasul? Bukan-kah sahya ini sudah tengok Tuhan kita Isa? Bukan-kah kamu ini pkerja'an sahya dalam Tuhan?
2Kalau sama lain orang sahya ini bukan rasul, ttapi sama kamu juga sahya ini satu rasul: kerna di dalam Tuhan kamu ini-lah yang ttapkan sahya punya pangkat rasul.
3Jadi sama orang yang mau preksa sahya, ini-lah sahya punya jawab ia'itu:
4T'ada-kah kita kuasa makan minum?
5T'ada-kah kita kuasa mmbawa satu bini sama kita, kalau dia satu sudara, sperti hal lain-lain rasul, dan sudara-sudara Tuhan kita, dan Kifas pun?
6Atau sahya ini-kah saja sama Bar-nabas yang t'ada kuasa brenti kerja?
7Siapa-kah jadi soldado atas blanja-nya sndiri? dan siapa pula yang tanamkan kbun anggor t'ada makan buah-nya? atau siapa-kah yang piara kambing t'ada makan susu kambing itu?
8Ada-kah sahya chakap ini smoa sperti manusia punya bichara? atau bukan-kah hukum-taurit pun kata bgitu juga?
9Kerna ada tersurat dalam taurit Musa, "Jangan-lah angkau sampaikan mulut lmbu tempo mngirek." Lmbu-kah yang Allah pdulikan,
10atau btul-kah kerna kita yang dia kata bgitu? Ya, kerna kita juga itu sudah tersurat: sbab orang yang mmbajak patut mmbajak dngan harap, dan orang yang mngirek pun dngan harap mau dapat bhagian.
11Kalau kita sudah taburkan perkara-perkara rohani k-pada kamu, bsar-kah punya perkara kalau kita mnuai kamu punya perkara-perkara dunia?
12Jikalau lain orang dapat bhagian pakai ini kuasa di atas kamu, bukan-kah kita ini pula lbeh lagi? Dalam pada itu kita t'ada pakai ini kuasa; ttapi kita tahan smoa perkara, spaya jangan kita skatkan injil Almaseh.
13Bukan-kah kamu tahu yang orang-orang yang buat pkerja'an yang kudus itu makan apa yang di dalam ka'abah? dan orang-orang yang juga tmpat korban, dapat bhagian sama tmpat korban itu?
14Bgitu juga Tuhan sudah tntukan yang orang yang khabarkan injil patut dapat hidopan-nya deri-pada injil.
15Ttapi sahya ini t'ada pakai satu pun deri-pada ini perkara smoa: dan ini sahya ada tulis bukan-nya spaya orang boleh buatkan ini kerna sahya: kerna lbeh baik sahya mati deri-pada siapa pun boleh sia-siakan sahya punya kmgahan.
16Kerna kalau sahya khabarkan injil pun, sahya t'ada apa-apa kmgahan; sbab sudah tertanggong di atas sahya, sampaikan sahya msti buat bgitu; kerna susah-lah sahya jikalau sahya t'ada khabarkan injil.
17Kerna sahya buat ini dngan suka sndiri, sahya dapat pahala: ttapi kalau bukan dngan suka sndiri pun, satu juru-kunchi punya kerja sudah di-srahkan k-pada sahya.
18Kalau bgitu apa-kah sahya punya pahala? Ia'itu spaya bila sahya khabarkan injil, sahya pakai smoa skali sahya punya kuasa dalam injil itu.
19Kerna sunggoh pun sahya t'ada jadi hamba k-pada satu orang pun, ttapi sahya jadikan diri sahya hamba sgala orang, spaya sahya boleh dapat lbeh banyak orang lagi.
20Dan sama orang Yahudi, sahya mnjadi sperti orang Yahudi, spaya sahya boleh dapat orang Yahudi; sama orang yang di bawah hukum-taurit, sahya mnjadi sperti orang yang di bawah hukum-taurit, sunggoh pun sahya ini bukan-nya di bawah hukum-taurit, spaya sahya boleh dapat orang yang di bawah hukum-taurit;
21sama orang yang t'ada hukum, sahya mnjadi sperti orang yang t'ada hukum, sunggoh pun bukan-nya sahya bebas deri-pada hukum Allah, ttapi dalam Almaseh punya hukum, spaya sahya boleh dapat orang yang t'ada hukum.
22Sama orang yang lmah sahya mnjadi lmah, spaya sahya boleh dapat orang yang lmah: sahya sudah mnjadi smoa perkara sama smoa orang, spaya dngan smoa daya-upaya sahya boleh slamatkan sikit orang.
23Dan sahya buat sgala perkara deri injil punya sbab, spaya sahya boleh dapat bhagian dalam-nya sama-sama lain orang.
24T'ada-kah kamu tahu yang orang yang berlari di tmpat orang berlumba, smoa-nya juga berlari, ttapi chuma satu saja yang trima prais? Lari-lah bgitu juga, spaya kamu boleh dapat mnang.
25Tiap-tiap orang yang berlawan dalam permainan itu tahankan diri-nya dalam smoa perkara. Dia-orang itu spaya mau dapat satu makota daun yang nanti layu; ttapi kita ini mau dapat yang t'ada layu punya.
26Sbab itu bgini-lah sahya punya lari, bukan-nya ta'tntu; bgini-lah sahya punya tumbok, bukan-nya sperti pukol angin:
27ttapi sahya kraskan sahya punya badan, dan kasi dia jadi hamba: spaya jangan, bila sahya sudah ajarkan lain orang, sahya sndiri pula kna tolak.
<< 1 Korintus 9 >>
Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel