Alkitab Mobile SABDA
[VER] : [BABA]     [PL]  [PB] 
 <<  1 Timotius 5 >> 

1Sama satu ktua jangan kalot, ttapi nasihatkan dia sperti sama satu bapa; dan orang muda-muda sperti sama sudara-sudara:

2prempuan tua-tua sperti sama mak; prempuan muda-muda sperti sama sudara-sudara prempuan dngan s-gnap ksuchian.

3Bri hormat sama prempuan bujang yang bujang btul.

4Ttapi jikalau ada prempuan bujang yang ada anak atau chuchu, biar dia-orang blajar buat bakti mula-mula k-pada dia-orang punya isi rumah sndiri, dan balas baik k-pada mak-bapa-nya: kerna ini-lah berknan di dpan Allah.

5Prempuan yang bujang btul, dan yang tertinggal s'orang-s'orang, dia ada taroh harap dalam Allah, dan tinggal ttap dalam perminta'an dan do'a siang-malam.

6Ttapi prempuan yang chari ksuka'an ada mati sdang dia hidop.

7Ini smoa pun baik angkau psan, spaya jangan dia-orang kna chla.

8Ttapi jikalau satu orang t'ada pliharakan orang-nya sndiri, dan terlbeh skali dia-orang punya isi-rumah sndiri, dia sudah munkirkan iman itu, dan dia lbeh ta'baik deri-pada satu orang yang t'ada perchaya.

9Jangan masokkan dalam bilangan prempuan bujang satu prempuan yang kurang deri-pada anam-puloh tahun punya umor, yang sudah kahwin satu kali saja,

10yang ada nama deri sbab dia punya perbuatan baik; ia'itu kalau dia sudah plihara anak, kalau sudah sambot orang dagang, kalau sudah chuchikan kaki orang kudus, kalau sudah tolong sama orang yang kna susah, kalau sudah turut dngan rajin smoa pkerja'an yang baik.

11Ttapi prempuan bujang yang muda-muda jangan trima: kerna bila dia-orang ada nafsu mau tinggalkan Almaseh, dia-orang mau kahwin pula;

12dan kna hukum sbab tpikan dia-orang punya janji yang mula-mula.

13Dan lagi pun dia-orang blajar mnjadi malas, dan singgah mnyinggah rumah-rumah orang; dan bukan saja malas, ttapi bawa mulut pula, dan masok tangan dalam lain orang punya kerja, dan chakap perkara-perkara yang ta'patut.

14Sbab itu, sahya punya kahandak, biar prempuan bujang yang muda-muda kahwin, dan beranak, dan prentah rumah-tangga-nya, dan jangan kasi musoh kita satu sbab boleh umpatkan:

15kerna sudah pun ada orang yang sudah mnyempang ikut Setan.

16Jikalau satu prempuan yang perchaya ada prempuan-prempuan bujang sama dia, biar dia tolong sama dia-orang, dan jangan eklisia itu kna brat; spaya eklisia boleh tolong sama prempuan-prempuan yang bujang btul.

17Ktua-ktua yang prentah baik-baik, patut-lah kasi hormat sama dia dua kali ganda, terlbeh skali orang yang berpnat dalam hal perkata'an dan dalam pngajaran.

18Kerna kitab ada kata, "Jangan angkau ikatkan mulut lmbu waktu dia ada mngirek trigu;" dan lagi, "Orang yang kerja patut-lah dapat upah-nya."

19Jangan angkau trima satu d'awa'an atas satu ktua, kalau tidak dngan mulut dua tiga saksi.

20Orang yang berdosa, kalot sama dia dpan smoa orang, spaya yang lain boleh takot.

21Di hadapan Allah dan Isa Almaseh, dan mla'ikat-mla'ikat yang pilehan, sahya psan angkau pliharakan ini smoa dngan t'ada bicharakan lbeh dhulu, dan dngan t'ada buat apa-apa ikut hati angkau punya chondong.

22Jangan gopoh taroh tangan atas satu orang pun, dan jangan s-bhagian dngan lain orang punya dosa-dosa; angkau punya diri sndiri pliharakan dngan suchi.

23Jangan lagi minum chuma ayer saja, ttapi pakai sikit ayer-anggor sbab prot angkau punya hal, dan sbab angkau punya pnyakit yang krap-krap datang.

24Ada orang punya dosa nyata skali, yang bawa hukuman-nya lbeh dhulu; dan ada orang pula dosa-dosa-nya ikut deri blakang.

25Bgitu juga ada perbuatan baik yang nyata skali; dan yang bukan bgitu pun ta'boleh juga di-smbunyikan.



 <<  1 Timotius 5 >> 


Bahan Renungan: SH - RH - ROC
Download
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
© 2010-2019
Alkitab.SABDA.org

Android.SABDA.org
SABDA.mobi
Bantuan
Single Panel

Laporan Masalah/Saran