Alkitab Mobile SABDA
[VER] : [BABA]     [PL]  [PB] 
 <<  2 Korintus 1 >> 

1Deri-pada Paulus, rasul Isa Almaseh dngan kahandak Allah, dan deri-pada sudara kita Timotius, datang k-pada eklisia Allah yang di negri Korintus, sama-sama sgala orang kudus sluroh tanah Akhayah:

2biar-lah datang k-pada kamu anugrah dan sjahtra deri-pada Bapa kita Allah, dan deri-pada Tuhan kita Isa Almaseh.

3Sgala puji k-pada Allah, Bapa Tuhan kita Isa Almaseh, ia'itu Bapa sgala ksian, dan Allah sgala pnghiburan:

4yang hiburkan kita dalam smoa kita punya ksusahan, spaya kita pula boleh hiburkan orang yang di dalam apa-apa punya ksusahan, oleh pnghiburan yang Allah sudah hiburkan kita sndiri pun.

5Kerna sperti sngsara Almaseh mnjadi banyak sama kita, bgitu juga kita punya pnghiburan pun jadi banyak oleh Almaseh.

6Ttapi jikalau kita kna susah, itu-lah deri sbab kamu punya pnghiburan dan kamu punya slamat; atau jikalau kita dapat hibur, itu pun deri sbab kamu punya pnghiburan, yang berkuasa dalam hal kamu tahan dngan sabar itu sngsara juga yang kita ini mrasa:

7dan kita punya harap kerna kamu ada ttap, sbab kita tahu yang s-bagimana kamu sama-sama mnahan sngsara, bgitu juga kamu sama-sama rasa pnghiburan.

8Kerna kita mau kasi kamu tahu, hei sudara-sudara, fasal kita punya ksusahan yang sudah jadi di tanah Asiah, ia'itu yang kita sudah kna sangat-lah brat punya pikulan, lbeh deri-pada kita punya kuasa, sampaikan kita putus harap skali deri-hal hidop:

9ttapi kita sudah dapat dalam diri kita satu jawab yang kita msti mati, spaya jangan kita harap k-pada diri kita sndiri, chuma k-pada Allah yang bangkitkan orang mati:

10dia yang sudah lpaskan kita deri-pada kmatian yang bgitu bsar, dan nanti lpaskan lagi: dan kita taroh harap k-pada dia, yang dia lagi nanti lpaskan;

11sdang kamu pula bantu kita dngan kamu punya do'a, spaya banyak orang boleh mmbri shukor kerna kita sbab kurnia yang sudah sampai k-pada kita dngan banyak orang punya tolong.

12Ini-lah kita punya kmgahan, ia'itu angan-angan hati kita sndiri bersaksi, yang di antara orang dunia, dan terlbeh skali di antara kamu smoa, kita ini sudah bawa tengkah-laku dngan kkudusan dan tulus hati yang datang deri-pada Allah, bukan-nya dngan budi manusia, ttapi dngan anugrah Allah.

13Kerna perkara-perkara yang kita ada tulis k-pada kamu t'ada lain lagi mlainkan itu juga yang kamu ada bacha atau yang kamu mngaku, dan sahya harap kamu nanti mngaku sampai ksudahan skali:

14sperti yang sudah juga kamu mngaku sdikit sama kita, ia'itu yang kamu patut mgahkan diri deri-hal kita, sama sperti kita pula mgahkan diri deri-hal kamu, tempo Tuhan kita Isa punya hari.

15Dan sbab sahya sudah harap bgini, sahya sudah bichara mau pergi k-pada kamu dhulu, spaya kamu boleh dapat untong dua kali;

16ia'itu bila sahya sudah singgah sama kamu, kmdian langsong pergi Makadoniah, dan deri Makadoniah pula mau datang lagi s-kali k-pada kamu, dan habis itu kamu boleh hantarkan sahya pergi tanah Yahudiah.

17Sdang sahya sudah bichara bgini, ada-kah sahya tunjok yang hati sahya ta'tiap? atau apa-apa yang sahya sudah bichara itu, ada-kah sahya bicharakan itu chara dunia, sampaikan jadi s-kjap "ya-ya" dan s-kjap "tidak-tidak?"

18Ttapi dmi Allah yang stiawan itu, kita punya chakap sama kamu bukan-nya s-kjap "ya," s-kjap "tidak."

19Kerna Isa Almaseh, Anak Allah, yang kita sudah khabarkan k-pada kamu, ia'itu sahya dan Silwanus dan Timotius, dia bukan-nya s-kjap "ya," s-kjap "tidak," ttapi dalam dia mnjadi "ya" saja.

20Kerna baik brapa banyak ada perjanjian Allah, dalam dia mnjadi ya: sbab itu-lah oleh dia juga jadi itu Amin, mau muliakan Allah oleh kita ini.

21Allah juga yang ttapkan kita sama kamu masok dalam Almaseh, dan yang sudah lantekkan kita:

22dan dia-lah yang sudah silkan sama kita, dan sudah kasi kita Roh masok kita punya hati mnjadi chngkram.

23Ttapi sahya panggil Allah jadi saksi atas jiwa sahya, yang sahya blum pergi di Korintus lagi, ia'itu deri sbab sahya sayangkan kamu.

24Bukan-nya yang kita ini mnjadi tuan di atas kamu punya perchaya, ttapi kita bkerja sama-sama kamu mau tolong kasi kamu ksuka'an: kerna oleh perchaya juga kamu berdiri ttap.



 <<  2 Korintus 1 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel Single Panel