Alkitab Mobile SABDA
[VER] : [BABA]     [PL]  [PB] 
 <<  2 Korintus 5 >> 

1Kerna kita tahu juga yang jikalau ini khemah tmpat kita tinggal di bumi nanti ruboh, kita ada satu bangunan yang deri-pada Allah asal-nya; ia'itu satu tmpat tinggal yang bukan perbuatan tangan manusia, dan yang kkal di dalam shorga.

2Kerna dalam ini khemah pun kita ada mngrang, dan ada ingin mau dapat pakai atas-nya kita punya tmpat tinggal yang deri shorga itu:

3sdang bila kita ada pakaian, kita t'ada nanti kna dapat tlanjang.

4Kerna btul-lah kita yang lagi di dalam ini khemah ada mngrang, sbab mnanggong brat; sbab kita ta'mau buka pakaian, ttapi mau pakai lain di atas-nya, ia'itu spaya apa yang nanti mati boleh kna tlan oleh hidop.

5Dan dia yang sudah lngkapkan kita kerna ini perkara juga, ia'itu-lah Allah, yang sudah kasi Roh-nya mnjadi satu chngkram.

6Sbab itu hati kita slalu brani, dan kita tahu pula yang s-lagi kita ada berrumah di dalam badan, kita ada jauh deri rumah Tuhan

7(kerna kita ada bawa diri oleh perchaya, bukan-nya oleh nampak);

8jadi kita punya hati ada brani, dan kita lbeh suka mau jauh deri-pada rumah badan, dan berrumah sama Tuhan.

9Sbab itu, baik kita di rumah atau jauh deri rumah, kita punya maksud mau jadi berknan sama Tuhan.

10Kerna kita smoa msti di-nyatakan di dpan krusi bichara Almaseh; spaya boleh trima apa yang masing-masing sudah buat dalam badan, turut sperti apa yang dia sudah buat, 'ntah baik 'ntah jahat.

11Sbab kita ada tahu takot sama Tuhan, jadi kita pujok orang, ttapi di dpan Allah kita ada nyata; dan sahya harap kita ada nyata dalam kamu punya angan-angan hati juga.

12Kita bukan-nya ada lagi s-kali pujikan diri kita sama kamu, ttapi kita ada kasi kamu satu sbab yang kamu boleh mgahkan diri fasal kita, spaya kamu boleh kasi jawab sama orang yang mgahkan diri-nya fasal rupa, dan bukan fasal hati.

13Kerna jikalau kita sudah hilang akal, itu pun kerna Allah; atau jikalau kita ada akal budi, itu kerna kamu pula.

14Kerna kaseh Almaseh ada paksakan kita; sbab bgini-lah kita punya bichara, ia'itu satu orang sudah mati kerna smoa orang, jadi itu smoa-nya sudah mati;

15dan lagi pun dia sudah mati kerna smoa orang, spaya orang-orang yang ada hidop jangan hidop kerna diri-nya, ttapi kerna dia yang deri sbab dia-orang sudah mati dan hidop s-mula.

16Sbab itu deri ini tempo kita ini t'ada-lah knal satu orang pun chara manusia: sunggoh pun kita sudah knal Almaseh chara manusia, ttapi skarang kita t'ada knal bgitu lagi.

17Sbab itu, jikalau satu orang ada dalam Almaseh, dia itu satu kjadian yang bharu: perkara-perkara yang lama itu sudah lalu; smoa-nya sudah jadi bharu.

18Ttapi smoa perkara deri-pada Allah juga asal-nya, yang sudah damaikan kita dngan diri-nya oleh Almaseh, dan sudah kasi sama kita playanan perdamaian;

19ia'itu bagimana Allah dalam Almaseh ada damaikan isi dunia ini k-pada diri-nya, dngan t'ada tanggongkan dia-orang punya dosa atas dia-orang, dan sudah srahkan k-pada kita itu khabar perdamaian.

20Sbab itu kita mnjadi utusan kerna Almaseh, spertikan Allah juga ada nasihatkan dngan lidah kita: kerna Almaseh kita ada minta, "Baik kamu berdamai dngan Allah."

21Dia itu yang t'ada tahu dosa, Tuhan sudah jadikan dosa kerna kita; spaya dalam dia kita ini boleh jadi kbnaran Allah.



 <<  2 Korintus 5 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel Single Panel