Alkitab Mobile SABDA
[VER] : [BABA]     [PL]  [PB] 
 <<  2 Korintus 8 >> 

1Dan kita mau kasi tahu sama kamu, hei sudara-sudara, fasal anugrah Allah yang sudah di-bri dalam smoa eklisia negri Makadoniah;

2ia'itu bagimana sdang orang-orang itu kna uji oleh banyak ksusahan, dia-orang punya ksuka'an yang mlempah, dan dia-orang punya hal miskin yang sangat bsar sudah banyakkan dia-orang punya kmurahan yang kaya itu.

3Kerna sahya bersaksi, yang dia-orang sudah kasi s-kdar dia-orang punya kuasa, dan lbeh deri-pada kuasa-nya,

4dan dngan banyak perminta'an dia-orang minta ini anugrah dan ini persahabatan dalam playanan k-pada orang kudus:

5dan itu pun bukan-nya sperti kita sudah harap, ttapi mula-mula dia-orang smbahkan diri-nya k-pada Tuhan, dan k-pada kita pula oleh kahandak Allah.

6Sampaikan kita minta Titus, yang sperti dia sudah mula'i dhulu, bgitu juga baik dia gnapkan di antara kamu ini anugrah pula.

7Ttapi sperti kamu ada pnoh dngan sgala perkara, ia'itu perchaya, dan plajaran, dan pngtahuan, dan sgala usaha, dan kamu punya kaseh k-pada kita, baik-lah kamu jadi pnoh dngan ini anugrah pula.

8Sahya ada berchakap bukan-nya sperti kasi hukum, ttapi oleh lain orang punya usaha sahya mau nyatakan yang kamu punya kaseh itu ada btul.

9Kerna kamu pun tahu anugrah Tuhan kita Isa Almaseh, ia'itu mski pun dia kaya, ttapi deri sbab kamu dia sudah jadi miskin, spaya oleh dia punya hal miskin kamu smoa boleh jadi kaya.

10Dan sahya kasi sahya punya bichara atas itu perkara: kerna bgitu patut juga sama kamu, yang tahun dhulu sudah mula'i lbeh dhulu, bukan saja perbuatan-nya, ttapi niat-nya pun.

11Dan skarang baik kamu habiskan perbuatan-nya pula; spaya s-bagimana dhulu itu niat sudah sdia, bgitu juga boleh ada pnghabisan-nya s-kdar kamu boleh.

12Kerna jikalau itu niat sudah sdia, itu nanti berknan s-kdar orang ada, bukan-nya s-kdar dia tidak ada.

13Kerna sahya kata ini bukan-nya spaya lain orang boleh dapat snang, dan kamu pula kna susah:

14ttapi biar jadi sama; ini ktika kamu punya klbehan boleh chukopkan dia-orang punya kkurangan, spaya dia-orang pula punya klbehan boleh chukopkan kamu ini punya kkurangan; spaya jadi sama:

15sperti ada tersurat, "Orang yang ada banyak t'ada juga lbeh; dan orang yang ada sdikit t'ada pula kurang."

16Ttapi shukor-lah k-pada Allah yang sudah kasi itu usaha juga kerna kamu di dalam hati Titus.

17Kerna dia sudah trima juga kita punya perminta'an; dan sbab dia sndiri ada sangat usaha, dngan kahandak-nya sndiri juga dia sudah pergi k-pada kamu.

18Dan itu sudara yang di-puji di antara sgala eklisia dalam khabar injil, dia pun kita sudah suroh pergi sama-sama dia;

19dan bukan bgini saja hal-nya, ttapi itu sudara sudah di-tntukan oleh sgala eklisia spaya blayer sama-sama kita dalam hal ini anugrah, yang kita ada jalankan spaya bawa mulia k-pada Tuhan, dan spaya nyatakan kita punya niat hati:

20mau tntukan bgini, ia'itu jangan satu orang pun boleh chlakan kita deri-hal ini kbajikan yang kita ada jalankan;

21kerna kita ini ingat buat perkara yang bnar, bukan saja di dpan Tuhan, ttapi di dpan manusia pun.

22Dan sama-sama dua-dua orang itu, kita sudah hantarkan sudara kita, yang kita banyak kali sudah dapat tahu jadi berusaha dalam banyak perkara, dan skarang ini lbeh berusaha lagi, deri sbab dia punya harap yang bsar dalam kamu smoa.

23Fasal Titus, dia itu kawan sahya dan pmbantu sahya dalam pkerja'an kerna kamu; kalau fasal sudara-sudara kita, dia-orang itu mnjadi psuroh sgala eklisia, dan Almaseh punya kmulia'an.

24Sbab itu biar-lah kamu tunjokkan k-pada dia-orang di dpan sgala eklisia knyata'an deri-hal kamu punya kaseh, dan deri-hal kita punya kmgahan fasal kamu.



 <<  2 Korintus 8 >> 


Bahan Renungan: SH - RH - ROC
Download
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
© 2010-2019
Alkitab.SABDA.org

Android.SABDA.org
SABDA.mobi
Bantuan
Single Panel

Laporan Masalah/Saran