Alkitab Mobile SABDA
[VER] : [BABA]     [PL]  [PB] 
 <<  2 Timotius 2 >> 

1Sbab itu angkau ini, hei anak, biar-lah angkau di-kuatkan dalam anugrah yang di dalam Isa Almaseh.

2Dan apa-apa yang angkau sudah dngar deri sahya dngan banyak saksi-saksi, srahkan itu smoa pun k-pada orang yang kperchaya'an, yang boleh jadi padan ajar lain orang pula.

3Sperti soldado Isa Almaseh yang baik, tanggong-lah susah sama-sama.

4T'ada satu orang pun yang jadi soldado kusutkan dia punya diri dngan perkara dunia; ia'itu spaya dia boleh sukakan itu orang yang sudah masokkan dia jadi soldado.

5Dan jikalau orang berlumba, dia t'ada dapat makota kalau dia t'ada berlumba sperti undang-undang.

6Orang ladang yang bkerja, patut mula-mula dapat bhagian buah-buahan-nya.

7Fikir-lah baik-baik sahya punya perkata'an; kerna Tuhan nanti kasi angkau pngertian dalam smoa perkara.

8Ingat-lah Isa Almaseh, yang di-bangkitkan deri antara orang mati, ia'itu deri-pada kturunan Da'ud, sperti injil yang sahya ajarkan:

9dan dalam itu hal sahya tanggong susah sampaikan kna pasong, sperti orang salah; ttapi perkata'an Allah t'ada kna pasong.

10Sbab itu sahya ada tahan smoa perkara kerna orang-orang pilehan punya sbab spaya dia-orang pun boleh dapat slamat yang dalam Isa Almaseh dngan kmulia'an yang kkal.

11Ini perkata'an kperchaya'an, ia'itu kalau kita sudah mati sama-sama dia, kita nanti hidop sama-sama dia pula:

12kalau kita tahan, kita nanti jadi raja pula sama-sama dia: kalau kita sangkalkan dia, dia pula nanti sangkalkan kita:

13kalau kita kurang perchaya, dia tinggal kperchaya'an juga; kerna dia ta'boleh sangkalkan diri-nya sndiri.

14Deri-hal ini smoa ingatkan orang-orang itu, dan psankan dpan Tuhan jangan dia-orang berbantah fasal perkata'an, dan itu satu pun t'ada guna-nya, ttapi datangkan chlaka atas orang yang dngar.

15Usahakan diri spaya boleh bnarkan diri angkau di dpan Allah, satu tukang yang ta'usah malu, dan yang jalankan kbtulan punya perkata'an dngan lurus.

16Ttapi jauhkan diri angkau deri orang ssat punya perchakapan yang sia-sia: kerna orang yang bgini nanti bertambah dalam hal t'ada kbaktian,

17dan dia-orang punya perkata'an nanti makan dalam sperti pkong: antara dia-orang ada Huminaius dan Filetus;

18orang-orang yang sudah ssat deri-hal kbtulan itu, dan bilang yang kbangkitan itu sudah pun jadi, dan terbalekkan brapa orang punya perchaya.

19Dalam pada itu, Allah punya alasan yang tgoh itu ada ttap, dngan ini-lah surat ktrangan-nya ia'itu, "Tuhan tahu orang-orang-nya." Dan lagi, "Barang-siapa yang sbot nama Almaseh, jauhkan-lah diri-nya deri-pada kjahatan."

20Dalam satu rumah bsar, bukan saja ada bkas mas dan perak, ttapi ada juga yang deri kayu dan tanah; dan yang ada kerna kerja mulia, dan yang ada kerna yang t'ada mulia.

21Sbab itu, jikalau satu bkas kerna kerja yang mulia, yang sudah di-suchikan, dan padan kerna tuan-nya punya pakai, dan sdia kerna tiap-tiap kerja yang baik.

22Ttapi lari-lah deri smoa k'inginan orang muda-muda dan tuntut-lah kbnaran, perchaya, kaseh, dan sntosa sama-sama orang yang triak Tuhan dngan hati yang suchi.

23Ttapi perbantahan yang bodoh dan ta'berakal punya baik angkau tolakkan, sbab angkau tahu itu smoa datangkan perklahian.

24Dan Tuhan punya hamba t'ada patut berklahi, ttapi jadi manis k-pada smoa orang, tahu mngajar orang, sabar dalam ksusahan,

25dngan hati lmbot ajarkan orang yang mlawan-lawan; 'ntah barangkali Allah boleh kasi dia-orang tobat sampai dapat tahu kbtulan itu,

26dan dia-orang boleh lpas dngan sihat-nya deri jrat iblis, bila dia sudah kna tangkap oleh Tuhan punya hamba spaya buat kahandak Allah.



 <<  2 Timotius 2 >> 


Bahan Renungan: SH - RH - ROC
Download
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
© 2010-2019
Alkitab.SABDA.org

Android.SABDA.org
SABDA.mobi
Bantuan
Single Panel

Laporan Masalah/Saran