1Sbab itu-lah sahya ini Paulus, yang mnjadi Isa Almaseh punya orang jel deri sbab kamu orang bangsa-asing,-
2kalau kamu sudah dngar deri-hal pkerja'an mnjalankan anugrah Allah yang sudah di-bri k-pada sahya kerna kamu;
3ia'itu bagimana ruhsia itu sudah di-bri tahu k-pada sahya oleh knyata'an, sperti dhulu sahya sudah tulis sikit k-pada kamu,
4dan deri situ, bila kamu bacha, kamu boleh tahu sahya punya pngertian dalam hal ruhsia Almaseh;
5yang dalam jman-jman yang lain blum di-bri tahu k-pada anak-anak manusia, sperti skarang sudah di-nyatakan k-pada dia punya rasul-rasul dan nabi-nabi yang kudus itu oleh Roh-nya;
6ia'itu orang bangsa-asing pun mnjadi sama-waris, dan satu badan, dan sama-sama dapat bhagian deri-pada perjanjian itu dalam Isa Almaseh oleh injil,
7dan sahya pun sudah di-jadikan satu playan injil, turut sperti pmbrian anugrah Allah itu yang sudah di-bri k-pada sahya, ikut dia punya kuasa punya kerja.
8K-pada sahya juga, yang kchil skali deri-pada sgala orang kudus, ini anugrah sudah di-bri, ia'itu mau khabarkan k-pada orang bangsa-asing kkaya'an Almaseh yang orang ta'boleh preksa;
9dan spaya boleh trangkan k-pada smoa orang apa-kah hal mnjalankan itu ruhsia yang deri dhulu-dhulu punya jman sudah di-smbunyikan dalam Allah yang jadikan smoa perkara;
10spaya skarang pula Allah punya bijaksana yang macham-macham itu boleh di-bri tahu oleh eklisia k-pada sgala prentah dan kuasa yang di shorga,
11turut sperti maksud-nya yang kkal itu, yang dia sudah tntukan dalam Tuhan kita Isa Almaseh:
12dan dalam dia kita ada brani dkat Allah dngan harap yang tgoh, sbab kita punya perchaya dalam dia.
13Sbab itu sahya minta kamu jangan-lah tawar-hati deri sbab sgala ksusahan yang sahya mnanggong kerna kamu, sdang itu smoa jadi kamu punya kmulia'an.
14Ini-lah sbab sahya berlutut dpan Bapa kita,
15yang deri-pada-nya juga tiap-tiap isi rumah baik di shorga baik di bumi pun dapat nama,
16spaya dia boleh bri k-pada kamu, turut sperti kmulia'an-nya yang sangat bsar, ia'itu spaya dia boleh bri kamu di-kuatkan dngan kuasa oleh Roh-nya dalam diri kamu;
17spaya Almaseh boleh tinggal dalam kamu punya hati oleh perchaya: spaya, sdang kamu punya akar dan alasan ada dalam kaseh,
18kamu pun boleh dapat kuasa mngerti sama-sama sgala orang kudus brapa lebar-nya, dan panjang-nya, dan tinggi-nya, dan dalam-nya,
19dan tahu pula kaseh Almaseh itu yang lbeh deri-pada kita boleh mngerti, spaya kamu boleh di-pnohkan sampai kamu dapat sgala berkat Allah dngan s-pnoh-pnoh-nya.
20K-pada Allah yang ada kuasa buat terlampon sangat lbeh deri-pada smoa kita punya perminta'an atau sangka, s-kdar kuasa-nya yang bkerja di dalam kita,
21k-pada dia kmulia'an dalam eklisia dan dalam Isa Almaseh berjman-jman sampai s-lama-lama-nya. Amin.
Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel