Alkitab Mobile SABDA
[VER] : [BABA]     [PL]  [PB] 
 <<  Efesus 5 >> 

1Sbab itu biar-lah kamu turut tuladan Allah, sperti anak-anak yang kkaseh;

2dan bawa diri dalam kaseh, sperti Almaseh pun sudah kaseh sama kamu, dan sudah srahkan diri-nya kerna kita, mnjadi satu persmbahan dan korban k-pada Allah, ia'itu bau yang wangi.

3Ttapi persundalan, dan sgala kotoran, atau tma'a, jangan di-sbot pun nama-nya di antara kamu, bgini-lah yang patut sama orang kudus;

4dan perkara yang hina, atau perkata'an bodoh, atau chakap gila, yang smoa-nya t'ada manis: ttapi lbeh baik mnguchap shukor.

5Kerna ini kamu tahu baik-baik, ia'itu tiap-tiap orang yang berbuat persundalan dan kotoran, dan orang yang tma'a (ia'itu sama juga sperti smbahyang datok), t'ada satu orang pun antara ini smoa yang boleh dapat psaka dalam kraja'an Almaseh dan Allah itu.

6Jangan satu orang pun tipu sama kamu dngan perkata'an sia-sia: kerna deri ini sbab-lah Allah punya marah datang di atas anak-anak derhaka.

7Sbab itu jangan-lah kamu mnjadi s-bhagian sama dia-orang;

8kerna dhulu kamu ini glap, ttapi skarang sudah jadi trang dalam Tuhan: bawa-lah diri sperti anak-anak trang

9(kerna buah-buahan yang di-kluarkan oleh trang itu jadi dalam sgala kbaikan dan kbnaran dan kbtulan),

10dan preksa-lah apa-kah yang berknan k-pada Tuhan;

11dan jangan-lah kamu berskutu dalam pkerja'an glap yang t'ada kluarkan buah, ttapi lbeh baik kamu kalotkan;

12kerna perkara-perkara yang dia-orang ada buat dngan smbunyi, kalau sbot pun jadi malu.

13Kerna smoa perkara yang kna kalot jadi nyata oleh trang itu: kerna apa-apa yang di-nyatakan ia'itu trang.

14Itu sbab-lah dia kata, "Bangun-lah, hei angkau yang tidor, bangkit-lah deri antara orang mati, dan Almaseh nanti kasi trang sama angkau."

15Sbab itu, jaga baik-baik apa macham kamu bawa diri, bukan-nya sperti orang yang kurang bijaksana, ttapi sperti orang yang bijaksana;

16bergunakan s-gnap waktu, kerna ini tempo satu tempo jahat.

17Sbab itu jangan-lah kamu bodoh, ttapi baik-lah kamu mngerti apa-kah kahandak Tuhan.

18Dan jangan-lah kamu mabok ayer-anggor, yang bawa perchabolan, ttapi biar-lah kamu pnoh dngan Roh;

19dan berchakap satu sama lain dngan mazmur dan puji-pujian dan nyanyian yang rohani, dan nyanyi-lah dan bunyikan puji-pujian dngan kamu punya hati k-pada Tuhan;

20slalu mnguchap shukor kerna smoa perkara dngan nama Tuhan kita Isa Almaseh k-pada Bapa kita Allah;

21serta tundokkan diri kamu satu sama lain dngan takot sama Allah.

22Hei sgala bini orang, tundok-lah k-pada kamu sndiri punya laki, sperti k-pada Tuhan.

23Kerna laki itu mnjadi bini punya kpala, sperti Almaseh mnjadi eklisia punya kpala, dan dia-lah yang slamatkan badan itu.

24Ttapi sperti eklisia itu ada tundok k-pada Almaseh, bgitu juga sgala bini orang pun k-pada laki-nya dalam s-lagi perkara.

25Hei sgala laki orang, kaseh-lah sama kamu punya bini, sperti Almaseh sudah kaseh sama eklisia itu, dan srahkan dia punya diri kerna-nya;

26spaya dia boleh kuduskan dia, bila sudah habis suchikan dia sama pmbasohan ayer oleh perkata'an itu,

27spaya dia boleh mnghadapkan eklisia k-pada diri-nya sndiri dngan mulia, dngan t'ada chachat atau krut atau s-bagai-nya; ttapi spaya eklisia itu boleh mnjadi kudus dngan t'ada chla.

28Bgitu juga patut smoa laki kaseh sama bini-nya sndiri sperti badan-nya sndiri. Orang yang kaseh sama bini-nya sndiri, ia'itu kaseh sama diri-nya sndiri:

29kerna satu orang pun blum pernah bnchi badan-nya sndiri, ttapi dia palei dan piarakan, sperti Almaseh pun sama itu eklisia;

30sbab kita ini mnjadi anggota dalam dia punya badan.

31Deri sbab ini, orang msti lpaskan mak-bapa-nya, dan berhubong sama bini-nya; dan dua-dua itu mnjadi satu badan.

32Ini ruhsia bsar-lah: ttapi sahya ada berchakap fasal Almaseh dan fasal eklisia itu.

33Dalam pada itu, baik kamu ini pun masing-masing kaseh sama kamu sndiri punya bini sperti diri sndiri; dan orang punya bini baik takot sama laki-nya.



 <<  Efesus 5 >> 


Bahan Renungan: SH - RH - ROC
Download
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
© 2010-2019
Alkitab.SABDA.org

Android.SABDA.org
SABDA.mobi
Bantuan
Single Panel

Laporan Masalah/Saran