Alkitab Mobile SABDA
[VER] : [BABA]     [PL]  [PB] 
 <<  Filipi 4 >> 

1Sbab itu, hei sudara-sudara yang sahya kasehkan dan rindukan, dan yang mnjadi sahya punya ksuka'an dan sahya punya makota, baik-lah kamu berdiri ttap bgini di dalam Tuhan, hei kkaseh.

2Sahya minta Yuodiah dan sahya minta Suntukhi, jadi satu hati dalam Tuhan.

3Dan sahya minta angkau pun, yang btul jadi sahya punya kawan kerja, tolong-lah ini dua prempuan yang sudah berpnat sama-sama sahya dalam pkerja'an injil, dan sama-sama Klemin pun, dan sama-sama lain sahya punya kawan-kawan kerja, yang nama-nya ada di-sbot dalam kitab hidop.

4Baik kamu slalu suka-hati dalam Tuhan: lagi s-kali sahya bilang, baik kamu suka-hati.

5Baik smoa orang dapat tahu fasal kamu punya tengkah-laku yang manis. Tuhan ada dkat.

6Jangan-lah khuatir fasal satu apa pun; ttapi dalam smoa perkara kasi-lah tahu kamu punya kahandak k-pada Allah dalam do'a dan perminta'an serta dngan mnguchap shukor.

7Dan sjahtra Allah, yang terlbeh deri-pada pngertian manusia, nanti jagakan kamu punya hati dan ingatan dalam Isa Almaseh.

8Pnghabisan skali, hei sudara-sudara, apa-apa yang bnar, apa-apa yang mulia, apa-apa yang adil, apa-apa yang suchi, apa-apa yang berknan, apa-apa yang manis; jikalau ada kbaikan, dan kalau ada kpujian, ingat-lah itu smoa.

9Apa-apa yang kamu sudah blajar, dan trima, dan dngar, dan tengok dalam sahya punya hal, itu smoa-lah baik kamu buat: dan Allah yang mmbri sjahtra nanti ada bersama-sama kamu.

10Ttapi sangat-lah sahya bersuka-suka dalam Tuhan, sbab skarang, s-kian lama ini, kamu sudah hidopkan kamu punya ingatan deri-hal sahya; dan dhulu pun kamu sudah ingat fasal itu, ttapi t'ada kamu dapat smpat.

11Bukan-nya sahya ada bilang bgini deri sbab kkurangan: kerna sahya sudah blajar baik apa macham pun sahya punya hal di situ-lah mnjadi puas.

12Sahya tahu jadi rndah; dan sahya tahu berlbeh-lbeh pun: dalam smoa perkara pun baik sahya sudah blajar hal knnyang dan hal lapar, hal berlbeh-lbeh dan hal kkurangan pun.

13Dalam Tuhan yang kuatkan sama sahya, smoa perkara pun sahya boleh buat.

14Dalam pada itu, baik juga kamu sudah ambil bhagian dalam ksusahan sahya.

15Dan kamu sndiri pun tahu, hei orang Filipi, yang bila injil mula-mula sudah di-khabarkan, ktika sahya bharu kluar deri Makadoniah, satu eklisia pun t'ada berskutu dngan sahya dalam hal mmbri dan trima, chuma kamu saja;

16kerna waktu sahya ada di Tisalonika pun kamu sudah kirim kerna sahya punya kkurangan, bukan satu kali.

17Bukan-nya sahya chari itu pmbrian; ttapi sahya ada chari buah yang bertambah-tambah k-pada kamu punya kira-kira.

18Ttapi sahya ada smoa perkara, dngan berlbeh-lbeh pula: ada chukop sama sahya, sdang sahya sudah trima deri tangan Ipafroditus smoa kamu punya kiriman, ia'itu satu bau yang wangi, satu persmbahan yang berknan, dan bawa ksuka'an k-pada Allah.

19Dan smoa kamu punya kkurangan pula sahya punya Allah, turut sperti kkaya'an-nya, nanti chukopkan dngan kmulia'an dalam Isa Almaseh.

20Mulia k-pada Bapa kita Allah sampai s-lama-lama-nya. Amin.

21Kasi tabek k-pada tiap-tiap orang kudus dalam Isa Almaseh. Sudara-sudara yang ada sama-sama sahya kirim tabek k-pada kamu.

22Smoa orang kudus kirim tabek k-pada kamu, terlbeh pula orang isi rumah Kaisar.

23Biar-lah anugrah Tuhan kita Isa Almaseh bersama-sama dngan kamu punya roh.



 <<  Filipi 4 >> 


Bahan Renungan: SH - RH - ROC
Download
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
© 2010-2019
Alkitab.SABDA.org

Android.SABDA.org
SABDA.mobi
Bantuan
Single Panel

Laporan Masalah/Saran