Alkitab Mobile SABDA
[VER] : [BABA]     [PL]  [PB] 
 <<  Ibrani 13 >> 

1Biar-lah kamu punya kaseh k-pada sudara-sudara mnjadi ttap.

2Jangan lupa tunjokkan kaseh k-pada orang-orang dagang; kerna bgini ada orang sudah sambot sama mla'ikat dngan t'ada tahu.

3Ingat-lah sama orang yang kna pasong, spertikan kamu pun kna pasong sama-sama; dan sama orang yang kna aniaya, spertikan kamu pun dalam hal badan lagi.

4Hal kahwin msti dapat hormat antara smoa orang, dan tmpat tidor jangan jadi najis: kerna orang chabol dan orang yang berzina, Allah nanti hukumkan.

5Jangan-lah kamu punya hati ingin wang; jadi-lah puas hati dngan apa-apa yang kamu ada: kerna dia sndiri sudah bilang, "Skali-kali t'ada sahya nanti lpaskan angkau, dan skali-kali t'ada sahya nanti tinggalkan angkau."

6Jadi dngan brani-hati kita kata, "Tuhan jadi sahya punya Pnolong; sahya t'ada nanti takot: Apa-kah manusia boleh buat sama sahya?"

7Ingat-lah sama orang-orang yang dhulu jadi kamu punya kpala, orang yang sudah katakan sama kamu perkata'an Allah; timbang-lah dia-orang punya kahidopan punya pnghabisan, dan turut dia-orang punya perchaya.

8Isa Almaseh itu sama juga, baik klmarin, baik ini hari, dan sampai s-lama-lama-nya.

9Jangan kna ssat oleh macham-macham punya ajaran yang bharu-bharu: kerna baik juga kalau hati di-ttapkan oleh anugrah; bukan-nya oleh makanan punya adat, kerna orang yang bawa diri sperti itu adat, t'ada apa fa'idah.

10Kita ada satu tmpat korban, yang deri-pada-nya orang yang buat khemah punya smbahyang t'ada kuasa makan.

11Kerna smoa itu binatang yang darah-nya di-bawa masok tmpat-kudus oleh imam kerna dosa, bangkai-nya kna hangus di luar tmpat sgala khemah.

12Sbab itu Isa pun, spaya dia boleh kuduskan orang bangsa itu oleh dia punya darah sndiri, sudah kna mati di luar pintu gerbang.

13Sbab itu baik kita kluar k-pada dia di luar tmpat sgala khemah, dan tanggong kchla'an-nya.

14Kerna di sini kita tidak ada satu negri yang kkal, ttapi kita chari negri yang mndatang.

15Sbab itu oleh Isa biar-lah kita slalu bawa satu persmbahan puji k-pada Allah, ia'itu buah yang di-kluarkan oleh sgala lidah yang mngaku nama-nya.

16Ttapi jangan kamu lupa buat baik dan bhagikan k-pada lain orang: kerna sama ini macham persmbahan Allah berknan.

17Turut-lah prentah orang-orang yang jadi kamu punya kpala, dan tundok: kerna dia-orang pun berjaga deri sbab kamu punya jiwa, sperti orang yang nanti kasi kira-kira; spaya dia-orang boleh buat ini kerja dngan ksuka'an, bukan dngan susah-hati: kerna bgini t'ada untong k-pada kamu.

18Minta-lah do'a kerna kita: sbab kita rasa tntu yang kita ada hati puteh, dan kita mau bawa diri kita baik-baik dalam smoa perkara.

19Dan terlbeh lagi sahya minta kamu buat ini, spaya sahya boleh di-pulangkan k-pada kamu lagi chpat.

20Biar-lah Allah, pohon sjahtra itu, yang sudah bawa gombala domba yang bsar itu kmbali deri antara orang-orang mati, ia'itu Tuhan Isa, dngan darah perjanjian yang kkal itu,

21kasi kamu jadi smpurna dalam smoa perkara yang baik, mau buat dia punya kahandak, dan biar dia jadikan dalam kita apa-apa yang berknan dpan dia oleh Isa Almaseh; dan mulia-lah k-pada dia sampai s-lama-lama-nya. Amin.

22Ttapi, hei sudara-sudara, sahya minta kamu sabarkan sahya punya perkata'an nasihat; kerna sahya sudah tulis k-pada kamu dngan pendek.

23Baik kamu tahu yang kita punya sudara Timotius sudah di-lpaskan; dan kalau dia datang dngan sgra, sahya nanti jumpa kamu sama-sama dia.

24Kasi tabek k-pada smoa orang yang mnjadi kamu punya kpala, dan smoa orang kudus. Orang-orang yang deri negri Itali kirim tabek k-pada kamu.

25Biar-lah anugrah Allah bersama-sama dngan kamu smoa. Amin.



 <<  Ibrani 13 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel Single Panel