1Dan rasul-rasul sama sudara-sudara yang ada di tanah Yahudiah dapat dngar yang orang bangsa-asing pun sudah trima perkata'an Allah.
2Dan bila Petrus sudah naik di Yerusalim, orang-orang yang pegang adat sunat berbantah sama dia,
3kata-nya "Angkau sudah masok dalam rumah orang yang t'ada bersunat, dan sudah makan sama-sama dia-orang."
4Ttapi Petrus mula'i trangkan itu hal sama dia-orang dngan aturan, dan kata,
5"Sahya dhulu ada berdo'a di negri Yafa, dan sahya naik pengsan, dan tengok satu pnglihatan, ia'itu satu barang turun, rupa-nya sperti slimut bsar, di-hulorkan deri langit deri ampat puncha-nya: dan itu sampai k-pada sahya.
6Dan sahya mrnong sama itu, serta perhatikan, dan sahya tengok binatang ampat-kaki, dan binatang yang liar, dan yang mrayap, dan burong-burong pun.
7Dan lagi sahya dngar satu suara yang kata sama sahya, 'Hei Petrus, bangun: smbleh-lah dan makan.'
8Ttapi sahya kata, 'Ta'boleh bgitu, Tuhan: kerna blum pernah barang yang haram atau najis masok mulut sahya.'
9Ttapi itu suara jawab deri langit nombor dua kali, 'Apa-apa yang Allah sudah suchikan jangan angkau haramkan:'
10dan ini sudah jadi tiga kali: dan smoa-nya sudah di-tarek balek naik k-langit.
11Dan itu juga ada tiga orang berdiri dpan rumah di mana kita ada, ia'itu orang-orang yang sudah di-hantarkan deri Kaisariah k-pada sahya.
12Dan Roh suroh sahya pergi sama dia-orang dngan t'ada shak hati lagi. Dan ini anam sudara pun sudah ikut sahya; dan kita masok itu orang punya rumah:
13dan dia khabarkan sama kita bagimana dia sudah tengok mla'ikat berdiri dalam dia punya rumah dan berkata, 'Suroh orang pergi Yafa, dan panggil Simon yang berglar Petrus;
14dia nanti katakan k-pada angkau perkata'an yang oleh-nya angkau boleh dapat slamat, angkau dan smoa angkau punya isi-rumah.'
15Bila sahya mula'i berchakap. Roh Alkudus turun atas dia-orang, sama sperti atas kita pun mula-mula.
16Dan sahya ingat Tuhan punya perkata'an bagimana dia kata, 'Yahya sudah baptiskan dngan ayer, ttapi kamu nanti di-baptiskan dngan Roh Alkudus.'
17Sbab itu, kalau Allah sudah kasi k-pada dia-orang sama juga punya pmbrian yang dia sudah kasi sama kita, pada ktika kita perchaya sama Tuhan kita Isa Almaseh, siapa-kah sahya ini yang sahya boleh tahankan Allah?"
18Dan bila dia-orang dngar ini hal, dia-orang diam-diam saja, dan muliakan Allah, serta kata, "Kalau bgitu, k-pada bangsa-asing pun Allah sudah kasi tobat yang bawa hidop."
19Sbab itu, orang-orang yang sudah terchrai-brai sbab aniaya yang datang deri kerna Stifanus, sudah berjalan sampai k-negri Foinike, dan Kuprus, dan Antakiah, dngan t'ada katakan perkata'an itu k-pada satu orang pun, chuma k-pada orang Yahudi saja.
20Ttapi antara itu orang ada juga orang Kuprus dan orang Kurini, yang datang di Antakiah dan berchakap k-pada orang Grik, dan khabarkan deri-hal Tuhan Isa.
21Dan Tuhan punya tangan ada bserta dngan dia-orang: dan banyak-lah bilangan orang yang perchaya yang berbalek k-pada Tuhan.
22Dan ini khabar deri-hal dia-orang sudah sampai di kuping eklisia yang di Yerusalim, dan dia-orang suroh Bar-nabas pergi sampai Antakiah:
23bila dia sampai, dan sudah tengok anugrah yang Allah sudah bri, dia suka hati; dan nasihatkan dia-orang smoa, spaya dngan ttap hati dia-orang boleh tinggal kata sama Tuhan:
24kerna Bar-nabas satu orang yang baik, dan pnoh dngan Roh Alkudus dan iman: dan banyak orang sudah di-tambahkan k-pada Tuhan.
25Dan dia kluar pergi Tarsus mau chari Sa'ul:
26dan bila sudah dapat sama dia, dia bawa pergi Antakiah. Jadi itu, ada satu tahun punya lama dia-orang dua-dua berhimpon sama-sama dngan eklisia itu, serta mngajar banyak orang: dan di Antakiah-lah murid-murid mula-mula sudah di-glarkan orang Kristen.
27Itu waktu ada brapa orang nabi-nabi turun deri Yerusalim pergi negri Antakiah.
28Dan ada satu orang deri antara itu nabi-nabi yang bernama Agabus, dia berdiri dan nyatakan dngan ktrangan Roh, yang nanti datang satu klaparan yang bsar di sluroh dunia: dan ini perkara sudah jadi pada jman Klaudius.
29Dan murid-murid tntukan mau kirim tolong k-pada sudara-sudara yang tinggal di Yahudiah, dngan s-brapa banyak masing-masing orang boleh kasi.
30Ini perkara dia-orang sudah buat, serta kirimkan pertolongan-nya k-pada ktua-ktua oleh tangan Bar-nabas dan Sa'ul.
<< Kisah Para Rasul 11 >>
Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel