1Ada orang datang deri Yahudiah yang mngajar sudara-sudara itu, kata-nya, "Jikalau kamu t'ada di-sunatkan sperti adat Musa, ta'boleh-lah kamu dapat slamat."
2Antara Paulus dan Bar-nabas dngan ini orang, bukan sdikit ta'stujuan dan perbantahan sudah jadi, sampai sudara-sudara itu tntukan Paulus sama Bar-nabas, dan lain-lain orang deri antara-nya, mau pergi Yerusalim k-pada rasul-rasul dan ktua-ktua, dan tanya deri-hal ini perkara yang dia-orang bantahkan.
3Itu dua rasul sudah-lah eklisia itu hantarkan pergi, dan dia-orang berjalan trus Foinike dan Samariah, dan khabarkan deri-hal orang bangsa-asing sudah berbalek masok agama: dan ini kasi sudara-sudara di situ ksuka'an yang bsar.
4Bila sampai di Yerusalim, eklisia dan rasul-rasul sama ktua-ktua sambot sama dia-orang, dan dia-orang chritakan sgala perkara yang Allah sudah jadikan dngan dia-orang.
5Dan ada orang deri-pada orang Farisi punya kampongan yang sudah perchaya, dia-orang berdiri dan kata, "Patut sunatkan orang bangsa-asing, dan suroh turut hukum-taurit Musa."
6Dan rasul-rasul sama ktua-ktua berhimpon man preksa deri-hal ini perkara.
7Bila orang sudah banyak berbantah, Petrus berdiri dan kata sama dia-orang, "Sudara-sudara, kamu sudah tahu bagimana deri dhulu Allah sudah pileh di antara kamu yang oleh mulut sahya orang bangsa-asing boleh dngar perkata'an injil dan perchaya.
8Dan Allah, yang tahu hati manusia, sudah bersaksi atas dia-orang, dalam hal dia kasi k-pada dia-orang Roh Alkudus, sama sperti k-pada kita:
9dan t'ada dia bedakan kita deri-pada dia-orang, dalam hal dia chuchikan dia-orang punya hati oleh perchaya.
10Sbab itu knapa kamu skarang mau choba Allah, dngan knakan di lehir murid-murid itu satu kok yang bukan sahaja kita punya nenek-moyang, ttapi kita pun ta'boleh tanggong?
11Ttapi kita perchaya yang kita boleh dapat slamat chuma oleh anugrah Tuhan Isa, sama sperti dia-orang juga."
12Dan smoa orang-banyak diam-diam; dan dia-orang dngar Paulus sama Bar-nabas chritakan tanda-tanda dan perkara hairan yang Allah sudah jadikan di antara orang bangsa-asing oleh dia-orang dua-dua.
13Bila dia-orang sudah habis berchakap, Yakob pula jawab, dan kata, "Sudara-sudara, dngar-lah sama sahya:
14Simon sudah chritakan bagimana mula-mula Allah sudah mlawat orang bangsa-asing, spaya ambil deri-pada-nya satu bangsa kerna dia punya nama.
15Dan perkata'an nabi-nabi s-tuju dngan ini: kerna ada tersurat,
16Kmudian deri-pada ini sahya nanti balek, Dan sahya nanti naikkan s-mula khemah Da'ud yang sudah ruboh, Dan sahya nanti naikkan s-mula pchah-pchahan-nya, Dan sahya nanti berdirikan itu:
17Spaya orang lain pula boleh chari sama Tuhan, Dan orang bangsa-asing pun, yang di-namakan dngan nama sahya,
18Kata Tuhan, yang bri tahu deri-hal ini perkara-perkara deri asal dunia.'
19Sbab itu sahya punya bichara, jangan kita kasi susah orang deri-pada bangsa-asing yang berbalek k-pada Tuhan;
20ttapi biar kita kirim surat k-pada dia-orang, suroh jauhkan diri-nya deri-pada apa-apa yang najis sbab datok, dan deri-pada zina, dan daging binatang yang mati lmas, dan deri-pada darah.
21Kerna Musa deri-pada jman dhulu-dhulu ada orang dalam tiap-tiap negri yang ajar fasal dia, dan taurit-nya di-bacha tiap-tiap hari-perhentian dalam rumah-rumah smbahyang."
22Kmdian pada fikiran rasul-rasul dan ktua-ktua, dngan s-gnap eklisia, baik pileh orang deri-pada diri-nya, dan suroh pergi Antakiah sama-sama Paulus dan Bar-nabas; ia'itu Yudas yang berglar Bar-sabbas, dan Silas, yang jadi kpala-kpala antara murid-murid:
23dan bgini-lah bunyi surat yang dia-orang kirim dngan itu dua orang punya tangan: "Rasul-rasul dan sudara-sudara yang jadi ktua-ktua kirim tabek k-pada sudara-sudara deri-pada bangsa-asing yang ada di Antakiah, dan di tanah Suriah dan Kilikiah;
24kita sudah dngar ada orang yang kluar deri antara kita sudah kachaukan kamu dngan perkata'an-nya, dan balekkan hati kamu, orang yang kita t'ada psan,
25sbab itu, bila kita sudah s-tuju, pada fikiran kita baik pileh orang dan suroh dia pergi k-pada kamu sama-sama Bar-nabas dan Paulus yang kita kaseh,
26ia'itu orang yang sudah srahkan nyawa-nya kerna nama Tuhan kita Isa Almaseh.
27Sbab itu kita ada hantarkan Yudas dan Silas, yang sndiri nanti katakan ini perkara juga dngan mulut-nya.
28Berknan-lah k-pada Roh Alkudus dan k-pada kita, jangan kita ltak atas kamu tanggongan yang lbeh brat deri-pada ini iau-kin punya perkara;
29ia'itu, jauhkan-lah diri kamu deri-pada lauk datok, dan deri-pada darah, dan deri-pada daging binatang yang mati lmas, dan deri-pada zina; dan kalau kamu jaga kamu punya diri deri-pada ini smoa, baik juga perbuatan kamu. Tabek kamu smoa."
30Jadi itu, bila dia-orang sudah di-lpaskan dia-orang turun pergi Antakiah: dia-orang himponkan orang-banyak, dan kasikan itu surat.
31Dan bila sudah bacha, smoa-nya suka-hati sbab pnghiburan-nya.
32Dan Yudas sama Silas, sbab dia-orang pun nabi-nabi, nasihatkan sudara-sudara itu dngan banyak perkata'an, dan ttapkan dia-orang.
33Bila itu dua orang sudah tinggal sana sikit lama, dia-orang sudah di-lpaskan dngan slamat deri-pada sudara-sudara k-pada orang yang sudah hantarkan dia.
34[KOSONG]
35Ttapi Paulus sama Bar-nabas lagi tinggal di Antakiah, dan dngan banyak orang lain dia-orang mngajar dan khabarkan perkata'an Tuhan.
36Sikit hari kmdian Paulus kata sama Bar-nabas, "Skarang baik kita balek, dan mlawat sudara-sudara itu dalam tiap-tiap negri di mana kita sudah khabarkan perkata'an Tuhan, dan lihat bagimana hal-nya."
37Bar-nabas punya fikir mau ajat Yahya yang di-glarkan Markus ikut dia-orang.
38Ttapi Paulus punya bichara ta'patut ajat dia itu yang sudah undor deri-pada dia-orang di Pamfuliah, dan t'ada ikut dia-orang buat pkerja'an itu.
39Sudah-lah jadi satu pertngkaran, sampai itu dua orang berchrai s'orang s-tmpat, dan Bar-nabas ajat Markus blayer pergi Kuprus:
40ttapi Paulus pileh Silas, dan bila sudara-sudara sudah srahkan dia k-pada anugrah Tuhan, dia berjalan pergi.
41Dan dia jalan trus tanah Suriah dan Kilikiah, serta ttapkan sgala eklisia.
<< Kisah Para Rasul 15 >>
Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan