Alkitab Mobile SABDA
[VER] : [BABA]     [PL]  [PB] 
 <<  Kisah Para Rasul 19 >> 

1Dan sudah jadi, ktika Apollos ada di Korintus, Paulus berjalan trus tanah-tanah sblah hulu, dan sampai di Ifisus, serta berjumpa ada brapa anak-murid:

2dan dia kata sama dia-orang, "Sudah-kah kamu trima Roh Alkudus bila kamu perchaya?" Dan dia-orang jawab, "Blum juga kita dngar kalau ada Roh Alkudus skali pun."

3Dan dia kata, "Kalau bgitu, k-dalam baptisan yang mana-kah kamu sudah di-baptiskan?" Dia-orang jawab, "K-dalam baptisan Yahya."

4Dan Paulus kata, "Yahya sudah baptiskan orang dngan baptisan tobat, serta sudah kata k-pada bangsa itu yang dia-orang patut perchaya dia itu yang nanti datang kmdian deri-pada dia, ia'itu Isa."

5Bila dia-orang dngar ini, dia-orang sudah di-baptiskan k-dalam nama Tuhan Isa.

6Bila Paulus sudah taroh dia punya tangan atas dia-orang, Roh Alkudus datang atas dia-orang; dan smoa-nya berchakap dngan bhasa lain-lain, serta bernabuat.

7Smoa-nya ada kira-kira dua-blas orang punya banyak.

8Dan Paulus masok rumah smbahyang, serta berchakap dngan brani ada tiga bulan punya lama: dia berrondeng dan nasihatkan orang deri-hal perkara kraja'an Allah.

9Ttapi bila ada orang kraskan dia punya hati dan t'ada mau perchaya, serta chakap jahat deri-hal Jalan itu di dpan orang-banyak, Paulus undur deri dia-orang, dan asingkan murid-murid itu, serta berrondeng s-hari-hari dalam Turanus punya skola.

10Dan bgini sudah jadi ada dua tahun punya lama, sampaikan smoa orang yang tinggal di tanah Asiah sudah dngar perkata'an Tuhan, baik orang Yahudi, baik orang Grik pun.

11Dan Allah sudah jadikan bukan s-barang punya m'ujizat oleh Paulus punya tangan:

12sampaikan orang bawa pulang k-pada orang sakit sapu-tangan atau kain yang sudah kna Paulus punya badan, dan pnyakit-nya hilang, serta jin yang jahat pun kluar.

13Ttapi ada pula orang Yahudi yang berjalan sana-sini dngan pakai obat-guna, dia-orang masok tangan mau pakai Tuhan Isa punya nama atas orang-orang yang terkna jin, serta kata, "Sahya pakai sumpah atas kamu dngan nama Isa yang Paulus khabarkan."

14Dan ada satu orang Yahudi, bernama Skawa, imam-bsar, dia punya tujoh anak-jantan buat bgini.

15Ttapi itu jin yang jahat jawab, "Isa sahya knal, Paulus pun sahya tahu, ttapi kamu siapa?"

16Dan itu orang yang terkna itu jin yang jahat serbu sama dia-orang, dan kalahkan dua-dua, dan lawan kuat-kuat, sampaikan dia-orang lari kluar rumah dngan tlanjang dan berluka.

17Ini perkara sudah jadi mashhur antara smoa orang Yahudi dan orang Grik pun yang tinggal di Ifisus; satu ktakotan sudah datang atas sklian-nya, dan nama Tuhan Isa pun di-muliakan.

18Lagi pun ada banyak orang yang sudah perchaya datang, sambil mngaku dan nyatakan sgala perbuatan-nya.

19Dan bukan sikit orang yang pakai obat-guna kumpolkan smoa dia-orang punya buku-buku, dan bakarkan di dpan sgala orang: dan bila sudah hitong, dia-orang dapat tahu yang itu smoa punya herga ada lima-laksa wang perak.

20Sampai bgini punya kuasa perkata'an Tuhan sudah bertambah-tambah, dan mnang.

21Bila ini perkara-perkara sudah habis, Paulus niat dalam hati mau lalu trus Makadoniah dan Akhayah, pergi Yerusalim, kata-nya, "Bila sahya sudah sampai sana, sahya msti pergi tengok Rom pula."

22Dan bila dia sudah suroh dua orang pnolong-nya pergi Makadoniah, ia'itu Timotius sama Irastus, dia sndiri tinggal di Asiah lagi sikit lama.

23Dkat itu waktu sudah jadi bukan sikit bsar punya gadoh deri-hal Jalan itu.

24Kerna ada satu tukang-perak, nama Demetrius, yang bikin Artimis punya rumah-rumah-datok deri perak, dan bawa banyak pncharian sama tukang-tukang-nya:

25dia ini kumpolkan dia punya tukang smoa, dan lain-lain tukang yang sama pncharian-nya, serta kata, "Inche'-inche' smoa tahu yang dngan ini pncharian-lah kita dapat untong.

26Skarang kamu tengok dan dngar bagimana bukan saja di Ifisus, ttapi hampir-hampir dalam sluroh tanah Asiah pun ini Paulus sudah pujok dan balekkan banyak orang punya hati, dan bilang uang apa-apa tangan manusia buat itu bukan datok-datok:

27jadi, bukan saja takot kita punya pkerja'an ini nanti dapat nama ta'baik; ttapi takot rumah Artimis datok yang bsar itu pun nanti di-hinakan, sampaikan itu datok pun nanti hilang dia punya kbsaran, dia yang satu tanah Asiah dan satu dunia punya orang ada smbah."

28Bila dia-orang dngar ini, sangat-lah marah dia-orang punya hati, dan dia-orang bertriak, "Bsar-lah Artimis, datok orang Ifisus."

29Dan itu negri pnoh dngan gadoh, dan bila dia-orang sudah tangkap Gayus sama Aristarkus, orang Makadoniah yang berjalan sama Paulus, dia-orang serbu masok panggong-wayang dngan satu hati.

30Dan Paulus punya maksud mau masok mnghadap itu orang-banyak, ttapi murid-murid t'ada kasi dia.

31Lagi pun ada pnghulu-pnghulu tanah Asiah yang bersohbat sama Paulus, dia-orang suroh orang k-pada dia, minta dia jangan brani masok panggong-wayang.

32Sbab itu ada orang bertriak kata bgini, ada orang pula kata bgitu, kerna itu perkumpolan sudah jadi kachau; dan kbanyakan orang ta'tahu apa sbab-nya dia-orang sudah berkumpol.

33Dan orang kasi kluar Iskandar deri antara orang banyak, orang Yahudi juga tolakkan dia k-dpan. Dan Iskandar lambai tangan, maksud-nya mau kasi jawab sama orang banyak.

34Ttapi bila dia-orang tahu dia satu orang Yahudi, smoa-nya dngan satu suara bertriak-triak, dkat dua jam punya lama, "Bsar-lah Artimis, datok orang Ifisus."

35Bila juru-tulis negri itu sudah kasi diam sama orang-banyak, dia kata, "Hei orang Ifisus, siapa yang ta'tahu bagimana negri orang Ifisus ini-lah yang mnjaga Artimis yang bsar punya rumah smbahyang, dan patong yang sudah turun deri-pada Zius?

36Sbab ini perkara smoa ta'boleh di-sangkalkan, kamu patut diam-diam, dan jangan buat apa-apa dngan gopoh.

37Kerna kamu sudah bawa sini ini orang-orang yang bukan-nya orang yang samon rumah-datok, dan bukan mngumpat kita punya datok.

38Sbab itu kalau Demetrius dan tukang-tukang yang ada sama dia ada perkara atas siapa-siapa, itu-tah kort ada terbuka, dan hakim-hakim pun ada: biar dia-orang mnd'awa satu sama lain.

39Ttapi kalau kamu chari perkara yang lain, itu boleh bichara di tmpat-bichara yang sperti hukum.

40Kerna takot kita ini nanti kna d'awa deri-hal ini hari punya gadoh, yang sudah jadi dngan t'ada sbab-nya: dalam itu perkara kita ta'boleh kasi jawab deri-hal ini perkumpolan."

41Bila dia sudah chakap bgini, dia kasi perhimponan itu pergi.



 <<  Kisah Para Rasul 19 >> 


Bahan Renungan: SH - RH - ROC
Download
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
© 2010-2019
Alkitab.SABDA.org

Android.SABDA.org
SABDA.mobi
Bantuan
Single Panel

Laporan Masalah/Saran