Alkitab Mobile SABDA
[VER] : [BABA]     [PL]  [PB] 
 <<  Kisah Para Rasul 2 >> 

1Dan bila hari Pentekosta sudah sampai, smoa-nya ada bersama-sama dalam satu tmpat.

2Tiba-tiba datang satu bunyi deri langit sperti angin kras yang mndru, dan satu rumah itu di mana dia-orang dudok jadi pnoh dngan itu bunyi.

3Dan ternampak pada dia-orang lidah-lidah yang berblah-blah, sperti lidah api; dan itu dudok di atas dia-orang masing-masing.

4Dan smoa-nya di-pnohkan dngan Roh Alkudus, dan mula'i berchakap dngan lain-lain bhasa, s-bagimana Roh itu kasi dia-orang mnguchap.

5Di Yerusalim ada tinggal orang Yahudi yang berbakti, dan yang datang deri-pada sgala bangsa di bawah langit.

6Dan bila orang dngar itu bunyi, orang-banyak berhimpon, dan jadi bingong, sbab masing-masing-nya dngar dia-orang chakap dngan bhasa masing-masing.

7Smoa-nya terpranjat dan hairan, kata-nya "Tengok, bukan-kah smoa orang yang berchakap ini orang Galil?

8Dan bagimana kita dngar, masing-masing dngan bhasa sndiri, di mana kita di-peranakkan?

9ia'itu orang Partiah dan Madiah, dan orang Ilam, dan orang yang tinggal di Masopotamiah, dan Yahudiah, dan Kappadokiah, dan Pontus, dan Asiah,

10dan Frugiah dan Pamfuliah, dan Masir, dan sgala jajahan Libuah yang dkat Kurini, dan orang dagang deri Rom, ia'itu orang Yahudi dan orang mu'alaf pun,

11orang Kriti dan orang Arab, kita dngar dia-orang chakap dngan bhasa kita deri-hal perbuatan Allah yang bsar itu."

12Smoa-nya terpranjat dan bimbang hati, dan kata sama lain, "Apa arti perkara ini?"

13Ttapi lain orang tertawakan dia, kata-nya, "Ini orang ada pnoh dngan ayer anggor yang manis."

14Ttapi Petrus berdiri sama-sama s-blas rasul itu, dan bsarkan suara-nya, serta berkata sama dia-orang, "Hei orang Yahudi dan smoa orang yang tinggal di Yerusalim, biar-lah kamu tahu perkara ini dan pasang kuping k-pada perkata'an sahya.

15Kerna ini orang bukan mabok, sperti kamu sangka, sbab ini bharu pukol smbilan pagi;

16ttapi ini-lah perkara yang nabi Yo'el sudah kata:

17'Pada jman yang kmdian skali nanti jadi,' Allah kata, 'Sahya nanti churahkan deri-pada Roh sahya atas smoa manusia: Dan anak-anak-mu jantan dan prempuan nanti bernabuat, Kamu punya orang muda-muda nanti tengok pnglihatan, Dan orang tua-tua pun mnimpi-nimpi:

18Dan lagi atas sahya punya hamba jantan dan prempuan pada jman itu, Sahya nanti churahkan deri-pada Roh sahya, dan smoa-nya nanti bernabuat.

19Sahya nanti buat perkara yang hairan pada langit di atas, Dan tanda-tanda pada bumi di bawah; Darah dan api dan wap asap:

20Matahari nanti berobah mnjadi glap, Dan bulan mnjadi darah, S-blum datang Tuhan punya hari Yang bsar dan mashhur itu:

21Dan nanti jadi, barang siapa yang triak nama Tuhan nanti di-slamatkan.'

22Hei orang Isra'el dngar-lah ini perkata'an: Isa orang Nasarat, satu orang yang Allah sudah tntukan dngan bbrapa m'ujizat dan perkara yang hairan dan tanda-tanda pun, yang Allah sudah buat oleh dia di antara kamu, sperti kamu sndiri tahu;

23dia-lah, yang sudah di-srahkan dngan kahandak dan pngtahuan Allah, kamu sudah salibkan dan sudah bunoh dngan tangan orang jahat:

24dan Allah sudah bangkitkan dia, serta lpaskan dia deri-pada sngsara kmatian; sbab kmatian ta'boleh tahankan dia.

25Kerna Da'ud kata deri-hal dia, 'Sahya sudah tengok Tuhan slalu di hadapan muka sahya; Kerna dia-lah di sblah kanan sahya, spaya jangan sahya di-grakkan:

26Sbab itu hati sahya bersuka, dan lidah sahya bersorak; Lagi pun badan sahya nanti tinggal dalam harap:

27Sbab Tuhan ta'mau tinggalkan jiwa sahya dalam alam-maut, Dan tiada Tuhan nanti biarkan Yang Kudus-mu itu mnjadi busok.

28Tuhan sudah kasi tahu sama sahya jalan kahidopan; Dan Tuhan nanti pnohkan sahya dngan ksuka'an dpan muka Tuhan.'

29Hei sudara-sudara sahya boleh chakap trang sama kamu deri-hal kita punya nenek-moyang Da'ud, yang dia sudah mati dan sudah tanam, dan dia punya kubur ada sama kita sampai ini hari.

30Sbab itu dalam hal dia satu nabi, dan sudah tahu Allah sudah bersumpah k-pada-nya yang dia nanti dudokkan satu orang deri-pada kturunan-nya di atas takhta kraja'an-nya;

31dia sudah tengok dhulu, dan sudah chakap deri-hal kbangkitan Almaseh, yang bukan dia di-tinggalkan dalam alam-maut dan bukan badan-nya jadi busok.

32Ini Isa juga yang Allah sudah bangkitkan, dan kita smoa jadi saksi-nya.

33Sbab itu dalam hal dia sudah di-tinggikan oleh tangan kanan Allah, dan sudah trima deri-pada Bapa perjanjian Roh Alkudus, dia sudah churahkan ini yang kamu tengok dan dngar.

34Kerna bukan Da'ud sudah naik k-shorga, ttapi dia sndiri kata, 'Tuhan sudah kata sama sahya punya tuan, "Dudok-lah di sblah kanan sahya,

35Sampai sahya taroh angkau punya musoh-musoh jadi alas kaki-mu."'

36Sbab itu biar-lah smoa isi-rumah Isra'el tahu dngan tntu yang Allah sudah jadikan dia Tuhan dan Almaseh, ia'itu Isa yang kamu sudah salibkan."

37Bila dia-orang dngar, dia-orang tertikam dalam hati, dan kata sama Petrus dan lain-lain rasul, "Sudara-sudara, apa patut kita buat?"

38Dan Petrus kata sama dia-orang, "Bertaubat-lah, dan masing-masing trima baptis dalam nama Isa Almaseh kerna ampun dosa-dosa-mu; dan kamu nanti trima pmbrian Roh Alkudus.

39Kerna perjanjian itu sbab kamu, dan sbab anak-anak kamu, dan sbab smoa orang yang jauh-jauh pun, s-brapa yang Tuhan kita Allah nanti panggil."

40Dan Petrus bersaksi dngan banyak perkata'an yang lain lagi, dan nasihatkan dia-orang, kata-nya, "Slamatkan-lah diri kamu deri-pada bangsa yang bengkok ini."

41Smoa orang yang suka trima perkata'an-nya sudah di-baptiskan; dan pada hari itu juga ada kira-kira tiga ribu orang di-tambahkan pada-nya.

42Dan dia-orang tinggal ttap dalam pngajaran rasul-rasul, dan perskutuan, dan mmchah roti, dan mminta do'a.

43Dan ktakotan datang atas tiap-tiap orang: dan banyak perkara hairan dan tanda-tanda pun sudah di-buat oleh rasul-rasul.

44Dan smoa orang yang perchaya ada bersama-sama, dan apa-apa yang dia-orang ada jadi perskutuan punya;

45dan dia-orang jualkan herta-bnda-nya, dan bhagikan pada smoa-nya, s-kadar kkurangan masing-masing.

46Dan s-hari-hari dia-orang tinggal ttap dngan satu hati dalam ka'abah, dan mmchah roti di rumah, serta trima jerki-nya dngan suka-chita dan tulus hati,

47dan dia-orang puji Allah, dan jadi berknan k-pada smoa orang bangsa itu. Dan s-hari-hari Tuhan tambahkan pada bilangan-nya orang yang dapat slamat.



 <<  Kisah Para Rasul 2 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel Single Panel