1Dan Paulus mrnong sama majlis bichara itu, dan kata, "Sudara-sudara, dngan puteh hati sahya sudah ikut hukum Allah sampai ini hari."
2Dan imam-bsar Hananiah suroh orang yang berdiri dkat Paulus tampar mulut-nya.
3Habis itu, Paulus kata sama dia, "Allah nanti tampar sama angkau pula, hei angkau tembok yang chat puteh: ada-kah angkau dudok sini mau hukumkan sahya sperti hukum-taurit? dan angkau pula langgar hukum-taurit suroh tampar sama sahya?"
4Dan orang yang berdiri situ kata, "Angkau maki Allah punya imam-bsar-kah?"
5Paulus jawab, "Sudara-sudara, sahya ta'tahu dia itu imam-bsar: kerna ada tersurat, 'Jangan-lah angkau chakap jahat fasal orang yang prentahkan angkau punya bangsa.'"
6Ttapi bila Paulus dapat tahu yang dia-orang sparoh orang Saduki dan sparoh orang Farisi, dia bertriak antara itu majlis, "Sudara-sudara, sahya ini orang Farisi, dan anak orang Farisi: deri-hal harap dan kbangkitan orang mati itu sahya ada kna bichara."
7Bila dia sudah chakap bgini, jadi satu perslisehan di antara orang Farisi sama orang Saduki: dan itu perkumpolan berbhagi dua.
8Kerna orang Saduki kata tidak ada kbangkitan orang mati, dan mla'ikat dan jin pun t'ada: ttapi orang Farisi pula mngaku ada dua-dua.
9Dan sudah jadi satu gadoh yang bsar: dan ada orang pnulis deri orang Farisi punya bhagian bangun, serta mlawan kuat-kuat, dan kata, "Kita t'ada dapat satu pun ini orang punya salah: apa pula kalau satu jin sudah berchakap sama dia, atau satu mla'ikat?"
10Bila itu perslisehan sudah jadi terlalu bsar, sampaikan itu panglima naik takot barangkali dia-orang nanti koyakkan sama Paulus, dia suroh soldado turun rampas dia deri antara dia-orang, dan bawa dia masok kota.
11Itu malam juga Tuhan berdiri sblah dia, serta kata, "Ttapkan angkau punya hati: kerna sperti angkau sudah bersaksi atas sahya di Yerusalim, bgitu juga angkau msti bersaksi di Rom pun."
12Bila sudah siang, orang Yahudi berpakat, dan bersumpah kalau blum bunoh sama Paulus dia-orang ta'mau makan atau minum.
13Orang yang pakat dngan ini sumpah smoa-nya ada lbeh ampat-puloh orang.
14Dia ini smoa mnghadap kpala-kpala imam dan orang tua-tua, serta kata, "Kita sudah bikin satu bsar punya sumpah, kita ta'mau kchap satu apa pun s-blum kita bunoh sama Paulus.
15Sbab itu skarang baik kamu sama-sama majlis bichara itu kasi khabar sama itu panglima spaya dia boleh bawa turun dia itu k-pada kamu, buat-buat sperti kamu mau preksa deri-hal dia punya kesah dngan lbeh btul lagi: dan kita sudah siap mau bunoh sama dia s-blum dia sampai di situ."
16Ttapi Paulus punya sudara prempuan punya anak sudah dngar dia-orang mau mngadang, dan dia datang masok kota kasi Paulus tahu.
17Dan Paulus panggil satu hulubalang, dan kata, "Bawa ini orang muda pergi sama itu panglima, kerna dia ada sikit perkara mau kata sama dia."
18Jadi itu, dia ambil itu orang muda dan bawa dia dpan panglima, serta kata, "Paulus, orang pnjara itu sudah panggil sama sahya, dan minta sahya bawa ini orang muda k-pada tuan, kerna dia ada sikit perkara mau kata sama tuan."
19Itu panglima pegang tangan-nya, dan bawa dia k-pada satu tmpat yang sunyi, serta tanya sama dia, "Apa itu yang angkau mau bilangkan sahya?"
20Dia kata, "Orang Yahudi sudah pakat mau minta tuan bawa Paulus pergi mnghadap majlis bichara itu besok, buat-buat sperti tuan mau preksa lbeh btul lagi fasal dia.
21Ttapi jangan tuan ikut dia-orang punya suka: kerna antara itu orang ada lbeh ampat-puloh orang mngadang sama dia, dia ini smoa sudah bersumpah ta'mau makan atau minum s-blum dia-orang bunoh sama dia: dan skarang juga dia smoa sudah siap, chuma nantikan tuan punya janji bgini."
22Jadi, itu panglima kasi itu orang muda pergi, serta psan dia, "Jangan kata satu orang pun yang angkau sudah bilangkan sahya ini smoa."
23Dan dia panggil dua hulubalang, dan kata, "Sdiakan dua-ratus soldado mau pergi Kaisariah, dngan tujoh-puloh orang berkuda, dan dua-ratus orang bertombak, ini malam pukol smbilan."
24Dan dia suroh sdiakan brapa ekor punya binatang-tunggangan mau kasi Paulus dudok, dan bawa k-pada tuan gobernor Felek dngan slamat.
25Dan dia tulis satu surat bunyi-nya bgini:
26"Tabek deri-pada sahya Klaudius Lusias, k-pada tuan gobernor Felek yang sangat mulia.
27Ini orang sudah kna tangkap oleh orang Yahudi, dan ktika dia hampir kna bunoh sahya sudah serbu sama smoa-nya dan slamatkan dia ini, sbab sahya sudah dapat tahu yang dia anak Rom.
28Dan sbab sahya mau tahu apa sbab-nya dia-orang d'awa sama dia, sahya bawa dia turun mnghadap dia-orang punya majlis bichara:
29dan sahya dapat tahu yang dia sudah kna d'awa atas bbrapa perbantahan deri-hal dia-orang punya hukum-taurit, ttapi dia t'ada kna d'awa apa-apa yang dia patut mati atau kna pasong.
30Bila orang sudah kasi sahya tahu yang ada satu pakatan atas ini orang, sahya lkas hantarkan dia k-pada tuan, serta psan orang-orang yang d'awa sama dia suroh d'awa dpan tuan."
31Sbab itu, sperti sudah di-psan, itu soldado-soldado ambil Paulus, dan bawa dia pergi Antipatris tempo malam.
32Ttapi besok-nya soldado-soldado kasi orang-orang berkuda berjalan sama Paulus, dan dia-orang pulang kota:
33bila sampai Kaisariah, orang berkuda itu srahkan itu surat k-pada tuan gobernor, habis itu dia-orang kasi Paulus pula mnghadap sama dia.
34Bila dia sudah habis bacha itu surat, dan sudah tanya deri negri mana dia itu, dan sudah dapat tahu yang dia satu orang Kilikiah,
35dia kata, "Sahya nanti dngar angkau punya kesah bila orang-orang yang d'awa angkau sudah mari." Dan dia suroh orang jaga sama dia dalam Herodis punya istana.
<< Kisah Para Rasul 23 >>
Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel