1Deri-pada Paulus, rasul Isa Almaseh dngan kahandak Allah, dan deri-pada sudara kita Timotius,
2datang k-pada sgala orang kudus dan sudara-sudara yang stia dalam Almaseh di Kolosi: biar-lah datang anugrah k-pada kamu dan sjahtra pun deri-pada Bapa kita Allah.
3Kita mnguchap shukor k-pada Allah, Bapa Tuhan kita Isa Almaseh, dan kita slalu berdo'a kerna kamu,
4deri-pada waktu kita dngar deri-hal kamu punya perchaya dalam Isa Almaseh, dan deri-hal kaseh yang kamu ada k-pada sgala orang kudus,
5deri sbab harapan yang ada tersimpan kerna kamu di shorga, sperti dhulu kamu sudah dngar dalam pngajaran deri-hal kbtulan injil,
6yang sudah datang sampai kamu; sama sperti sudah ada dalam sluroh dunia, ia'itu ada kluarkan buah dan bertambah-tambah, sperti yang ada di antara kamu pun, deri-pada waktu kamu dngar dan tahu anugrah Allah dalam kbtulan itu;
7sama sperti kamu sudah blajar deri-pada Ipafras, kkaseh kita yang jadi hamba sama-sama kita, dan dia pun mnjadi Almaseh punya playan yang stia kerna kita,
8dan dia-lah juga yang sudah chritakan k-pada kita fasal kamu punya kaseh dalam Roh.
9Sbab itu, deri-pada waktu kita sudah dngar bgini, t'ada-lah kita brenti minta do'a kerna kamu, serta minta spaya kamu boleh di-pnohkan dngan pngtahuan deri-hal kahandak Allah, dngan s-habis-habis bijaksana dan pngertian yang rohani,
10spaya klakuan kamu boleh mnjadi s-padan dngan Tuhan, mau jadi berknan k-pada dia dalam smoa perkara, sambil kamu kluarkan buah dalam tiap-tiap pkerja'an yang baik, dan bertambah-tambah sbab kamu tahu Allah;
11serta di-kuatkan dngan s-chukop kkuatan sperti kuasa kmulia'an-nya, spaya bawa s-habis-habis sabar dan panjang-hati dngan ksuka'an pun;
12sambil kamu mnguchap shukor k-pada Bapa kita, yang sudah bikin kita layak dapat bhagian psaka orang-orang kudus dalam trang itu;
13dan dia-lah yang sudah lpaskan kita deri-pada kuasa glap itu, dan sudah pindahkan kita pula masok kraja'an Anak-nya yang kkaseh;
14dan oleh-nya kita dapat itu tbusan, ia'itu ampunan dosa-dosa kita:
15dan dia-lah rupa Allah yang t'ada nampak, dan Anak-sulong di antara sgala kjadian;
16kerna dalam-nya sgala perkara sudah di-jadikan, baik yang di langit, baik yang di atas bumi, baik yang boleh nampak, baik yang ta'boleh nampak, baik kraja'an, baik prentahan, baik hukum, baik kuasa; smoa-nya sudah di-jadikan oleh dia dan kerna dia;
17dan dia pun terdhulu deri-pada sklian perkara, dan smoa perkara jadi ttap dalam dia.
18Dan dia pun mnjadi kpala eklisia, ia'itu badan-nya: dan dia-lah permula'an, dan anak-sulong deri antara orang-orang mati; spaya dalam sgala perkara dia-lah boleh jadi pertama skali.
19Kerna sudah-lah berknan k-pada Allah yang sgala ksmpurna'an itu boleh terhimpon di dalam Anak-nya;
20dan oleh dia mau di-damaikan sgala perkara dngan diri-nya sndiri, bila dia sudah mmbawa sjahtra oleh darah-nya di kayu salib; ya, oleh dia-lah, baik perkara yang di atas bumi, baik perkara yang di langit pun.
21Dan kamu pun, yang dhulu di-asingkan dan mnjadi musoh dalam ingatan kamu, dan dalam perbuatan kamu yang jahat, ttapi skarang dia sudah damaikan
22dalam badan manusia-nya dngan kmatian, spaya boleh mnghadapkan kamu kudus dan t'ada berchla dan t'ada bersalah di dpan dia sndiri:
23ia'itu kalau kamu kkal dalam perchaya, dngan tgoh dan dngan ttap, dan t'ada di-pindahkan deri-pada pngharapan injil yang kamu sudah dngar, dan yang sudah di-khabarkan di antara sgala kjadian di bawah langit; dan sahya ini Paulus sudah di-jadikan playan-nya.
24Dan skarang sahya bersuka-suka sbab smoa perkara yang sahya kna tahan kerna kamu, dan ksusahan Almaseh yang lagi ada terkurang sahya chukopkan dalam diri sahya sbab badan-nya, ia'itu eklisia;
25dan sahya sudah di-jadikan playan eklisia itu, sperti tanggongan yang Allah sudah srahkan k-pada sahya kerna kamu, spaya sahya boleh habis mngajar perkata'an Allah,
26ia'itu ruhsia yang sudah tersmbunyi deri-pada sgala jman dan kturunan; ttapi skarang sudah di-nyatakan k-pada dia punya orang-orang kudus,
27dan k-pada dia-orang Allah sudah suka mau kasi tahu apa macham kaya-nya kmulia'an ruhsia itu di antara orang bangsa-asing, ia'itu Almaseh di dalam kamu, itu-lah kmulia'an punya harap;
28dan ini Almaseh-lah yang kita ada khabarkan, dngan nasihatkan tiap-tiap orang dan mngajar tiap-tiap orang dngan s-gnap bijaksana, spaya kita boleh mnghadapkan masing-masing orang dngan smpurna dalam Almaseh;
29dan itu sbab-lah sahya berpnat, dan sahya mlawan dngan kuasa Tuhan yang bkerja dalam sahya dngan kkuatan.
Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel