Alkitab Mobile SABDA
[VER] : [BABA]     [PL]  [PB] 
 <<  Kolose 2 >> 

1Kerna sahya mau kasi kamu tahu brapa banyak sahya sudah usahakan diri sahya kerna kamu smoa, dan kerna orang-orang di Laodikiah pun, dan kerna s-brapa banyak orang yang blum lagi tengok muka sahya punya rupa;

2spaya hati dia-orang dapat hibur, sdang dia-orang di-hubong dalam kaseh, spaya dapat s-chukop pngertian dngan sgala kkaya'an-nya, sampai dia-orang boleh tahu ruhsia Allah, ia'itu Almaseh,

3yang dalam-nya sudah tersmbunyi sgala perkara bijaksana dan pngtahuan yang indah-indah.

4Sahya bilang ini spaya jangan satu orang pun tipukan sama kamu dngan perkata'an pujok-mmujok.

5Kerna sunggoh-pun badan sahya jauh deri-pada kamu, ttapi roh sahya ada bersama-sama kamu, dngan bersuka-suka sbab tengok kamu punya aturan, dan kkuatan kamu punya perchaya dalam Almaseh.

6Jadi, sdang kamu sudah sambot Isa Almaseh, ia'itu Tuhan kita, baik-lah kamu bawa diri dalam dia,

7dngan berakar dan tgoh-tgoh dalam dia, dan ttap dalam kamu punya perchaya, sperti kamu sudah dapat plajaran, dngan banyak-banyak kamu punya shukor.

8Jaga baik-baik spaya jangan satu orang pun tangkap kamu oleh dia punya ilmu dan tipu-daya yang sia-sia, mnurut pngajaran manusia, dan mnurut dunia punya plajaran yang mula-mula, bukan-nya mnurut Almaseh;

9kerna k'ada'an Allah ada terhimpon dngan smpurna dalam dia dngan rupa badan,

10dan kamu pun mnjadi smpurna dalam dia-itu yang mnjadi kpala sgala prentahan dan sgala kuasa:

11dan dalam-nya juga kamu sudah di-sunatkan dngan sunat yang bukan perbuatan tangan orang, dalam hal kamu sudah tanggalkan badan yang deri-pada tabi'at dunia, dalam Almaseh punya sunat;

12sdang kamu sudah di-kuborkan sama-sama dia dalam baptisan, dan dalam baptisan kamu sudah di-bangkitkan sama-sama dia sbab perchaya kuasa Allah yang bangkitkan dia deri antara orang-orang mati.

13Dan kamu pun yang dhulu sudah mati deri sbab kamu punya dosa-dosa, dan sbab tabi'at dunia yang t'ada bersunat, kamu pun dia sudah hidopkan sama-sama dia, sdang dia sudah ampunkan sgala dosa-dosa kita;

14dan sudah hapuskan surat akuan dngan aturan-nya yang di atas kita, dan yang mlawan kita: dan dia sudah hilangkan itu smoa dngan pakukan itu di kayu salib;

15bila dia sudah tolakkan sgala prentahan dan kuasa, dia kasi malu sama sklian itu dngan nyata, serta dapat kmnangan atas itu smoa oleh salib itu.

16Sbab itu jangan satu orang pun salahkan kamu sbab makanan, atau sbab minuman, atau fasal hari bsar, atau bulan bharu, atau hari perhentian;

17smoa ini mnjadi bayang smoa perkara yang nanti datang; ttapi badan-nya mnjadi Almaseh punya.

18Jangan satu orang pun rbotkan kamu punya pahala dalam hal mau rndahkan diri dan smbah mla'ikat, dan tinggal ttap dalam apa-apa yang dia sudah tengok, dan perchuma saja dia mnjadi sombong deri sbab ingatan-nya yang datang deri tabi'at dunia,

19dan dia t'ada pegang dngan ttap sama Kpala itu, yang oleh-nya s-gnap badan yang ada di-lngkapkan dan di-hubongkan oleh sndi dan urat-urat, boleh tertambah-tambah sperti di-tambahkan oleh Allah.

20Jikalau bserta dngan Almaseh kamu sudah mati deri-pada dunia punya plajaran yang mula-mula, knapa-kah sperti kamu ada lagi hidop dalam dunia ini, kamu mau turut macham-macham punya aturan,

21ia'itu, "Jangan di-jamah, jangan di-kchap, dan jangan di-pegang"

22(smoa itu nanti lnnyap dalam hal di-pakai), mnurut sperti hukum-hukum dan pngajaran manusia?

23Btul juga itu smoa nampak-nya bijaksana dalam hal smbahyang sperti kahandak sndiri, dan rndahkan diri, dan kraskan badan; ttapi t'ada sikit pun ksiat-nya dalam hal tahankan hawa-nafsu.



 <<  Kolose 2 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel Single Panel