1Dan lagi Isa kata sama murid-murid-nya, "Ada satu orang kaya, yang ada satu juru-kunchi; dan orang d'awakan ini juru-kunchi sama dia fasal dia sudah boroskan herta-bnda-nya.
2Dan dia panggil, dan kata sama dia, 'Apa ini sahya dngar deri-hal angkau? kasi juru-kunchi punya kira-kira; kerna angkau ta'boleh jadi juru-kunchi lagi.'
3Dan itu juru-kunchi kata dalam diri-nya, 'Apa sahya mau buat, kerna sahya punya tuan mau tolak sahya deri-pada ini kerja juru-kunchi? mau changkol ta'kuat; mau minta sdkah pula malu.
4Sahya tahu apa mau buat, spaya bila sahya kna tolak deri-pada kerja juru-kunchi ini orang boleh sambot sahya masok rumah-rumah-nya.'
5Dan dia panggil tiap-tiap orang yang berhutang sama tuan-nya, dan kata sama yang pertama, 'Brapa angkau punya hutang sama sahya punya tuan?'
6Dia kata, 'S-ratus tong minyak.' Itu juru-kunchi kata sama dia, 'Ini-tah angkau punya surat, lkas dudok tulis lima-puloh.'
7Kmdian dia kata sama lain orang, 'Angkau pula brapa angkau punya hutang?' Itu orang kata, 'S-ratus pikul trigu.' Dia kata sama dia, 'Ini-tah angkau punya surat, tulis lapan-puloh.'
8Dan tuan-nya puji itu juru-kunchi yang t'ada bnar, kerna dia punya perbuatan cherdek: kerna anak-anak jman ini ada lbeh cherdek dalam bangsa-nya sndiri deri-pada anak-anak trang.
9Dan sahya ini kata sama kamu, buatkan sohbat-sohbat kerna diri kamu sndiri dngan kkaya'an yang ta'bnar itu; spaya bila kkaya'an itu hilang, orang boleh sambot kamu dalam khemah yang kkal.
10Dia yang stiawan dalam perkara sdikit skali, ada stiawan pula dalam perkara banyak: dan yang ta'bnar dalam perkara yang sdikit skali, dia pun ta'bnar dalam perkara banyak.
11Sbab itu jikalau kamu t'ada stiawan dalam kkaya'an yang ta'bnar itu, siapa nanti perchaya sama kamu hal kkaya'an yang btul?
12Dan jikalau kamu t'ada stiawan dalam perkara orang lain, siapa nanti kasi sama kamu apa yang kamu sndiri punya?
13Satu hamba ta'boleh jadi hamba sama dua tuan: kerna dia nanti bnchi satu dan kaseh yang lain; atau dia nanti pegang sama satu dan kurang hormatkan yang lain. Kamu ta'boleh jadi hamba Allah dan hamba kkaya'an pun."
14Dan orang Farisi, yang memang sayang wang, dngar ini smoa; dan dia-orang olok-olokkan sama dia.
15Dan dia kata sama dia-orang, "Kamu-lah orang yang buatkan diri kamu bnar dpan orang; ttapi Allah tahu kamu punya hati: kerna perkara yang mulia sama manusia, itu-lah kbnchian dpan Allah.
16Hukum-taurit sama surat nabi-nabi ada sampai Yahya punya tempo: kmdian deri-pada itu tempo, kraja'an Allah punya injil ada di-khabarkan, dan masing-masing orang tmpoh masok dalam-nya.
17Ttapi lbeh snang langit sama bumi lnnyap deri-pada satu titek pun hilang deri hukum-taurit.
18Tiap-tiap orang yang chraikan bini-nya, dan berbini sama lain orang, dia itu buat zina, dan orang yang berbini sama prempuan yang laki-nya sudah chraikan dia pun buat zina.
19"Ada satu orang kaya, yang pakai pakaian ungu dan kain halus-halus, dan s-hari-hari bersuka-suka dngan kmulia'an:
20dan ada pula satu orang minta-sdkah, bernama Lazarus, orang ltak dia di muka pintu orang kaya itu pnoh dngan pkong-nya,
21dan dia mnafsu mau makan sisa-sisa yang jatoh deri itu orang kaya punya meja; tambah pula anjing pun datang jilat dia punya pkong-pkong.
22Dan sudah jadi, itu orang minta-sdkah mati, dan mla'ikat-mla'ikat bawa dia pergi di pangkuan Ibrahim: dan itu orang kaya pun mati juga, dan orang tanamkan.
23Dan di dalam alam maut dia angkat mata-nya dalam sngsara-nya, dan nampak Ibrahim deri jauh, dan Lazarus di pangkuan-nya.
24Dan dia bertriak kata, 'Ya bapa Ibrahim, ksiankan-lah sama sahya, dan hantarkan Lazarus, spaya dia boleh chlopkan hujong jari-nya dalam ayer dan sjokkan lidah sahya; kerna sahya kna sngsara dalam ini nyala api.'
25Ttapi Ibrahim kata, 'Hei anak, ingat yang ktika angkau hidop angkau sudah trima angkau punya perkara yang baik, dan Lazarus bgitu juga sudah trima perkara yang ta'baik: ttapi skarang di sini dia dapat hiburan, dan angkau kna sngsara.
26Lagi pun, antara kita sama kamu smoa sudah di-tntukan satu lobang yang bsar, spaya orang yang mau pergi deri sini k-pada kamu ta'boleh, dan spaya jangan satu orang pun sbrang deri sana datang k-pada kita.'
27Itu orang kata, 'Kalau bgitu sahya minta bapa hantarkan dia pergi rumah bapa sahya;
28kerna sahya ada lima sudara dlaki; spaya dia boleh bersaksi k-pada dia-orang, spaya jangan pula dia-orang pun masok tmpat sngsara ini.'
29Ttapi Ibrahim kata, 'Dia-orang ada Musa sama nabi-nabi; biar dia-orang dngar sama dia-orang.'
30Dia kata, 'Bukan bgitu, bapa Ibrahim: ttapi jikalau satu orang deri antara orang mati pergi k-pada dia-orang, tntu-lah dia-orang nanti bertobat.'
31Dan Ibrahim kata sama dia, 'Jikalau dia-orang t'ada dngar Musa sama nabi-nabi, t'ada juga orang boleh kasi dia perchaya, kalau satu orang berbangkit deri antara orang mati skali pun.'"
Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel