1Ttapi pagi-pagi hari yang pertama dalam itu minggo, dia-orang datang di kubor, bawa itu rmpah-rmpah yang dia-orang sudah sdiakan.
2Dan dia-orang terjumpa batu-nya sudah tergolek deri kubor.
3Dia-orang masok, dan t'ada dapat mayat Tuhan Isa.
4Jadi s-tngah itu prempuan-prempuan ada bimbang hati sbab itu hal, ada dua orang dlaki berdiri di sblah-nya dngan pakai pakaian yang berkilat-kilat:
5dan bila itu prempuan-prempuan naik takot dan tundokkan muka k-tanah, itu dua orang kata sama dia-orang, "Knapa chari dia yang hidop antara orang mati?
6Dia t'ada di sini, ttapi sudah bangkit: ingat bagimana dia sudah chakap sama kamu, ktika dia ada di Galil lagi,
7ia'itu yang Anak-manusia msti di-srahkan k-pada tangan orang yang berdosa, dan msti di-salibkan, dan bangkit s-mula hari yang ktiga."
8Itu prempuan-prempuan ingat perkata'an Isa,
9dan pulang deri kubor, dan bilangkan ini smoa sama itu s-blas murid, dan smoa orang lain pun.
10Itu prempuan smoa ini-lah dia: Mariam orang Magdala, sama Yuannah, sama Mariam mak si Yakob: dan lain-lain prempuan yang ada sama-sama dia bilangkan ini hal smoa sama rasul-rasul.
11Dan rasul-rasul sangkakan ini perkata'an smoa sperti sia-sia; dia-orang t'ada perchaya itu prempuan.
12Ttapi Petrus bangun lari pergi di kubor; dan bila dia tundok mau tengok, dia chuma nampak itu kain-kain linin saja; dan dia pulang rumah-nya, dngan hairan sama apa yang sudah jadi.
13Dan itu hari juga ada dua antara dia-orang berjalan pergi satu kampong bernama Amwas, ia'itu tujoh batu s-tngah punya jauh deri Yerusalim.
14Dan dia-orang berrondeng satu sama lain deri-hal ini smoa yang sudah jadi.
15Dan s-tngah dia-orang ada berchakap dan tanya-mnanya satu sama lain, Isa sndiri pula datang dkat, dan jalan sama-sama.
16Ttapi dia-orang punya mata tertahan, sampaikan ta'boleh knal sama dia.
17Dan dia kata sama dia-orang, "Apa ini perkata'an yang kamu ada chakap satu sama lain sambil berjalan?" Dia-orang brenti dngan rupa susah.
18Dan satu orang yang bernama Kliopas jawab kata sama dia, "Angkau ini tumpang s'orang-s'orang-kah di Yerusalim dan ta'tahu itu perkara-perkara yang sudah jadi di situ ini brapa hari?"
19Dia kata sama dia-orang, "Apa itu smoa?" Dia-orang kata sama dia, "Deri-hal Isa orang Nasarat itu, ia'itu satu nabi yang berkuasa dalam pkerja'an dan perkata'an di dpan Allah dan di dpan s-gnap bangsa kita:
20dan bagimana kpala-kpala imam sama kita punya pnghulu-pnghulu sudah srahkan dia spaya kna hukum mati, dan sudah salibkan dia.
21Ttapi kita sudah harapkan dia-lah yang nanti tbuskan Isra'el. Dan dngan ini smoa sudah tiga hari pula yang ini perkara sudah jadi.
22Lagi pun ada prempuan-prempuan deri kita punya perkumpolan sudah kasi kita hairan, kerna pagi-pagi skali dia-orang sudah ada di kubor;
23dan bila dia-orang ta'boleh dapat mayat-nya, dia-orang datang bilang yang dia-orang pun sudah tengok satu pnglihatan, ia'itu mla'ikat yang kata dia ada hidop.
24Dan ada orang yang sama-sama kita pergi di kubor, dan terjumpa btul sperti prempuan-prempuan itu sudah bilang: ttapi dia dia-orang t'ada tengok."
25Dan dia kata sama dia-orang, "Hei orang yang bbal, dan kamu punya hati lambat perchaya sgala perkara yang nabi-nabi sudah katakan.
26Bukan-kah patut Almaseh itu msti tanggong ini smoa, dan kmdian masok kmulia'an-nya?"
27Dan mula'i deri Musa dan sgala nabi-nabi pun, dia artikan k-pada dia-orang deri dalam smoa kitab-kitab perkara-perkara deri-hal dia sndiri.
28Dan dia-orang tiga-tiga sampai dkat kampong yang dia-orang mau pergi: dan nampak-nya sperti dia mau pergi lagi jauh.
29Itu dua orang pula tahankan sama dia, dan kata, "Tinggal-lah sama kita: kerna ini sudah hampir malam, dan matahari pun ada turun." Dan Isa masok mau tinggal sama dia-orang.
30Dan sudah jadi, bila dia sudah dudok meja sama-sama dia-orang, dia ambil roti dan minta berkat, dan bila dia sudah pchahkan, dia kasi sama dia-orang.
31Dan dia-orang punya mata terchlek, dan dia-orang knal sama dia; dan dia lnnyap deri-pada mata dia-orang.
32Dan dia-orang kata satu sama lain, "Bukan-kah hati kita mnyala dalam diri kita, waktu dia berchakap sama kita di jalan, dan waktu dia bukakan kitab-kitab k-pada kita?"
33Dan itu jam juga itu dua-orang bangun pulang Yerusalim, dan jumpa yang s-blas itu ada berhimpon, dan orang-orang yang ada sama-sama dia-orang,
34dan ini smoa kata, "Btul-lah Tuhan sudah bangkit, dan sudah ternampak k-pada Simon."
35Kmdian itu dua orang chritakan perkara-perkara yang sudah jadi di tngah jalan, dan bagimana dia-orang sudah knal sama dia dalam pchah roti.
36Dan waktu dia-orang ada chakap ini smoa, Isa sndiri berdiri di tngah-tngah, dan bilang sama dia-orang, "Sjahtra-lah atas kamu."
37Ttapi dia-orang terkjut dan terpranjat, dan dia-orang sangkakan dia-orang ada tengok hantu.
38Dan Isa kata sama dia-orang, "Knapa kamu terkachau bgini? dan knapa terkluar sangka-sangka dalam hati kamu?
39Tengok-lah sahya punya tangan sama sahya punya kaki, yang ini sahya sndiri: jamah sama sahya dan tengok; kerna hantu t'ada daging t'ada tulang, sperti kamu tengok sahya ini ada."
40Bila dia sudah kata bgini, dia tunjokkan kaki-tangan-nya sama dia-orang.
41Ktika smoa orang itu ada lagi blum perchaya deri sbab suka-hati, dan ada naik hairan, Isa kata sama dia-orang, "Ada-kah kamu di sini apa-apa mau makan?"
42Dia-orang kasi dia s-kping ikan panggang.
43Dan dia ambil makan dpan dia-orang.
44Dan dia kata sama dia-orang, "Ini-lah sahya punya perkata'an yang sahya sudah chakap sama kamu waktu sahya lagi ada sama-sama kamu, bagimana smoa perkara msti di-sampaikan yang ada tersurat deri-hal sahya di dalam taurit Musa, dan dalam kitab nabi-nabi, dan dalam mazmur."
45Habis itu, dia trangkan dia-orang punya ingatan, spaya boleh mngerti kitab-kitab;
46dan dia kata sama dia-orang, "Bgini-lah ada tersurat, yang Almaseh itu msti kna sngsara, dan bangkit deri antara orang mati pada hari yang ktiga;
47dan lagi dalam nama Almaseh itu tobat dan ampunan dosa nanti di-khabarkan k-pada sgala bangsa, mula'i deri Yerusalim.
48Kamu ini mnjadi saksi deri-hal ini smoa.
49Dan ingat-lah, sahya ada hantarkan perjanjian Bapa sahya atas kamu: ttapi biar-lah kamu smoa dudok dalam ini negri, sampai kamu di-pakaikan dngan kuasa yang deri atas."
50Dan Isa bawa dia-orang kluar sampai dkat Bait-Ani: dan dia angkat dia punya tangan berkatkan dia-orang.
51Dan sudah jadi, ktika dia ada berkatkan dia-orang, dia berchrai deri-pada dia-orang, dan terangkat naik k-shorga.
52Dan dia-orang berlutut smbah sama dia, kmdian pulang di Yerusalim dngan ksuka'an yang bsar:
53dan slalu ada dalam ka'abah mmuji Allah.
Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan