1Dan Isa, pnoh dngan Roh Alkudus, pulang deri sungai Yordan, dan sudah di-bawa dalam Roh di tanah sunyi
2ampat-puloh hari punya lama, dan kna choba oleh iblis. Itu ktika dia t'ada makan satu apa pun: jadi bila sudah chukop hari-nya, dia naik lapar.
3Dan iblis kata sama dia, "Jikalau angkau Anak, Allah, suroh-lah ini batu jadi roti."
4Isa jawab sama dia, "Ada tersurat, 'Bukan-nya dngan makan roti saja manusia nanti hidop.'"
5Dan iblis bawa dia naik, dan tunjokkan sama dia sgala kraja'an dunia dalam s-kjapan.
6Dan iblis kata sama dia, "Smoa ini kuasa dngan kmulia'an-nya sahya nanti kasi sama angkau, kerna ia'itu sudah di-srahkan k-pada sahya, dan sama siapa sahya suka sahya kasi.
7Sbab itu jikalau angkau smbah dpan sahya, smoa-nya nanti jadi angkau punya."
8Ttapi Isa jawab kata sama dia, "Ada tersurat, 'Smbah-lah sama Allah, angkau punya Tuhan, dan chuma sama dia saja buat smbahyang.'"
9Dan dia bawa Isa pergi Yerusalim, dan kasi dia berdiri di atas ka'abah punya kmunchak, dan kata sama dia, "Jikalau angkau Anak Allah, terjun bawah deri sini:
10kerna ada tersurat, 'Dia nanti kasi dia punya mla'ikat psanan deri-hal angkau, ia'itu mau plikarakan angkau:'
11dan lagi, 'Di atas tangan-nya dia-orang nanti tatang sama angkau, Spaya kaki angkau jangan terantok batu.'"
12Dan Isa jawab kata sama dia, "Ada tersbot, 'Jangan-lah angkau choba sama Allah, angkau punya Tuhan.'"
13Dan bila iblis sudah habis smoa pnchoba'an, dia undor deri-pada Isa sampai lain ktika.
14Dan Isa pulang di Galil dngan kuasa Roh: dan pchah-lah khabar-nya di sluroh jajahan yang kliling di situ.
15Dan dia mngajar dalam rumah-rumah smbahyang, dan smoa orang muliakan sama dia.
16Kmdian dia datang di Nasarat, tmpat yang dia sudah di-pliharakan deri kchil: dan bila hari perhentian, dia masok rumah smbahyang sperti adat-nya, dan berdiri mau bacha.
17Dan orang bawa sama dia kitab nabi Yash'aya. Dia buka itu buku, dan jumpa tmpat di mana ada tersurat,
18"Roh Tuhan ada di atas sahya, Sbab dia sudah minyakkan sahya spaya khabarkan injil k-pada orang miskin: Dia sudah hantarkan sahya khabarkan klpasan sama orang yang tertangkap, Dan pnglihatan sama orang buta, Mau lpaskan orang yang kna rmok,
19Mau khabarkan tahun Tuhan, ia'itu ktika yang baik."
20Kmdian dia tutopkan buku, kasi balek sama itu orang yang jaga, dan dia dudok: dan mata smoa orang yang ada di dalam rumah-smbahyang terlngkat sama dia.
21Dan dia mula'i kata sama dia-orang, "Ini hari juga ini suratan sudah di-bnarkan di kuping kamu."
22Dan smoa orang bersaksi deri-hal dia, serta mnjadi hairan sbab perkata'an yang manis yang kluar deri mulut-nya: dan dia-orang kata, "Bukan-kah dia ini anak si Yusof?"
23Isa kata sama dia orang, "Tntu skali kamu nanti kata sama sahya ini perumpama'an, 'Hei doktor, smbohkan angkau punya diri sndiri, apa-apa yang kita dngar sudah jadi di Kafarnahum, buat-lah di sini pun dalam negri angkau sndiri.'"
24Dan dia kata, "Dngan sunggoh sahya kata sama kamu, t'ada satu nabi pun yang berknan di negri-nya sndiri.
25Ttapi dngan s-btul-nya sahya kata sama kamu, pada jman Ilia ada banyak juga prempuan bujang dalam Isra'el bila langit tertutop tiga tahun anam bulan punya lama, waktu klaparan yang bsar di sluroh tanah itu:
26ttapi Ilia t'ada di-hantarkan k-pada satu orang pun chuma k-negri Sarafat di tanah Sidon, k-pada satu prempuan bujang.
27Dan lagi, jman nabi Ilisa ada banyak juga orang tai-ko dalam Isra'el dan t'ada satu pun di antara dia-orang yang di-suchikan, chuma Na'aman orang Suriah itu."
28Dan smoa orang di dalam itu rumah-smbahyang, serta dia-orang dngar itu perkata'an, mnjadi pnoh dngan marah;
29dan dia-orang bangun tolakkan dia kluar negri, dan bawa di kmunchak bukit yang di atas-nya itu negri sudah di-naikkan, spaya boleh jatohkan dia di bawah.
30Ttapi Isa lalu di tngah-tngah dia-orang dan pergi.
31Dan dia turun pergi Kafarnahum, satu negri di tanah Galil. Dan hari perhentian dia ada ajar orang:
32dan dia-orang hairan sama pngajaran-nya; kerna perkata'an-nya dngan kuasa.
33Di rumah-smbahyang ada satu orang yang terkna jin yang najis; dan dia bertriak-triak dngan suara bsar,
34"Wah! kita sama angkau apa ada terkna, hei Isa orang Nasarat? sudah-kah angkau datang mau binasakan kita? Sahya pun tahu angkau siapa, ia'itu Yang Kudus datang deri-pada Allah."
35Isa tngkingkan dia, dan kata, "Diam, kluar deri-pada itu orang." Bila itu jin sudah jatohkan dia di tngah-tngah, dia kluar deri-pada dia, dngan t'ada buat chlaka sama dia.
36Dan smoa orang terchngang dan kata satu sama lain, "Apa macham punya perkata'an ini? kerna dngan kuasa dan kkuatan dia kasi hukum sama jin yang najis, dan dia-orang kluar."
37Jadi pchah-lah khabar deri-hal Isa masok masing-masing tmpat dalam jajahan kliling situ.
38Kmdian dia bangun kluar deri rumah-smbahyang, masok rumah Simon. Dan Simon punya mertua prempuan ada kna dmam kras; dan dia-orang minta tolong sama Isa sbab dia.
39Isa berdiri sblah itu prempuan, dan tngkingkan itu dmam; dan dmam-nya hilang: dan itu juga dia bangun mlayankan dia-orang.
40Waktu matahari masok, smoa orang yang ada siapa-siapa yang sakit macham-macham, bawa smoa-nya sama Isa; dan dia taroh dia punya tangan atas masing-masing orang, dan smbohkan dia orang.
41Jin-jin pun kluar deri-pada banyak orang, serta bertriak kata, "Angkau-lah Anak Allah." Ttapi Isa tngkingkan itu jin smoa, dan t'ada kasi dia-orang chakap, sbab dia-orang tahu yang dia-lah Almaseh.
42Bila sudah siang, Isa kluar pergi tmpat yang sunyi: dan orang-orang-banyak chari dia, dan datang sama dia mau tahankan spaya dia jangan undor deri-pada-nya,
43ttapi Isa kata sama dia-orang, "Sahya msti khabarkan khabar yang baik deri-hal kraja'an Allah k-pada lain-lain negri pun: kerna sbab itu-lah sahya sudah di-hantarkan."
44Dan Isa ada mngajar orang dalam sgala rumah-smbahyang di Galil.
Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel