1Ada satu hari perhentian Isa berjalan lalu ladang trigu; dan murid-murid-nya ptek tangkai-tangkai trigu, dan ramaskan dngan tangan, kmdian makan
2Ttapi ada orang Farisi yang kata, "Knapa kamu smoa buat perkara yang t'ada halal buat tempo hari perhentian?"
3Isa jawab kata sama dia-orang, "Blum-kah kamu pernah bacha ini pun? ia'itu apa yang Da'ud sudah buat ktika dia lapar, dia sama orang-orang yang ada sama-sama dia;
4bagimana dia sudah masok dalam rumah Allah, dan sudah ambil makan itu roti persmbahan, dan sudah kasikan sama orang yang ikut dia pun; dan itu t'ada halal orang makan, chuma imam-imam saja."
5Dan dia kata sama dia-orang, "Anak-manusia jadi hari-perhentian punya tuan."
6Dan lain hari perhentian pula dia masok rumah-smbahyang dan mngajar: di situ ada satu orang yang tangan kanan-nya sudah mati.
7Orang pnulis sama orang Farisi intai sama Isa jikalau dia mau smbohkan tempo hari perhentian, spaya dia-orang boleh dapat d'awa sama dia.
8Ttapi Isa tahu dia-orang punya fikiran; dan dia kata sama itu orang yang mati tangan, "Bangun, dan berdiri di tngah-tngah." Dan dia bangun berdiri.
9Isa kata sama dia-orang, "Sahya mau tanya sama kamu, tempo hari-perhentian ada-kah halal buat baik, atau buat aniaya? slamatkan nyawa orang, atau binasakan?"
10Dan bila dia sudah pandang kliling sama dia-orang smoa, dia kata sama dia itu, "Hulorkan angkau punya tangan." Itu orang buat bgitu, dan dia punya tangan mnjadi baik.
11Ttapi dia-orang smoa jadi bingong skali; dan chakap satu sama lain apa dia-orang boleh buat sama Isa.
12Dan itu waktu Isa kluar pergi di gunong mau minta do'a; dan s-panjang malam berdo'a k-pada Allah.
13Bila sudah siang, dia panggil murid-murid-nya: dan deri antara dia-orang dia pileh dua-blas orang, yang dia namakan rasul-rasul;
14ia'itu Simon yang dia namakan Petrus, sama sudara-nya Andrias, dan Yakob dan Yahya, dan Filipus dan Bar-Tolmai,
15dan Matius dan Tomas, dan Yakob anak Halfi, dan Simon yang di-glarkan Zelotes,
16dan Yudas sudara Yakob, dan Yudas Iskariot yang mnjadi pmbelot;
17dan kmdian Isa turun sama-sama dia-orang, berdiri di tmpat rata, dngan banyak skali murid-murid-nya, dan banyak skali orang bangsa itu, deri sluroh tanah Yahudiah, dan deri Yerusalim, dan deri tpi laut dkat Tur dan Sidon, yang datang mau dngar dia, dan mau minta dia smbohkan pnyakit-nya;
18dan orang yang kna kachau oleh jin yang najis pun sudah di-smbohkan.
19Dan smoa orang-banyak chari jalan mau jamah sama dia: kerna ada kuasa kluar deri-pada dia dan smbohkan smoa.
20Dan dia angkat mata tengok murid-murid-nya, dan kata, "Berkat-lah kamu yang miskin; kerna kraja'an Allah itu kamu punya.
21Berkat-lah kamu yang skarang lapar; kerna kamu nanti di-knnyangkan. Berkat-lah kamu yang skarang mnangis; kerna kamu nanti tertawa.
22Berkat-lah kamu bila orang nanti bnchi sama kamu, dan bila orang sblahkan kamu, dan maki, dan buangkan nama kamu sperti jahat, deri Anak-manusia punya sbab.
23Itu ktika biar-lah kamu bersuka-suka dan mlompat-lompat dngan ksuka'an: kerna ingat yang bsar-lah kamu punya pahala dalam shorga: kerna bgitu-lah juga dia-orang punya nenek-moyang sudah buat sama nabi-nabi.
24Ttapi susah-lah kamu yang kaya-kaya! kerna kamu sudah trima kamu punya pnghiburan.
25Susah-lah kamu, hei kamu yang knnyang skarang! kerna kamu nanti lapar. Susah-lah, hei kamu yang tertawa skarang! kerna kamu nanti susah-hati dan mnangis.
26Susah-lah, bila smoa orang chakap baik deri-hal kamu! kerna bgitu-lah juga dia-orang punya nenek-moyang sudah buat sama nabi-nabi bohong.
27"Ttapi sama kamu yang dngar ini sahya kata, kaseh-lah sama sgala musoh-mu, buat baik sama orang yang bnchi kamu,
28berkatkan orang yang sumpahkan kamu, dan minta do'a kerna orang yang aniayakan kamu.
29Sama orang yang lpak pipi angkau, kasi yang lain sblah pula; dan jangan tahankan baju-dalam kamu deri-pada orang yang ambil baju-luar.
30Kasi-lah sama tiap-tiap orang yang minta sama angkau, dan jangan minta balek deri-pada orang yang ambil angkau punya barang-barang.
31Sperti kamu suka orang buat sama kamu, bgitu-lah juga biar kamu buat sama orang.
32Jikalau kamu kaseh orang yang kaseh sama kamu, apa macham kamu punya pahala? kerna orang-orang berdosa pun kaseh orang yang kaseh sama dia.
33Dan jikalau kamu buat baik sama orang yang buat baik sama kamu, apa macham kamu punya pahala? kerna orang-orang berdosa pun buat bgitu juga.
34Dan jikalau kamu kasi pinjam sama orang yang deri-pada-nya kamu harap boleh trima apa-apa, apa macham kamu punya pahala? orang-orang berdosa pun kasi pinjam sama orang-berdosa, spaya boleh trima balek sama banyak.
35Ttapi sayang-lah kamu punya musoh, dan buat baik, dan kasi pinjam, dngan t'ada skali-kali putus harap; dan kamu punya pahala nanti jadi bsar, dan kamu nanti jadi Yang Maha Tinggi punya anak, kerna dia murah-hati sama orang yang t'ada bri shukor, dan sama orang yang jahat pun.
36Biar-lah kamu taroh ksian, sperti kamu punya Bapa ada ksian.
37Dan jangan salahkan orang, dan kamu t'ada nanti di-salahkan: jangan hukumkan orang, dan kamu t'ada nanti di-hukumkan: ampunkan orang, dan kamu nanti di-ampunkan:
38kasi-lah, dan orang nanti kasi sama kamu; sukatan yang baik, ter'ntak-'ntak, dan gonchang-gonchang, dan pnoh sampai tumpah, orang nanti kasi dalam kamu punya pangku. Kerna dngan sukatan yang kamu sukatkan, bgitu-lah juga orang nanti sukatkan balek sama kamu."
39Dan Isa katakan pula satu perumpama'an sama dia-orang, "Boleh-kah orang buta pimpin orang buta? t'ada-kah nanti dua-dua jatoh dalam lobang?
40Anak-murid bukan atas guru-nya, ttapi tiap-tiap orang yang chukop plajaran-nya nanti jadi sperti guru-nya.
41Dan knapa angkau tengok abok kayu yang ada dalam angkau punya sudara punya mata, ttapi s-batang kayu yang dalam mata sndiri angkau t'ada ingat?
42Atau bagimana-kah angkau boleh kata sama angkau punya sudara, 'Hei sudara, mari sahya kluarkan itu abok yang di dalam angkau punya mata:' sdang angkau sndiri t'ada tengok itu kayu yang dalam mata sndiri? Hei orang pura-pura, mula-mula kluarkan itu kayu yang ada dalam angkau punya mata: kmdian bharu-lah angkau boleh tengok trang-trang mau kluarkan itu abok deri dalam angkau punya sudara punya mata.
43Kerna t'ada ada pokok baik yang kluarkan buah jahat; atau pokok ta'baik pula yang kluarkan buah baik.
44Kerna tiap-tiap pokok orang boleh knal deri dia punya buah. Kerna deri-pada pokok duri orang t'ada ptek buah ara, dan deri-pada pokok onak orang t'ada ptek buah anggor.
45Orang yang baik kluarkan perkara yang baik deri-pada kkaya'an hati-nya yang baik; dan orang jahat deri-pada yang jahat pula kluarkan perkara yang jahat: kerna deri-pada klempahan hati, orang punya mulut berchakap.
46"Dan knapa kamu triak sahya, 'Tuhan, Tuhan,' ttapi t'ada buat apa-apa yang sahya kata?
47Masing-masing orang yang datang k-pada sahya, dan dngar perkata'an sahya, dan turut itu smoa, sahya boleh tunjokkan sama kamu siapa-kah dia s-rupa:
48dia itu s-rupa satu orang yang naikkan rumah, dan korek dalam-dalam, dan pasang alas-nya atas batu karang: dan bila turun ayer-bah, harus-nya tmpoh itu rumah, ttapi ta'boleh gonchangkan rumah itu: kerna buatan-nya baik.
49Ttapi orang yang dngar dan t'ada turut, dia itu s-rupa satu orang yang naikkan rumah di atas tanah dngan t'ada alas-nya: dan harus tmpoh itu rumah, dan itu juga dia ruboh: dan bsar-lah itu rumah punya kbinasa'an."
Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel