1Dan Isa panggil itu dua-blas orang, dan kasi dia-orang kuasa dan prentah atas sgala jin, dan boleh smbohkan sgala pnyakit.
2Dan dia suroh dia-orang pergi khabarkan kraja'an Allah, dan smbohkan orang sakit.
3Dan dia kata sama dia-orang, "Jangan bawa apa-apa kerna kamu punya perjalanan, baik tongkat, baik tmpat bkal, baik roti, baik wang perak; dan jangan bawa dua lai baju.
4Dan mana-mana rumah kamu masok, di situ tinggal, dan deri situ boleh jalan pergi.
5Dan s-brapa banyak orang t'ada trima kamu, kbaskan habok kaki kamu bila kamu kluar deri-pada itu negri, jadi satu ksaksian atas dia-orang."
6Itu murid-murid kluar jalan kliling kampong-kampong khabarkan injil, dan smbohkan orang di mana-mana pun.
7Raja Herodis dapat dngar deri-hal apa-apa yang sudah jadi: dan hati-nya jadi bimbang, sbab ada orang kata yang Yahya sudah bangkit deri antara orang mati;
8dan ada orang pula kata yang Ilia sudah ternampak; dan ada lain orang lagi kata satu nabi jman dhulu-dhulu sudah bangkit s-mula.
9Dan Herodis kata, "Yahya sahya sudah kratkan kpala-nya: ttapi ini pula siapa, yang sahya dngar ini macham punya perkara deri-hal dia?" Dan dia chari jalan mau tengok Isa.
10Dan bila rasul-rasul pulang, dia-orang chritakan sama Isa apa-apa dia-orang sudah buat. Dan dia ambil dia-orang, dan undor sndiri saja pergi satu negri bernama Bait-Saida.
11Ttapi orang-banyak dapat tahu, dan ikut sama dia: dan dia sambot sama dia-orang, dan chakap sama dia-orang deri-hal kraja'an Allah, dan dia smbohkan siapa-siapa yang mau di-smbohkan.
12Dan hari mula'i ptang; jadi itu dua-blas orang datang kata sama dia, "Suroh-lah ini orang-banyak pulang, spaya dia-orang boleh pergi di kampong-kampong dan dusun-dusun yang kliling, mau mnumpang dan chari makan: kerna di sini kita ada di tmpat sunyi."
13Ttapi Isa kata sama dia-orang, "Baik kamu ini kasi dia-orang makan." Dia-orang kata, "Kalau kita t'ada pergi blikan makanan kerna ini orang smoa, kita tidak ada lbeh deri-pada lima biji roti sama dua ekor punya ikan."
14Kerna ada lbeh kurang lima-ribu orang dlaki punya banyak. Dan Isa kata sama murid-murid-nya, "Kasi dia-orang dudok s-tompok s-tompok, satu tompok lima-puloh orang bgitu."
15Murid-murid buat bgitu, dan kasi smoa orang dudok.
16Dan dia ambil itu lima biji roti sama dua ekor ikan, dan bila dia sudah tngadah k-langit, dia berkatkan, dan pchahkan, dan bhagikan sama murid-murid, spaya dia-orang boleh ltakkan di dpan orang-banyak.
17Dan smoa-nya makan sampai knnyang: dan orang pungut sisa-sisa yang tertinggal sama dia-orang, ada dua-blas bakul punya banyak.
18Jadi ktika Isa minta do'a s'orang-s'orang, murid-murid pun ada sama-sama dia: dan dia tanya dia-orang, "Orang-banyak kata sahya ini siapa?"
19Dan dia-orang jawab kata, "Yahya Pmbaptis; ttapi ada orang pula kata, 'Ilia;' dan ada lain orang lagi yang kata, 'Satu deri antara nabi-nabi dhulu-kala sudah bangkit s-mula."
20Dan Isa kata sama dia-orang, "Ttapi kamu pula kata sahya ini siapa?" Dan Petrus jawab kata, "Allah punya Almaseh."
21Ttapi Isa ingatkan dia-orang baik-baik dan psan jangan bilangkan ini perkara sama satu orang pun;
22dan Isa kata, "Anak-manusia msti tanggong banyak sngsara, dan msti kna tolak oleh ktua-ktua, dan kpala-kpala imam, dan orang pnulis, dan lagi dia nanti kna bunoh, dan nanti di-bangkitkan s-mula hari yang ktiga."
23Dan dia kata sama smoa orang, "Jikalau satu orang mau datang ikut sahya, biar-lah dia sangkalkan diri-nya, dan pikul salib-nya s-hari-hari, dan ikut sama sahya.
24Kerna barang-siapa yang mau slamatkan nyawa-nya, dia nanti hilang itu nyawa; dan barang-siapa nanti hilang nyawa-nya kerna sahya punya sbab, dia-lah juga nanti slamatkan itu.
25Kerna apa untong sama satu orang jikalau dia dapat satu dunia ini jadi dia punya, ttapi diri-nya sndiri hilang atau rugi.
26Kerna barang-siapa jadi malu sama sahya dan sahya punya perkata'an, sama dia-lah Anak-manusia nanti malu, bila dia datang dngan dia sndiri punya kmulia'an, dan dngan kmulia'an Bapa-nya, dan kmulia'an mla'ikat yang kudus.
27Ttapi dngan s-btul-nya sahya kata sama kamu, antara orang yang berdiri di sini ada juga yang skali-kali t'ada nanti mrasa mati, s-blum dia-orang tengok kraja'an Allah."
28Ada kira-kira lapan hari kmdian deri-pada ini perkata'an, Isa ambil sama-sama dia Petrus sama Yahya sama Yakob, dan naik gunong mau minta do'a.
29Dan dalam dia minta do'a, muka-nya punya rupa berubah, dan pakaian-nya puteh, dan berkilat skali.
30Dan ada dua orang yang berchakap sama dia, ia'itu Musa sama Ilia;
31ini dua orang ternampak dngan kmulia'an dan chakap deri-hal Isa punya kmatian yang dia nanti sampaikan di Yerusalim.
32Petrus dngan orang-orang yang ada sama-sama dia sangat-lah mngantok: ttapi bila dia-orang sudah tersdar, bharu-lah dia-orang tengok Isa punya kmulia'an, sama itu dua orang yang berdiri sama-sama dia.
33Waktu itu dua orang mau undor deri-pada dia, Petrus kata sama Isa, "Tuhan, baik juga kita ada di sini: baik kita bikin tiga pondok; satu sbab Tuhan, satu sbab Musa, dan satu sbab Ilia:" dngan t'ada sdar 'ntah apa-kah dia ada kata.
34Dan waktu dia kata ini smoa, satu awan datang tutopkan dia-orang: dan dia-orang naik takot bila dia-orang masok dalam itu awan.
35Dan satu suara kluar deri-pada awan, "Ini-lah Anak sahya, yang terpileh: dngar-lah sama dia."
36Waktu itu suara datang, dia-orang jumpa Isa s'orang-s'orang. Dan dia-orang diam-diam saja, dan itu waktu dia-orang t'ada bilangkan satu orang pun baik apa pun yang dia-orang sudah tengok.
37Besok-nya, bila dia-orang sudah turun deri gunong, banyak skali orang jumpa sama Isa.
38Dan ada satu orang deri antara orang-banyak bertriak-triak kata, "Hei guru, sahya minta guru tengok sama sahya punya anak dlaki; kerna dia anak tunggal sahya:
39dan ada satu jin pegang dia, dan tiba-tiba dia bertriak; dan jin itu tarek-tarek sama dia sampaikan dia berbusa-busa, dan itu jin t'ada undor deri-pada dia kalau blum dia lukakan dia banyak-banyak.
40Dan sahya sudah minta guru punya murid-murid buangkan dia, ttapi dia-orang ta'boleh."
41Dan Isa jawab kata, "Hei orang jman yang kurang perchaya dan yang ssat, brapa lama-kah lagi sahya boleh bersama-sama kamu, brapa lama-kah lagi sahya boleh sabarkan kamu? bawa sini angkau punya anak."
42Dan waktu itu budak ada lagi jalan datang, itu jin champakkan dia di tanah, dan tarek-tarek sama dia banyak skali. Ttapi Isa tngkingkan itu jin yang najis, dan smbohkan itu budak, dan pulangkan dia sama bapa-nya.
43Dan smoa orang terchngang-chngang sbab kbsaran Allah. Ttapi waktu smoa orang ada hairan sama sgala perkara yang dia sudah buat, Isa kata sama murid-murid-nya,
44"Simpan-lah ini perkata'an smoa dalam kamu punya kuping: kerna Anak-manusia nanti di-srahkan k-pada tangan orang."
45Ttapi dia-orang t'ada mngerti ini perkata'an dan itu pun ada di-smbunyikan deri-pada dia-orang, spaya jangan dia-orang mngerti: dan lagi pun dia-orang takot mau tanya Isa deri-hal ini perkata'an.
46Dan antara itu murid-murid jadi satu rondengan siapa nanti jadi yang bsar skali.
47Ttapi Isa tahu dia-orang punya rondengan hati, dan dia ambil satu anak kchil, dan kasi dia berdiri sblah-nya,
48dan kata sama dia-orang, "Barang-siapa yang nanti sambot ini budak kchil dalam nama sahya, dia itu sambot sama sahya: dan barang-siapa yang nanti sambot sahya, dia itu sambot dia yang hantarkan sahya: kerna orang yang kchil skali antara kamu, dia-lah yang bsar."
49Dan Yahya jawab kata, "Tuan, kita sudah tengok satu orang buangkan jin dalam nama Tuan; dan kita sudah larangkan dia, sbab dia t'ada ikut sama-sama kita."
50Ttapi Isa kata sama dia, "Jangan larangkan, kerna orang yang t'ada mlawan kamu, dia itu ada sblah kamu."
51Dan bila itu waktu sudah hampir yang dia msti di-bawa naik, Isa berjalan ttap mnuju Yerusalim,
52dan dia hantarkan orang psuroh pergi dpan dia: dan dia-orang pergi masok satu kampong orang Samariah, mau sdiakan kerna dia.
53Dan itu orang-orang t'ada sambot sama Isa, sbab dia ada berjalan mnuju Yerusalim.
54Dan bila murid-murid-nya Yakob sama Yahya tengok, dia-orang kata, "Tuhan mau-kah kita panggil api turun deri langit hanguskan ini orang smoa?"
55Ttapi Isa balek muka kalotkan dia-orang.
56Kmdian dia-orang pergi lain kampong pula.
57S-tngah dia-orang berjalan, ada satu orang kata sama Isa, "Sahya nanti ikut di mana-mana pun guru pergi."
58Dan Isa kata sama dia, "Srigala ada lobang-nya, dan burong-burong ada sarang-nya; ttapi Anak-manusia t'ada tmpat mau Itak kpala pun."
59Dan sama lain orang pula Isa kata, "Mari ikut sama sahya." Ttapi dia kata, "Ya Tuhan, biar-lah sahya pergi tanam sahya punya bapa dhulu."
60Ttapi Isa kata sama dia, "Biarkan orang mati tanamkan dia-orang sndiri punya orang mati, ttapi angkau pergi khabarkan kraja'an Allah sana-sini."
61Dan ada lagi satu orang pula kata, "Sahya nanti ikut Tuhan; ttapi lbeh dhulu biarkan sahya kasi slamat-tinggal sama orang di rumah-tangga sahya."
62Ttapi Isa kata sama dia, "T'ada satu orang yang sudah pegang tangkai bajak, dan tengok blakang, yang ada layak masok kraja'an Allah."
Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan