Alkitab Mobile SABDA
[VER] : [BABA]     [PL]  [PB] 
 <<  Matius 10 >> 

1Dan Isa panggil dia punya dua-blas murid-murid, dan kasi dia-orang kuasa atas sgala jin yang najis, spaya boleh buangkan dia, dan smbohkan macham-macham pnyakit dan klmahan.

2Ini-lah itu dua-blas rasul punya nama: Nombor satu, Simon yang berglar Petrus, sama sudara-nya Andrias; Yakob anak Zabdi, sama sudara-nya Yahya;

3Filipus sama Bar-Tolmai; Tomas sama Matius, orang yang pungut chukai itu; Yakob anak Alfius, sama Tadius;

4Simon orang Kanani, sama Yudas Iskariot, dia itu yang sudah srahkan Isa.

5Ini dua-blas orang Isa suroh kluar, dan psan dia-orang bgini: "Jangan-lah kamu pergi ikut jalan orang bangsa-asing, dan negri orang Samariah pun jangan kamu masok:

6ttapi lbeh baik pergi k-pada isi rumah Isra'el punya kambing-kambing yang sudah hilang.

7Dan sambil kamu berjalan, khabarkan bgini, 'Kraja'an shorga sudah dkat.'

8Smbohkan orang yang sakit, bangkitkan orang yang mati, suchikan orang tai-ko, buangkan jin: kamu sudah trima dngan t'ada bayeran, kasi-lah pula dngan t'ada bayeran.

9Jangan sdiakan mas, atau perak, atau tmbaga dalam kamu punya ikat-pinggang:

10atau tmpat bkal kerna perjalanan itu, dan dua lai baju pun jangan, kasut pun jangan, tongkat pun jangan: sbab orang yang kerja ada layak dapat makanan-nya.

11Baik di mana punya negri atau kampong kamu nanti masok, chari siapa dalam-nya yang layak; dan tinggal di situ sampai kamu kluar.

12Bila kamu masok orang punya rumah, minta berkat kerna itu rumah.

13Dan jikalau itu rumah ada layak, biar kamu punya berkat turun atas-nya: ttapi jikalau t'ada layak biar kamu punya berkat pulang k-pada kamu.

14Dan barang-siapa t'ada trima sama kamu, atau dngar kamu punya perkata'an, sambil kamu kluar deri itu rumah atau itu negri, kbaskan habok kaki kamu.

15Dngan sunggoh sahya kata sama kamu, tempo hari kiamat negri Sadom dan Amurah nanti kna lbeh ringan deri-pada itu negri.

16"Ingat, sahya ini-lah suroh kamu kluar sperti kambing di tngah-tngah anjing hutan: jadi-lah bijaksana s-bagai ular, dan tulus hati s-bagai burong komba.

17Ttapi jaga-lah diri kamu deri-pada orang: kerna dia-orang nanti srahkan kamu dpan majlis bichara, dan dalam dia-orang punya rumah smbahyang pun dia-orang nanti ssahkan kamu;

18dan dpan tuan-tuan gobernor dan raja-raja pun kamu nanti di-bawa kerna sahya punya sbab, spaya mnjadi satu ksaksian k-pada dia-orang dan k-pada orang bangsa-asing pun.

19Ttapi bila dia-orang srahkan kamu, jangan jadi khuatir fasal bagimana atau apa-kah kamu nanti chakap: kerna itu jam juga nanti di-bri sama kamu apa yang kamu patut chakap.

20Kerna bukan-nya kamu yang berchakap, ttapi Roh Bapa kamu yang berchakap di dalam kamu.

21Dan sudara nanti srahkan sudara spaya kna bunoh, dan bapa nanti srahkan anak-nya: dan anak-anak nanti bangun mlawan mak-bapa-nya, dan kasi dia-orang kna bunoh.

22Dan kamu nanti kna bnchi oleh sgala orang kerna nama sahya punya sbab; ttapi barang-siapa tahan sampai ksudahan, dia-lah nanti slamat.

23Ttapi bila orang aniayakan kamu dalam ini negri, lari masok lain negri pula; kerna dngan sunggoh sahya kata sama kamu, t'ada nanti kamu habiskan negri-negri Isra'el, sampai Anak-manusia datang.

24"Anak-murid bukan-nya atas guru, dan hamba pun bukan atas tuan-nya.

25Chukop-lah kalau anak-murid jadi sperti dia punya guru, dan hamba pun sperti dia punya tuan. Jikalau orang triak tuan-rumah itu Ba'al-zabul, apa lagi orang isi rumah-nya pula!

26Sbab itu jangan-lah kamu takot sama dia-orang, kerna t'ada satu barang yang tertutop yang t'ada nanti di-nyatakan; dan yang tersmbunyi yang t'ada nanti orang tahu.

27Apa-apa sahya kata sama kamu dalam glap chakap-lah dalam trang: dan apa-apa yang kamu dngar di kuping, khabarkan di atas gnting yang rata.

28Dan jangan-lah kamu takot sama orang yang kasi badan mati, ttapi t'ada kuasa kasi jiwa mati: ttapi lbeh baik takot sama dia itu yang ada kuasa binasakan jiwa dan badan pun dalam nraka.

29Bukan-kah orang jual burong pipit dua ekor satu duit? dan satu ekor pun t'ada nanti jatoh di tanah kalau bukan dngan kahandak Bapa kamu:

30ttapi sampai rambot kpala kamu smoa-nya sudah terhitong.

31Sbab itu jangan-lah kamu takot; kamu ini lbeh indah deri-pada banyak burong pipit.

32Sbab itu barang-siapa nanti mngaku sama sahya dpan manusia, sama dia sahya nanti mngaku dpan Bapa sahya yang ada di shorga.

33Ttapi barang-siapa nanti sangkalkan sahya dpan manusia, sama dia sahya pun nanti sangkalkan dpan Bapa sahya yang di shorga.

34"Jangan fikir yang sahya sudah datang mau bawa sjahtra di atas bumi: sahya bukan datang mau bawa sjahtra, ttapi satu pdang.

35Kerna sahya datang chraikan orang deri-pada bapa-nya, dan anak prempuan deri-pada mak-nya, dan mnantu prempuan deri-pada mertua-nya:

36dan orang punya isi rumah sndiri nanti jadi musoh-nya.

37Dia yang sayang bapa atau mak lbeh deri-pada sahya t'ada layak sama sahya: dan dia yang sayang anak jantan atau anak prempuan-nya lbeh deri-pada sahya t'ada layak sama sahya.

38Dan dia yang t'ada ambil dia punya salib dan ikut sama sahya, dia pun t'ada layak sama sahya.

39Dia yang dapat nyawa-nya nanti hilang itu nyawa; dan dia yang hilang nyawa-nya kerna sahya punya sbab nanti dapat itu nyawa.

40"Dia yang sambot sama kamu sambot sahya, dan dia yang sambot sahya sambot sama dia itu yang hantarkan sahya.

41Dia yang sambot satu nabi sbab dia jadi nabi, nanti trima nabi punya pahala; dan dia yang sambot satu orang bnar sbab dia jadi orang bnar, nanti trima orang bnar punya pahala.

42Dan barang-siapa yang nanti kasi minum s-changkir ayer sjok saja sama satu deri antara ini orang yang kchil, sbab dia jadi anak-murid, dngan sunggoh sahya kata sama kamu, t'ada-lah skali-kali dia nanti hilang dia punya pahala."



 <<  Matius 10 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel Single Panel