1Bila Isa sudah habis psan sama dia punya dua-blas anak-murid, dia undor deri situ mau mngajar dan khabarkan injil dalam negri-negri orang.
2Bila Yahya dngar dalam jel deri-hal sgala perbuatan Almaseh itu, dia suroh murid-murid-nya pergi,
3dan kata sama dia, "Tuan-kah dia itu yang patut datang, atau msti-kah kita nantikan lain orang pula?"
4Isa jawab kata sama dia-orang, "Pergi-lah khabarkan sama Yahya smoa perkara yang kamu ada dngar dan tengok:
5orang buta nampak s-mula, dan orang tempang berjalan, orang tai-ko di-suchikan, dan orang pkak dngar, orang mati di-bangkitkan, dan sama orang miskin orang khabarkan injil.
6Dan berkat-lah barang-siapa yang t'ada terantok fasal sahya."
7Waktu dia-orang pergi, Isa mula'i kata sama orang-orang banyak deri-hal Yahya, "Kamu sudah pergi tanah sunyi, apa mau tengok? s-batang mndrong yang di-goyang oleh angin-kah?
8Ttapi apa-kah kamu sudah pergi mau tengok? orang yang pakai halus-halus-kah? Orang yang pakai halus-halus itu ada dalam raja-raja punya istana.
9Ttapi sbab apa-kah kamu sudah pergi kluar? mau tengok satu nabi-kah? Ya, sahya kata sama kamu, dan lbeh lagi deri-pada nabi.
10Ini-lah dia itu yang deri-hal-nya ada tersurat, 'Tengok, sahya ada hantarkan sahya punya psuroh dpan angkau punya muka, Dia nanti sdiakan angkau punya jalan lbeh dhulu angkau.'
11Dngan sunggoh sahya kata sama kamu, antara sgala orang yang sudah di-beranakkan oleh prempuan, blum terkluar satu orang pun yang lbeh bsar deri-pada Yahya Pmbaptis: ttapi orang yang kchil skali dalam kraja'an shorga ada lbeh bsar deri-pada dia.
12Ttapi deri jman Yahya Pmbaptis sampai skarang ini kraja'an shorga kna langgar, dan orang yang mlanggar ambil dngan kuat-nya.
13Kerna smoa nabi-nabi dan hukum-taurit pun sudah mngajar sampai Yahya punya tempo.
14Dan jikalau kamu suka trima, ini-lah Ilia yang patut datang itu.
15Siapa ada kuping mau dngar, biar-lah dia dngar.
16Ttapi sama apa-kah sahya boleh samakan ini jman punya orang? Dia ada sama sperti budak-budak yang dudok di pasar, dan bertriak-triak sama kawan-nya,
17'Kita sudah tiop suling kerna kamu, dan kamu t'ada bertandak; kita sudah mratap, dan kamu t'ada tampar dada.'
18Kerna Yahya sudah datang dngan t'ada makan t'ada minum, dan dia-orang kata, 'Dia ini terkna jin.'
19Anak-manusia pula datang dngan makan minum, dan dia-orang kata, 'Tengok, orang glojoh, dan orang yang minum ayer-anggor, sohbat orang pungut chukai, dan sohbat orang berdosa!' Dan bijaksana di-trangkan jadi bnar oleh perbuatan-nya."
20Itu waktu Isa mula'i chlakan negri-negri di mana kbanyakan dia punya m'ujizat sudah di-jadikan, sbab negri itu t'ada bertobat.
21"Susah-lah angkau, hei Kurazin, susah-lah angkau, hei Bait-Saida, kerna jikalau dalam Tur dan Sidon sudah jadi m'ujizat sperti yang sudah jadi dalam kamu, lama-lah itu dua negri sudah pun bertobat dngan pakaian karong dan habu.
22Ttapi sahya kata sama kamu, bila hari kiamat negri Tur dan Sidon nanti kna lbeh ringan deri-pada kamu.
23Dan angkau, hei Kafarnahum, angkau nanti di-tinggikan sampai langit-kah? angkau nanti di-turunkan sampai alam maut: kerna jikalau dalam Sadom sudah jadi m'ujizat yang sudah jadi dalam angkau, tntu-lah itu negri kkal sampai ini hari.
24Ttapi sahya kata sama kamu, tempo hari kiamat Sadom nanti kna lbeh ringan deri-pada angkau."
25Itu waktu Isa jawab kata, "Ya Bapa, langit dan bumi punya Tuhan, sahya mnguchap shukor k-pada Bapa, sbab Bapa sudah smbunyikan ini smoa deri-pada orang yang bijaksana dan berakal, dan sudah nyatakan ini smoa k-pada anak-anak kchil:
26ya Bapa, kerna bgini-lah yang berknan k-pada-mu.
27Bapa sahya sudah srahkan smoa perkara sama sahya: dan satu orang pun t'ada knal sama Anak itu, chuma Bapa saja; dan satu orang pun t'ada knal sama Bapa itu, chuma Anak saja, dan orang yang k-pada-nya Anak itu suka nyatakan.
28Mari-lah sama sahya, kamu smoa yang pnat dan yang mnanggong brat, dan sahya-lah nanti kasi kamu perhentian.
29Pakai-lah sahya punya kok, dan blajar-lah deri-pada sahya; kerna sahya lmbot dan rndah-hati, dan kamu nanti dapat perhentian pada kamu punya jiwa.
30Kerna kok sahya snang, dan tanggongan sahya pun ringan."
Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel