Alkitab Mobile SABDA
[VER] : [BABA]     [PL]  [PB] 
 <<  Markus 12 >> 

1Kmdian Isa mula'i berchakap sama dia-orang dngan perumpama'an: "Ada satu orang tanam satu kbun anggor, dan pasang pagar kliling-nya, dan korek satu irekan anggor, dan naikkan satu bangun-bangunan, dan sewakan itu kbun sama orang ladang, kmdian dia pergi lain negri.

2Bila sampai musim-nya itu orang hantarkan satu hamba-nya sama itu orang ladang, spaya trima itu kbun punya buah-buah deri-pada itu orang ladang.

3Ttapi dia-orang tangkap dan pukol sama dia, dan kasi dia pergi dngan tangan kosong.

4Dan lagi skali itu tuan-kbun hantarkan sama dia-orang lain satu hamba; dan sama dia ini pula dia-orang lukakan kpala-nya, dan kasi malu.

5Dan dia hantarkan lain satu pula; dan sama dia dia-orang bunohkan; dan banyak lain-lain lagi, sparoh dia-orang pukol, sparoh dia-orang bunoh.

6Tinggal lagi satu sama itu tuan-kbun, ia'itu satu anak yang dia kaseh: dia ini dia hantarkan sama dia-orang kmdian skali, dan kata, 'Dia-orang nanti kasi hormat sama anak sahya.'

7Ttapi itu orang ladang kata satu sama lain, 'Dia ini-lah waris-nya; mari kita bunoh sama dia, dan dia punya psaka boleh jadi kita punya.'

8Jadi dia-orang tangkap dan bunoh sama dia, habis itu dia-orang tolak dia kluar itu kbun.

9Sbab itu apa-kah tuan-kbun itu nanti buat? dia nanti datang binasakan itu orang ladang, dan kasikan itu kbun sama lain orang.

10Blum-kah kamu bacha ini kitab pun? 'Batu yang sgala tukang sudah buangkan, Itu-lah sudah di-jadikan kpala pnjuru:

11Ini-lah perbuatan Tuhan, Dan hairan-lah itu sama mata kita.'"

12Dan dia-orang chari jalan mau tangkap sama Isa; ttapi dia-orang takot orang-banyak; kerna dia-orang tahu yang dia sudah chakapkan ini perumpama'an atas dia-orang: dan dia-orang tinggalkan dia, dan pergi.

13Kmdian dia-orang hantarkan k-pada Isa brapa orang Farisi sama-sama orang Herodis, spaya boleh jratkan dia dalam berchakap.

14Bila sudah datang, dia-orang kata sama dia, "Guru, kita tahu yang guru satu orang bnar, dan t'ada pdulikan siapa pun: kerna guru t'ada tengok-tengok muka orang, ttapi btul ajarkan jalan Allah: ada-kah halal bayer chukai sama Kaisar atau tidak?

15Patut-kah kita kasi, atau jangan kasi?" Ttapi Isa tahu dia-orang punya pura-pura, jadi dia kata sama dia-orang, "Knapa kamu choba sama sahya? bawa kasi sahya tengok satu dinar."

16Dan dia-orang bawa. Isa kata sama dia-orang, "Ini gambar sama ini chap siapa punya?" Dia-orang kata sama dia, "Kaisar punya."

17Isa kata sama dia-orang, "Barang yang Kaisar punya, bayer-lah sama Kaisar; dan barang yang Allah punya, sama Allah. Dan itu orang smoa naik hairan skali sama Isa.

18Dan ada datang sama dia orang-orang Saduki, yang kata tidak ada kbangkitan, dan dia-orang tanya Isa, dan kata,

19"Guru, Musa sudah tulis sama kita, 'Jikalau satu orang punya sudara dlaki mati, dan tinggalkan bini-nya, dngan t'ada tinggal anak, sudara-nya patut ambil dia punya bini, spaya boleh dapat kturunan kerna sudara-nya.

20Ada tujoh adek-beradek dlaki: dan yang sulong kahwin satu bini, dan mati, dngan t'ada tinggalkan anak;

21habis itu, yang nombor dua ambil itu prempuan, dan dia pun mati dngan t'ada tinggalkan anak; dan yang nombor tiga pun bgitu juga:

22smoa itu tujoh orang t'ada tinggalkan kturunan. Kmdian skali itu prempuan pula mati.

23Jadi dalam itu kbangkitan, itu prempuan jadi siapa punya bini antara dia-orang? kerna tujoh-tujoh sudah kahwin sama dia."

24Isa kata sama dia-orang, "Bukan-kah ini sbab-nya kamu sudah ssat? ia'itu sbab kamu ta'tahu kitab-kitab, atau Allah punya kuasa?

25Kerna bila orang bangkit deri antara orang mati, dia-orang t'ada nanti kahwin atau di-kahwinkan; ttapi dalam shorga dia-orang sperti mla'ikat.

26Ttapi deri-hal orang mati berbangkit, t'ada-kah kamu bacha dalam buku Musa, dalam perkata'an deri-hal Pokok duri, bagimana Allah sudah berchakap sama Musa, dan sudah kata, 'Sahya-lah Allah Ibrahim, dan Allah Isahak, dan Allah Yakob'?

27Dia bukan-nya orang mati punya Allah, ttapi orang hidop punya. Kamu banyak ssat."

28Dan ada satu orang pnulis datang, dan dngar dia-orang berbantah, dan dia tahu yang Isa sudah kasi jawab sama dia-orang dngan s-patut-nya, jadi dia pula tanya,"Mana satu hukum yang nombor satu skali?"

29Isa jawab, "Hukum yang nombor satu, ini-lah: 'Dngar-lah, hei Isra'el; Tuhan kita Allah, dia-lah satu saja Tuhan,

30dan kaseh-lah Tuhan-mu Allah dngan s-bulat-bulat hati-mu, dan dngan s-gnap jiwa-mu, dan dngan sgala ingatan-mu dan dngan s-kuat-kuasa-mu.'

31Nombor dua punya ini-lah: 'Kaseh-lah sama orang sblah-mnyblah sperti diri-mu sndiri.' T'ada-lah lain hukum yang lbeh bsar deri-pada ini dua."

32Itu orang pnulis kata sama Isa, "Btul-lah, guru sudah kata bnar, yang dia itu satu saja, dan t'ada yang lain chuma dia:

33dan jikalau orang kaseh sama dia dngan s-bulat-bulat hati, dan dngan s-gnap pngertian, dan dngan s-kuat-kuat kuasa, dan jikalau orang kaseh sama orang sblah-mnyblah sperti diri sndiri, tntu-lah itu lbeh deri-pada sgala korban bakaran dan persmbahan pun."

34Bila Isa tengok yang dia sudah jawab dngan bijaksana, dia kata sama dia, "Angkau t'ada jauh deri-pada kraja'an Allah." Dan deri-pada itu hari, t'ada orang brani tanya dia apa-apa lagi.

35Kmdian Isa jawab, ktika dia ada mngajar di dalam ka'abah, dan kata, "Bagimana pula orang pnulis itu boleh kata yang Almaseh itu Anak Da'ud?

36Da'ud sndiri kata dalam Roh Alkudus, 'Tuhan sudah kata sama sahya punya Tuan, "Dudok-lah angkau di sblah kanan sahya, Sampai sahya taroh angkau punya musoh-musoh jadi alas kaki-mu."'

37Da'ud sndiri triak dia Tuan, dan deri mana pula dia boleh jadi anak-nya?" Dan kbanyakan punya orang dngarkan Isa dngan suka hati.

38Dalam dia punya pngajaran Isa kata, "Jaga kamu punya diri deri-pada orang pnulis, yang suka jalan-jalan dngan baju panjang-panjang, dan suka trima orang punya tabek di pasar,

39dan suka krusi yang mulia-mulia di rumah-smbahyang, dan tmpat yang mulia-mulia dalam perjamuan:

40yang habis makankan rumah-tangga prempuan bujang, dan bikin panjang-panjang punya do'a sbab pura-pura. Ini smoa-lah yang nanti trima lbeh brat punya hukuman."

41Dan Isa dudok tntang tmpat wang, dan tengokkan bagimana orang masokkan duit dalam itu tmpat wang: dan ada banyak orang kaya yang masokkan banyak wang.

42Dan datang pula satu prempuan bujang yang miskin, dan masokkan dua duit kchil, yang jadi satu sen.

43Dan Isa panggil dia punya murid-murid, dan kata sama dia-orang, "Dngan sunggoh sahya kata sama kamu, ini prempuan bujang yang miskin sudah masokkan lbeh deri-pada smoa orang yang ada masokkan wang di dalam itu tmpat:

44kerna dia-orang smoa sudah masokkan wang deri kmewahan-nya, ttapi ini prempuan deri kkurangan-nya sudah masokkan smoa yang dia ada, ia'itu smoa kahidopan-nya."



 <<  Markus 12 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel Single Panel