1Dan waktu Isa berjalan kluar deri ka'abah, satu anak-murid-nya kata sama dia, "Guru, tengok apa macham batu-batu dan apa macham punya bangunan ini."
2Isa kata sama dia, "Ada-kah angkau tengok ini bangunan yang bsar-bsar? di sini t'ada nanti tertinggal satu batu bersusun atas lain, yang t'ada nanti di-rubohkan."
3Dan waktu Isa ada dudok di atas Bukit Zaitun tntang ka'abah itu, Petrus, Yakob, Yahya dan Andrias tanya sama dia sndiri saja,
4"Bilang sama kita, bila-kah ini smoa nanti jadi? dan apa-kah tanda bila ini smoa mau di-sampaikan?"
5Dan Isa mula'i kata sama dia-orang, "Jaga baik-baik, jangan orang kasi kamu ssat.
6Banyak orang nanti datang dalam nama sahya, dan kata, 'Sahya ini-lah dia,' dan nanti ssatkan banyak orang.
7Dan bila kamu dngar deri-hal prang dan khabar prang, jangan terpranjat: smoa ini msti jadi, ttapi ksudahan itu blum lagi.
8Kerna bangsa nanti bangun mlawan bangsa, dan kraja'an mlawan kraja'an: dan dalam macham-macham tmpat nanti ada gmpa bumi, dan nanti ada klaparan pun: ini smoa permula'an sakit beranak.
9"Ttapi jaga-lah kamu punya diri sndiri: kerna orang nanti srahkan kamu k-pada majlis bichara; dan dalam rumah-smbahyang pun kamu nanti kna pukol; dan di dpan gobernor dan raja-raja pun kamu nanti berdiri kerna sahya punya sbab, mnjadi satu ksaksian sama dia-orang.
10Dan injil msti di-khabarkan dhulu k-pada sgala bangsa.
11Dan bila dia-orang bawa kamu dpan bichara, dan srahkan kamu, jangan jadi khuatir lbeh dhulu apa-kah kamu msti chakap: ttapi apa-apa nanti di-brikan k-pada kamu itu ktika, itu-lah kamu boleh chakap: kerna bukan-nya kamu yang berchakap, ttapi Roh Alkudus.
12Dan sudara nanti srahkan sudara spaya kna bunoh, dan bapa nanti srahkan anak-nya; dan anak-anak nanti bangun mlawan mak-bapa-nya, dan kasi dia-orang kna bunoh.
13Dan kamu nanti kna bnchi oleh sgala orang, kerna sahya punya nama: ttapi barang-siapa tahan sampai ksudahan, dia-lah nanti slamat.
14"Ttapi bila kamu tengok itu kbnchian yang bawa binasa berdiri di tmpat yang t'ada patut (biar-lah orang yang bacha ingat baik-baik), itu waktu orang yang ada di tanah Yahudiah, baik dia-orang lari pergi naik gunong-gunong:
15dan orang yang ada di atas rumah punya gnting-rata jangan turun, atau masok ambil kluar baik apa pun deri rumah-nya:
16dan orang yang ada di ladang jangan pulang balek ambil baju-nya.
17Ttapi susah-lah prempuan yang mngandong dan yang kasi anak tetek itu tempo.
18Dan baik kamu minta do'a spaya jangan jadi tempo musim sjok.
19Kerna itu ktika nanti jadi ksusahan yang blum pernah jadi dhulu, deri-pada asal kjadian yang Allah sudah jadikan sampai skarang ini, dan skali-kali t'ada nanti jadi lagi.
20Dan jikalau Tuhan t'ada kurangkan itu hari, t'ada satu orang pun boleh slamat: ttapi sbab orang-orang pilehan, yang dia sudah pileh itu, sudah pun dia kurangkan itu hari.
21Itu waktu jikalau orang kata sama kamu, 'Tengok, sini-lah Almaseh,' atau, 'Tengok, di situ-lah,' jangan-lah perchaya:
22kerna nanti terkluar palsu punya Almaseh dan palsu punya nabi-nabi, dan dia-orang nanti kasi tanda-tanda dan perkara yang hairan, spaya ssatkan, kalau boleh, orang pilehan skali pun.
23Ttapi jaga-lah kamu sndiri baik-baik: ingat, sahya sudah bilangkan kamu smoa perkara lbeh dhulu.
24"Ttapi itu ktika, kmdian deri itu ksusahan, matahari nanti mnjadi glap, dan bulan ta'nanti kasi trang-nya,
25dan bintang-bintang pun nanti gugor deri langit, dan sgala kuasa yang ada di langit nanti di-gonchangkan.
26Bharu-lah orang nanti nampak Anak-manusia datang dalam awan-awan dngan bsar punya kuasa dan kmulia'an.
27Kmdian dia nanti hantarkan mla'ikat-mla'ikat-nya, dan himponkan dia punya orang pilehan deri ampat pnjuru mata angin, deri hujong bumi sampai hujong langit.
28Deri pokok ara blajar-lah dia punya perumpama'an: waktu ranting-nya lagi lmbot, dan ada kluarkan daun, kamu tahu musim panas sudah dkat;
29bgitu juga kamu pun, bila kamu tengok ini smoa jadi, baik kamu tahu yang dia itu ada dkat, sampai di muka pintu.
30Dngan sunggoh sahya kata sama kamu, ini jman punya orang t'ada nanti lnnyap s-blum ini smoa jadi.
31Langit sama bumi nanti lnnyap, ttapi sahya punya perkata'an t'ada skali-kali nanti lnnyap.
32Ttapi deri-hal itu hari atau itu jam t'ada satu orang pun tahu mski pun mla'ikat di shorga atau Anak itu pun t'ada, chuma Bapa saja.
33Ingat-lah baik-baik, berjaga dan minta do'a: kerna kamu ta'tahu bila-kah ktika-nya.
34Sperti satu orang yang ada mnumpang di lain negri, bila dia sudah tinggalkan rumah-tangga-nya, dan kasi kuasa sama hamba-hamba-nya, dan k-pada masing-masing dia punya kerja, dan pnunggu pintu pun dia suroh jaga.
35Sbab itu jaga-lah: kerna kamu ta'tahu bila tuan-rumah itu nanti datang, 'ntah ptang-kah, atau tngah malam-kah, atau tempo ayam berkokok-kah, atau pagi-kah;
36jangan dia tiba-tiba datang dan jumpa kamu tertidor.
37Dan apa yang sahya skarang kata sama kamu, sahya kata sama smoa orang pun, 'Jaga-lah.'"
Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel