1Dan dia-orang sampai di sbrang tasek di tanah orang Garasa.
2Bila Isa turun deri prahu, itu juga dia terjumpa sama satu orang yang terkna jin yang najis datang deri kubor-kubor.
3Ini orang punya tmpat tinggal di kubor-kubor: dan satu orang pun ta'boleh ikatkan dia lagi, dngan rantai pun ta'boleh.
4Sbab krap kali orang sudah ikatkan dia dngan pasong dan rantai, dan rantai itu dia putuskan, dan pasong itu dia patah-patahkan: dan t'ada satu orang ada kuat-kuasa mau jinakkan dia.
5Dan slalu, baik siang baik malam, baik di dalam kubor-kubor, baik di gunong-gunong, dia bertriak-triak, dan potong-potongkan diri-nya dngan batu-batu.
6Dan bila dia tengok Isa deri jauh, dia lari datang berlutut dpan dia;
7dan dia bertriak-triak dngan suara yang bsar, kata, "Hei Isa, Anak Allah yang Maha Tinggi, sahya sama angkau apa ada terkna? sahya sumpahkan sama angkau dmi Allah jangan angkau seksakan sahya."
8Kerna Isa sudah kata sama dia, "Hei jin yang najis, kluar-lah angkau deri-pada ini orang."
9Dan Isa tanya sama dia, "Apa angkau punya nama?" Dan dia kata sama dia, "Nama sahya Ligion, kerna banyak juga kita ini."
10Dan itu orang minta sama Isa banyak-banyak jangan suroh dia-orang kluar deri negri itu.
11Dan di situ di sblah gunong punya churam ada satu kawan bsar punya babi chari makan.
12Dan dia-orang smoa minta sama dia, dan kata, "Suroh kita pergi sama itu babi-babi, spaya kita boleh masok dalam-nya."
13Dan dia biarkan. Dan itu jin najis Smoa kluar, dan masok dalam itu babi-babi: dan itu kawan babi lari turun itu gunong punya churam, terjun dalam tasek, ada kira-kira dua-ribu ekor, dan lmas dalam tasek.
14Dan orang-orang yang piara babi lari, dan kasi tahu di dalam negri dan di dusun pun. Dan orang datang mau tengok apa-kah itu perkara yang sudah jadi.
15Dan dia-orang datang sama Isa, dan tengok itu orang yang sudah terkna jin, dudok dngan sudah pakai pakaian, dan otak-nya btul, ia'itu orang yang sudah terkna ligion: dan dia-orang smoa naik takot.
16Dan orang-orang yang sudah tengok itu perkara trangkan sama dia-orang bagimana sudah jadi sama itu orang yang terkna jin, dan deri-hal itu babi-babi pun.
17Dan dia-orang mula'i minta dia kluar deri-pada dia-orang punya jajahan.
18Ktika Isa naik prahu, orang yang sudah terkna jin minta sama dia spaya dia boleh ikut sama Isa.
19Ttapi Isa t'ada kasi, balek dia kata sama dia, "Pulang rumah k-pada angkau punya orang, dan kasi tahu sama dia-orang brapa bsar punya perkara Tuhan sudah buat kerna angkau, dan sudah ksiankan sama angkau."
20Dan dia pergi, dan mula'i khabarkan di Dkapolis brapa bsar punya perbuatan Isa sudah buat kerna dia: dan smoa orang jadi hairan.
21Bila Isa sudah pergi sbrang pula dalam itu prahu, banyak orang sudah berhimpon datang sama dia: dan dia ada di tpi tasek.
22Dan ada satu kpala rumah-smbahyang, bernama Ya'ir, datang sama dia; bila dia ini tengok Isa, dia jatoh di kaki-nya,
23dan banyak-banyak minta sama dia, serta kata, "Anak prempuan sahya yang kchil ada hampir mati: minta Tuhan datang taroh tangan atas dia, spaya dia boleh slamat dan hidop."
24Dan Isa pergi sama-sama dia; dan banyak skali orang ikut, dan krumunkan dia.
25Dan ada satu prempuan yang sakit tumpah-tumpah darah sudah dua-blas tahun punya lama,
26dan dia sudah kna macham-macham susah deri-pada banyak doktor, dan smoa dia punya herta dia sudah blanjakan dngan t'ada apa untong-nya, balek tambah-tambah pnyakit-nya,
27ini prempuan sudah dngar Isa punya fasal, dan dia datang deri blakang, dan jamah baju Isa.
28Kerna dia kata, "Kalau sahya dapat jamah dia punya pakaian saja, sahya nanti slamat."
29Dan itu juga lelehan darah-nya pun kring; dan dia rasa dalam badan-nya dia sudah baik deri itu pnyakit.
30Dan itu juga Isa tahu dalam diri-nya yang kuasa sudah kluar deri-pada diri-nya, dan dia balek di tngah orang-banyak, dan kata, "Siapa sudah jamah pakaian sahya?"
31Dan murid-murid-nya kata sama dia, "Tuhan tengok ini orang-banyak krumunkan Tuhan, dan bagimana pula Tuhan kata, 'Siapa sudah jamah sahya?"
32Ttapi Isa pandang kliling mau tengok orang yang sudah buat ini.
33Dan itu prempuan datang dngan ktakotan dan mngglitar-nya, sbab dia tahu apa yang sudah jadi sama dia, dan berlutut dpan Isa, dan katakan sgala hal dngan s-bnar-nya.
34Dan Isa kata sama itu prempuan, "Hei anak prempuan, angkau punya perchaya sudah slamatkan angkau; pergi-lah dngan sjahtra, dan jadi baik deri itu pnyakit."
35S-tngah dia ada lagi berchakap, orang datang deri kpala rumah smbahyang punya rumah, dan kata, "Tuan punya anak sudah mati: knapa tuan susahkan guru lagi?"
36Ttapi Isa dngar itu perkata'an yang sudah di-katakan, dan kata sama itu kpala rumah-smbahyang, "Jangan takot, chuma perchaya saja."
37Dan satu orang pun dia t'ada kasi ikut sama dia, chuma Petrus dan Yahya dan Yakob sudara Yahya.
38Dan dia-orang sampai kpala rumah-smbahyang punya rumah; dan Isa tengok ada gadoh, ia'itu orang mnangis dan mratap bukan kchil banyak lagi.
39Dan bila Isa sudah masok dalam, dia kata sama dia-orang, "Knapa kamu bikin gadoh dan mnangis? Ini budak bukan-nya mati, chuma tidor saja."
40Dan orang tertawakan dia. Ttapi bila dia sudah suroh smoa orang kluar, dia bawa itu budak punya mak-bapa, dngan orang yang ada bersama-sama dia, dan masok di mana budak itu ada.
41Dia pegang itu budak punya tangan, dan kata sama dia, "Talita kumi:" yang tersalin arti-nya, "Hei budak, sahya kata sama angkau, bangun-lah."
42Dan itu juga itu budak bangun, dan berjalan; kerna dia punya umor dua-blas tahun. Dan itu juga dia-orang terpranjat bukan kchil hairan lagi.
43Dan Isa psan dia-orang baik-baik jangan satu orang pun dapat tahu deri-hal ini: dan dia suroh kasi makan sama itu budak prempuan.
Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel