Alkitab Mobile SABDA
[VER] : [BABA]     [PL]  [PB] 
 <<  Roma 1 >> 

1Deri-pada Paulus, hamba Isa Almaseh, yang sudah di-panggil mnjadi rasul, dan di-asingkan spaya khabarkan injil Allah,

2yang dia sudah janji lbeh dhulu dngan mulut nabi-nabi-nya dalam kitab-kitab yang kudus,

3deri-hal Anak-nya, yang sudah jadi deri-pada bneh Da'ud dalam hal badan,

4dan yang dngan kuasa sudah di-nyatakan jadi Anak Allah, dalam hal roh kkudusan oleh kbangkitan-nya deri antara orang mati; ia'itu Tuhan kita Isa Almaseh.

5Dan oleh dia-lah kita sudah trima anugrah dan pangkat-rasul, deri sbab nama-nya, spaya bawa orang turut perchaya antara sgala bangsa:

6dan antara ini smoa ada kamu pun, yang sudah di-panggil mnjadi Isa Almaseh punya:

7datang k-pada smoa orang di negri Rom, yang Allah kaseh, dan yang di-panggil mnjadi orang-kudus: biar-lah anugrah dan sjahtra sampai k-pada kamu smoa deri-pada Bapa kita Allah, dan Tuhan kita Isa Almaseh.

8Mula-mula sahya mnguchap shukor k-pada sahya punya Allah oleh Isa Almaseh fasal kamu smoa, sbab kamu punya perchaya sudah mashhur dalam sluroh dunia.

9Kerna Allah yang sahya smbahyang dngan roh sahya dalam injil Anak-nya, dia-lah jadi sahya punya saksi, bagimana sahya t'ada brenti sbotkan kamu punya nama, dan slalu dalam sahya punya do'a,

10sahya minta spaya bagimana pun skarang pula, dngan kahandak Allah, sahya boleh dapat jalan snang datang k-pada kamu.

11Kerna sahya ada rindu mau tengok kamu, spaya sahya boleh bhagikan k-pada kamu sikit kurnia rohani, spaya kamu boleh di-ttapkan;

12ia'itu spaya sahya ini dngan kamu boleh sama-sama dapat hibur antara kamu, oleh masing-masing punya perchaya, ia'itu kamu punya dan sahya punya.

13Dan sahya mau kasi tahu sama kamu, hei sudara-sudara, yang brapa kali sahya sudah tntukan mau datang k-pada kamu, ttapi sampai skarang sahya tersangkot juga; sahya punya maksud spaya boleh dapat buah-buah di antara kamu pula, sama sperti di antara sgala bangsa yang lain pun.

14Sahya ini ada berhutang baik k-pada orang Grik, baik k-pada orang bangsa-asing, baik k-pada orang yang bijaksana, baik k-pada orang yang kurang bijak.

15Jadi itu, sahya suka skali dngan s-boleh-boleh-nya mau khabarkan injil k-pada kamu yang di Rom pun.

16Kerna t'ada-lah sahya malu sama injil itu, sbab ia'itu-lah kuasa Allah yang bawa slamat k-pada tiap-tiap orang yang perchaya; mula-mula k-pada orang Yahudi, dan k-pada orang Grik pun.

17Kerna di dalam-nya ada di-nyatakan kbnaran Allah deri-pada perchaya k-pada perchaya: sperti sudah tersurat, "Orang yang bnar nanti hidop deri-pada perchaya."

18Kerna Allah punya marah ada di-nyatakan deri shorga atas sgala hal t'ada kbaktian dan sgala kjahatan orang-orang yang skatkan perkara kbtulan itu dngan kjahatan-nya;

19kerna barang yang orang boleh dapat tahu deri-hal Allah ada nyata dalam hati dia-orang; kerna Allah sudah nyatakan k-pada dia-orang.

20Kerna deri tempo sgala alam sudah di-jadikan, sgala perkara Allah yang ta'nampak punya, ia'itu kuasa dan ktuhanan-nya yang kkal, boleh juga orang nampak dngan trang, sbab jadi nyata deri perbuatan-nya; spaya dia-orang t'ada daleh lagi:

21kerna mski-pun dia-orang tahu sama Allah, dia-orang t'ada juga muliakan dia s-kdar ktuhanan-nya, dan dia-orang t'ada pula balas trima kaseh; ttapi dia-orang punya fikiran jadi sia-sia, dan dia-orang punya hati yang sdia bbal jadi glap.

22Itu orang smoa buat diri-nya bijaksana, ttapi dia-orang jadi bodoh,

23dan gantikan kmulia'an Allah yang ta'boleh binasa itu dngan patong s-rupa manusia yang binasa, dan burong-burong, dan binatang yang ampat kaki, dan yang mrayap.

24Itu sbab-lah Allah sudah srahkan dia-orang dalam dia-orang punya k'inginan hati k-pada kkotoran, sampaikan dia-orang hinakan dia-orang punya badan satu sama lain:

25kerna Allah punya kbtulan dia-orang sudah gantikan dngan perkara bohong, dan sudah kasi hormat dan smbahyang sama barang yang di-jadikan, lbeh deri-pada sama Allah yang mnjadikan: ia'itu Tuhan yang di-puji s-lama-lama-nya. Amin.

26Deri sbab ini-lah Allah sudah srahkan dia-orang k-pada hawa-nafsu yang hina: kerna prempuan-prempuan-nya buat apa yang t'ada biasa ganti yang biasa:

27dan bgitu juga yang jantan-nya pun, t'ada lagi pakai prempuan sperti biasa, dan jadi hangat dalam k'inginan-nya satu sama lain, jantan sama jantan buat kerja yang malu, serta trima dalam diri-nya balasan yang padan sama dia-orang punya kssatan.

28Dan sperti dia-orang ta'mau taroh pngtahuan deri-hal Allah, bgitu juga Allah sudah srahkan dia-orang k-pada ingatan yang salah, sampaikan dia-orang buat apa yang t'ada patut;

29dia-orang ada pnoh dngan dngki, bunoh, pertngkaran, tipu-daya, dan dndam; jadi orang yang bawa mulut,

30yang mngumpat, kbnchian Allah, kurang ajar, sombong, mgahkan diri, mnchari akal jahat, derhaka sama mak-bapa,

31kurang akal, t'ada ikut janji, t'ada sayang sudara, dan t'ada ksian:

32yang mski-pun dia-orang tahu hukuman Allah, ia'itu orang yang buat ini smoa msti mati, bukan saja dia-orang sndiri buat itu, ttapi dia-orang s-tuju pula sama orang yang buat bgitu.



 <<  Roma 1 >> 


Bahan Renungan: SH - RH - ROC
Download
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
© 2010-2019
Alkitab.SABDA.org

Android.SABDA.org
SABDA.mobi
Bantuan
Single Panel

Laporan Masalah/Saran