1Jadi skarang t'ada-lah ada hukuman sama orang-orang yang di dalam Isa Almaseh.
2Kerna hukum Roh yang mmbri hidop dalam Isa Almaseh sudah bebaskan sahya deri-pada hukum dosa dan kmatian.
3Kerna Allah sudah buat apa yang hukum-taurit ta'boleh buat, sbab ada lmah deri sbab tabi'at manusia, ia'itu dia sudah hantarkan Anak-nya sndiri dngan rupa tabi'at manusia yang berdosa mnjadi korban kerna dosa, dan sudah jatohkan hukum atas dosa dalam tabi'at manusia:
4spaya apa yang hukum-taurit sudah psan boleh di-sampaikan dalam kita ini yang bawa diri bukan-nya turut tabi'at dunia, ttapi turut roh.
5Kerna orang-orang yang turut tabi'at dunia ingat perkara dunia, ttapi orang-orang yang turut roh itu ingat perkara rohani.
6Kerna ingatan dunia ia'itu kmatian; ttapi ingatan rohani ia'itu hidop dan sntosa:
7sbab ingatan dunia ia'itu permusohan sama Allah; kerna ini ingatan t'ada tundok k-pada hukum Allah, dan ta'boleh pula:
8dan orang yang dalam tabi'at dunia ta'boleh jadi berknan sama Allah.
9Ttapi kamu ini bukan dalam tabi'at dunia, ttapi dalam roh, ia'itu jikalau Roh Allah ada tinggal dalam kamu. Dan jikalau satu orang tidak ada Roh Almaseh sama dia, itu orang bukan-nya Almaseh punya.
10Ttapi jikalau Almaseh ada dalam kamu, badan itu mati-lah deri sbab dosa; ttapi roh itu hidop deri sbab kbnaran.
11Ttapi jikalau ada tinggal dalam kamu Roh dia itu yang sudah bangkitkan Isa deri antara orang mati, dia juga yang sudah bangkitkan Isa Almaseh itu deri antara orang mati nanti hidopkan badan kamu yang nanti mati itu oleh Roh-nya yang tinggal dalam kamu.
12Jadi itu, hei sudara-sudara, kita ini bukan-nya orang yang berhutang sama tabi'at dunia, sampaikan kita msti hidop turut tabi'at dunia:
13kerna jikalau kamu hidop turut tabi'at dunia, kamu msti mati; ttapi jikalau oleh roh kamu kasi mati badan punya perbuatan, tntu-lah kamu nanti hidop.
14Kerna s-brapa orang yang ada di-pimpinkan oleh Roh Allah, dia-orang-lah anak-anak Allah.
15Kerna bukan-nya kamu sudah trima roh perhamba'an lagi s-kali yang bawa takot; ttapi kamu sudah trima roh anak-angkat, dan dalam roh ini-lah kita bertriak, "Abba, Bapa."
16Dan Roh sndiri saksikan sama-sama kita punya roh, yang kita ini anak-anak Allah:
17dan jikalau kita anak-anak-nya, kita mnjadi waris pula; ia'itu waris Allah, dan sama-waris dngan Almaseh; ia'itu kalau kita sama-sama mrasa susah, spaya kita boleh sama-sama di-muliakan pun.
18Kerna sahya punya fikir, smoa ini tempo punya sngsara t'ada padan mau di-samakan dngan kmulia'an yang nanti di-nyatakan k-pada kita-orang.
19Kerna dngan rindu sgala kjadian ada nantikan anak-anak Allah di-nyatakan.
20Kerna kjadian ini sudah di-tundokkan k-pada hal klmahan, bukan-nya deri sndiri punya suka, ttapi deri sbab dia itu yang sudah tundokkan itu,
21dngan harap yang kjadian itu nanti di-bebaskan deri-pada mnjadi binasa punya hamba, dan masok kmulia'an anak-anak Allah punya kbebasan.
22Kerna kita tahu bagimana sgala kjadian ada sama-sama mngrang dan sama-sama mrasa sakit-beranak sampai skarang ini.
23Dan bukan itu saja, ttapi kita ini pun yang ada itu Roh punya buah-bungaran, kita pun mngrang dalam diri kita serta mnantikan kita punya pangkat anak-angkat, ia'itu kita punya badan punya tbusan.
24Dan dalam harap-lah kita sudah di-slamatkan: ttapi harap yang boleh nampak punya itu bukan-nya harap: kerna siapa pula ada harap apa-apa yang dia tengok?
25Ttapi jikalau kita ada harap apa-apa yang kita t'ada tengok, bharu-lah kita nantikan itu dngan sabar.
26Dan bgitu juga Roh pun bantukan kita punya klmahan: kerna kita ta'tahu apa macham mau minta do'a dngan s-patut-nya; ttapi Roh sndiri mintakan kerna kita dngan mngrang yang tidak ada perkata'an-nya.
27Dan dia itu yang preksa hati manusia tahu apa-kah Roh punya maksud, kerna Roh mintakan kerna orang-orang kudus ikut kahandak Allah.
28Dan kita tahu juga yang k-pada orang-orang yang kaseh sama Allah smoa perkara tolong mndatangkan kbaikan, ia'itu k-pada orang-orang yang sudah di-panggil sperti maksud-nya.
29Kerna orang yang dia sudah tahu dhulu, dia sudah tntukan dhulu mnjadi s-rupa chontoh Anak-nya, spaya Anak-nya mnjadi Anak sulong antara banyak adek-beradek:
30dan orang yang dia sudah tntukan dhulu, dia-orang juga dia sudah panggil: dan orang yang dia sudah panggil dia-orang dia sudah bnarkan pula: dan orang yang dia sudah bnarkan, dia-orang dia sudah muliakan pula.
31Kalau bgitu apa-kah kita boleh bilang deri-hal ini smoa? Kalau Allah ada sblah kita, siapa pula boleh mlawan kita?
32Tuhan yang t'ada tahankan Anak-nya sndiri, ttapi sudah srahkan dia kerna kita smoa, bagimana pula dia t'ada nanti kurniakan sama-sama dia smoa perkara k-pada kita?
33Siapa-kah nanti d'awa Allah punya orang pilehan? Allah juga yang bnarkan;
34siapa pula yang boleh salahkan? Isa Almaseh-lah yang sudah mati, atau lbeh patut di-katakan, yang sudah di-bangkitkan deri antara orang mati, dan dia-lah di sblah kanan Allah; dan ada minta do'a kerna kita.
35Siapa-kah yang boleh chraikan kita deri-pada kaseh Almaseh? Ksusahan-kah? atau sngsara-kah? atau aniaya-kah? atau klaparan-kah? atau hal tlanjang-kah? atau bahya-kah? atau pdang-kah?
36Sperti ada tersurat, "S-panjang hari kita ada kna bunoh kerna sbab Tuhan, Kita sudah di-hitongkan sperti domba yang nanti kna smbleh."
37Ttapi dalam smoa ini perkara kita sangat mnang oleh dia itu yang sudah kaseh sama kita.
38Kerna sahya rasa tntu, yang baik mati, atau hidop, atau mla'ikat, atau kuasa-kuasa, atau perkara yang ada skarang, atau yang nanti datang, atau kkuatan,
39atau tinggi, atau dalam, atau apa-apa kjadian yang lain, ta'boleh chraikan kita deri-pada kaseh Allah yang di dalam Tuhan kita Isa Almaseh.
Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel