Alkitab Mobile SABDA
[VER] : [BABA]     [PL]  [PB] 
 <<  Roma 9 >> 

1Sahya ada bilang apa yang btul sperti orang Kristen, dan sahya t'ada bohong, sbab sahya punya angan-angan hati dalam Roh Alkudus bersaksi sama-sama sahya,

2yang sahya ini sangat-lah susah dan rasa sakit yang ta'berrnti-rnti dalam hati sahya.

3Kerna sahya suka juga kalau kna jadi la'anat jauh deri-pada Almaseh, deri sbab sudara-sudara sahya, yang satu bangsa sama sahya:

4dia-orang-lah orang Isra'el; dan itu pangkat anak-angkat dia-orang punya, dan kmulia'an, dan smoa perjanjian, dan hukum-taurit sama smbahyang-nya, dan sgala berkat-yang sudah di-janjikan:

5dan itu nenek-moyang pun dia-orang punya, dan deri antara dia-orang juga Almaseh itu sudah jadi s-kdar badan-nya. Dia-lah yang atas sklian, Allah yang di-puji s-lama-lama-nya. Amin.

6Ttapi hal itu bukan-nya sperti perkata'an Allah sudah di-tpikan. Kerna deri antara orang Isra'el bukan smoa-nya Isra'el:

7dan bukan smoa-nya anak-anak Ibrahim sunggoh pun deri kturunan-nya: ttapi sudah tersbot, "Dalam Isahak-lah angkau punya kturunan nanti di-panggil."

8Ia'itu anak-anak yang nanti jadi deri-pada badan-nya bukan-nya dia-orang itu anak-anak Allah; ttapi anak-anak perjanjian itu-lah yang di-hitongkan jadi kturunan-nya.

9Kerna ini perkata'an satu perjanjian punya perkata'an, ia'itu, "Dkat ini tempo sahya nanti datang, dan Sarah nanti dapat satu anak dlaki."

10Dan bukan ini saja, ttapi Ribkah pun bila dia sudah mngandong oleh satu orang, ia'itu kita punya nenek-moyang Isahak,

11kerna s-blum anak-kmbar-nya sudah jadi, dan s-blum buat apa-apa baik atau jahat, spaya ttap juga maksud Allah dalam hal dia pileh, ia'itu bukan-nya deri sbab perbuatan orang, ttapi deri-pada pilehan-nya,

12sudah di-katakan k-pada Ribkah itu, "Yang sulong nanti jadi hamba k-pada yang kchil."

13Sperti ada tersurat, "Sama Yakob sahya sudah kaseh, ttapi sama Isu sahya sudah bnchi."

14Kalau bgitu, apa-kah kita boleh bilang? Allah t'ada bnar-kah? Jangan skali-kali bgitu.

15Kerna Allah kata sama Musa, "Sahya nanti ksiankan barang-siapa yang sahya ksiankan, dan sahya nanti sayangkan barang-siapa yang sahya sayangkan."

16Jadi itu, bukan-nya deri-pada orang yang mau, dan bukan deri-pada orang yang usahakan diri, ttapi deri-pada Allah yang ksiankan.

17Kerna kitab bilang sama Fira'un, "Ini-lah sbab-nya sahya sudah tinggikan sama angkau, ia'itu spaya dalam angkau punya hal sahya boleh tunjokkan sahya punya kuasa, dan spaya sahya punya nama boleh di-mashhurkan sluroh dunia."

18Jadi itu, dia ksiankan barang-siapa yang dia mau ksiankan, dan dia kraskan barang-siapa yang dia mau kraskan.

19Kalau bgitu angkau nanti bilang sama sahya, "Knapa-kah Allah lagi salahkan orang? kerna siapa pula ada tahankan dia punya kahandak?"

20Ttapi lbeh patut bilang, "Siapa-kah angkau manusia ini yang bertngkar mlawan sama Allah?" Boleh-kah satu barang yang orang bikin bilang sama orang yang bikin itu, "Knapa angkau sudah bikin sahya ini macham?"

21Atau satu tukang priok, t'ada-kah dia kuasa atas tanah liat itu mau bikin deri-pada s-gumpal itu juga satu bkas kerna pkerja'an yang mulia, dan lagi satu kerna pkerja'an yang t'ada mulia?

22Katakan, kalau Allah mau tunjokkan dia punya marah, dan mau kasi tahu dia punya kuasa, dalam hal dia sabarkan dngan banyak panjang-hati sama bkas yang kna marah yang sdia mau kna binasa:

23dan spaya dia boleh kasi tahu dia punya kmulia'an punya kkaya'an di atas bkas yang dapat ksian, yang dia sudah siapkan dhulu mau dapat kmulia'an,

24ia'itu kita ini juga, yang dia sudah panggil, bukan saja deri antara orang Yahudi, ttapi deri antara orang bangsa-asing pun.

25Sperti dia kata dalam kitab Hosia pula, "Yang bukan bangsa sahya, dia-lah sahya nanti sbotkan bangsa sahya: Dan yang bukan jadi kkaseh, dia-lah sahya nanti sbotkan kkaseh.

26Dan nanti jadi pula di tmpat di mana dia sudah bilang sama dia-orang, 'Kamu ini bukan sahya punya bangsa,' Di situ-lah juga dia-orang nanti di-sbotkan anak-anak Allah yang hidop itu."

27Dan Yash'aya pun ada bertriak deri-hal Isra'el, "Sunggoh pun bilangan anak-anak Isra'el sperti pasir di tpi laut skali pun, ttapi chuma yang tertinggal-nya nanti di-slamatkan:

28kerna Tuhan nanti buat dia punya perkata'an di atas bumi ini, sambil kasi habis dan kasi lkas."

29Dan sperti Yash'aya sudah kata dhulu, "Jikalau Tuhan sgala bala-tntra itu t'ada tinggalkan sama kita satu bneh, Tntu-lah kita sudah mnjadi sperti Sadom dan sudah di-samakan sperti Amurah."

30Kalau bgitu apa-kah kita boleh bilang? Ini-lah, yang orang-bangsa-asing itu, yang dhulu t'ada tuntut kbnaran, sudah dapat kbnaran, ia'itu kbnaran yang datang deri perchaya:

31ttapi Isra'el, yang tuntut hukum kbnaran, t'ada juga sampai k-pada hukum itu.

32Knapa pula? Sbab dia-orang chari bukan dngan perchaya, ttapi dngan perbuatan-nya juga. Dia-orang sudah terantok k-pada batu terantok;

33sama sperti ada tersurat, "Ingat-lah sahya ada ltak dalam Sion satu batu terantok, ia'itu satu batu yang kasi orang jatoh: Dan orang yang perchaya sama dia t'ada nanti kna matin."



 <<  Roma 9 >> 


Bahan Renungan: SH - RH - ROC
Download
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
© 2010-2019
Alkitab.SABDA.org

Android.SABDA.org
SABDA.mobi
Bantuan
Single Panel

Laporan Masalah/Saran