Alkitab Mobile SABDA
[VER] : [BABA]     [PL]  [PB] 
 <<  Yakobus 1 >> 

1Tabek deri-pada Yakob, hamba Allah dan hamba Tuhan kita Isa Almaseh, datang k-pada itu dua-blas suku-bangsa yang bertaburan.

2Hei sudara-sudara, bila kamu kna macham-macham pnchoba'an, bilangkan itu ksuka'an bsar;

3sbab kamu tahu yang bila kamu punya perchaya kna uji, itu datangkan sabar.

4Dan biar-lah sabar itu buat kerja yang smpurna, spaya kamu boleh mnjadi smpurna dan lngkap, dngan t'ada kurang apa-apa.

5Ttapi jikalau ada orang antara kamu yang kurang bijaksana, baik dia minta deri-pada Allah, yang kasi k-pada smoa orang dngan kmurahan-nya, dan dngan t'ada chlakan; dan nanti di-kasikan k-pada dia.

6Ttapi biar dia minta dngan perchaya, jangan skali-kali bimbang hati-nya: kerna orang yang bimbang-hati itu ada s-rupa ombak laut, yang kna angin dan kna lambong.

7Kerna jangan itu orang fikir yang dia nanti trima apa-apa deri-pada Tuhan;

8satu orang yang hati berdua, ta'tntu dalam smoa dia punya jalan.

9Ttapi biar-lah sudara yang rndah mgahkan diri-nya dalam hal dia di-tinggikan:

10dan yang kaya dalam hal dia di-rndahkan: sbab dia nanti hilang sperti bunga rumput itu.

11Kerna matahari kluar dngan panas trek, dan layukan itu rumput: dan bunga-nya luroh, dan rupa-nya punya chantek pun hilang; bgitu juga orang kaya nanti layu di tngah jalan-nya.

12Berkat-lah orang yang tahan pnchoba'an: kerna bila dia sudah tahan uji, dia nanti trima kahidopan punya makota, yang Tuhan sudah janji k-pada orang yang kaseh sama dia.

13Bila kna choba, jangan satu orang pun bilang, "Sahya ini kna choba deri-pada Allah?" kerna Allah ta'boleh di-choba oleh kjahatan, dan dia sndiri t'ada choba satu orang pun;

14ttapi masing-masing orang kna choba bila dia kna tarek oleh dia sndiri punya k'inginan, dan kna tipu.

15Habis itu, itu k'inginan mngandong, dan beranakkan dosa: dan dosa pula, bila sudah chukop umor, kluarkan kmatian.

16Hei sudara-sudara yang sahya kaseh, jangan-lah kna ssat.

17Tiap-tiap pmbrian yang baik dan tiap-tiap kurnia yang smpurna datang deri atas, dan turun deri-pada Bapa yang jadikan sgala trang, dia-lah yang ta'boleh berubah, dan t'ada bayang-bayang yang datang sbab pusing.

18Deri sbab dia sndiri punya kahandak dia sudah beranakkan kita dngan perkata'an deri-hal kbtulan itu, spaya kita boleh mnjadi sperti buah-bungaran di antara sgala kjadian-nya.

19Kamu tahu ini, hei sudara-sudara yang sahya kaseh. Ttapi biar masing-masing orang chpat dngar, lambat chakap, lambat marah;

20kerna manusia punya marah t'ada jalankan Allah punya kbnaran.

21Sbab itu baik-lah kamu buangkan smoa kotor dan kjahatan yang ada tertinggal lagi, dan dngan lmbot hati trima itu pngajaran yang tertanam dalam kamu punya hati, yang ada kuasa slamatkan kamu punya jiwa.

22Ttapi baik kamu jadi orang yang buat itu pngajaran, bukan yang dngar saja, dan yang tipukan diri kamu sndiri.

23Kerna kalau barang siapa jadi orang yang dngar itu pngajaran dan bukan orang yang buat, dia itu sperti satu orang yang tengok sndiri punya muka dalam chermin:

24kerna dia tengok diri-nya, dan pergi, dan itu juga dia lupa apa macham dia punya rupa.

25Ttapi orang yang preksa hukum yang smpurna yang bebaskan orang, dan tinggal ttap, sdang dia bukan-nya orang yang dngar, habis lupa, ttapi orang yang buat kerja-nya, dia-lah nanti di-berkatkan dalam dia punya perbuatan.

26Jikalau satu orang sangkakan diri-nya beragama, sdang dia t'ada tahankan dia punya lidah, ttapi tipukan dia punya hati, ini orang punya agama sia-sia saja.

27Agama yang suchi dan t'ada chachat dpan Bapa kita Allah ini-lah, ia'itu mlawat anak-anak piatu dan prempuan-prempuan bujang dalam dia-orang punya hal-susah, dan pliharakan diri-nya deri-pada dunia ini dngan t'ada berchla.



 <<  Yakobus 1 >> 


Bahan Renungan: SH - RH - ROC
Download
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
© 2010-2019
Alkitab.SABDA.org

Android.SABDA.org
SABDA.mobi
Bantuan
Single Panel

Laporan Masalah/Saran