Alkitab Mobile SABDA
[VER] : [BABA]     [PL]  [PB] 
 <<  Yakobus 2 >> 

1Hei sudara-sudara, jangan-lah kamu tengok-tengok muka orang sdang kamu pegang perchaya dalam Tuhan kita Isa Almaseh.

2Kerna kalau ada orang masok kamu punya rumah-smbahyang, yang pakai chinchin mas dan chantek-chantek punya pakaian, dan masok pula satu orang miskin yang pakai pakaian burok;

3dan kamu tengokkan orang yang pakai chantek itu, dan kata, "Dudok sini baik;" dan kamu kata sama orang miskin itu, "Berdiri di situ, atau dudok dkat sahya punya alas kaki;"

4bukan-kah kamu beda-bedakan dalam kamu punya hati, dan mnjadi hakim-hakim yang bicharakan yang jahat?

5Dngar-lah, hei sudara-sudara yang sahya kaseh; bukan-kah Allah sudah pileh orang-orang yang miskin deri-hal perkara dunia, mnjadi kaya dalam hal perchaya, dan waris kraja'an yang dia sudah janji k-pada smoa orang yang kaseh sama dia?

6Ttapi kamu ini sudah kurang hormatkan orang miskin. Bukan-kah orang kaya-kaya yang kras sama kamu, dan dia-lah yang helakan kamu dpan tmpat-tmpat bichara?

7Bukan-kah dia-orang juga yang umpatkan itu nama yang mulia yang di-sbot atas kamu?

8Dalam pada itu, kalau kamu turut itu nombor satu punya hukum, sperti ada dalam kitab, "Kaseh-lah angkau punya orang sblah-mnyblah sperti diri sndiri," baik juga kamu punya perbuatan:

9ttapi jikalau kamu tengok-tengok muka orang, kamu berdosa, sdang hukum-taurit trangkan kamu jadi orang salah.

10Kerna barang-siapa simpan s-gnap hukum-taurit itu, ttapi terantok kaki dalam satu perkara, dia kna salah dalam sklian.

11Kerna dia yang kata, "Jangan buat zina," dia juga kata, "Jangan bunoh." Jadi, jikalau angkau t'ada buat zina, ttapi ada bunoh, angkau mnjadi orang yang mlanggar hukum.

12Baik kamu chakap dan buat klakuan sperti orang yang nanti di-hukumkan mnurut hukum yang bebaskan orang.

13Kerna orang yang t'ada tunjokkan ksian, nanti kna hukum dngan t'ada ksian pula: ksian mgahkan diri-nya atas hukuman.

14Hei sudara-sudara, apa guna-nya kalau satu orang kata yang dia ada perchaya, ttapi t'ada perbuatan? boleh-kah itu perchaya slamatkan dia?

15Jikalau satu sudara jantan atau sudara prempuan t'ada pakaian atau kurang s-hari-hari punya makanan,

16dan satu orang antara kamu bilang sama dia-orang, "Slamat jalan, biar-lah kamu panas dan knnyang;" ttapi t'ada kamu kasi dia apa yang patut kerna badan-nya; apa guna-nya?

17Bgitu juga, kalau t'ada dngan perbuatan sama-sama, perchaya itu ada mati dalam diri-nya.

18Ada orang boleh kata, "Angkau ada perchaya, dan sahya ada perbuatan: tunjokkan sahya angkau punya perchaya dngan t'ada perbuatan, dan sahya pula dngan sahya punya perbuatan nanti tunjokkan angkau sahya punya perchaya.

19Angkau perchaya yang Allah chuma satu saja; baik juga: smoa jin pun perchaya, dan mngglitar.

20Baik angkau tahu, hei orang yang sia-sia, yang perchaya itu, kalau t'ada perbuatan sama-sama, t'ada berbuah?

21Bukan-kah kita punya nenek-moyang Ibrahim sudah di-bnarkan deri sbab perbuatan, dalam hal dia sudah persmbahkan anak-nya Isahak di atas tmpat korban?

22Angkau tengok yang perchaya dan perbuatan-nya sudah bkerja sama-sama, dan perchaya itu sudah di-smpurnakan deri sbab perbuatan;

23dan sudah-lah di-bnarkan kitab yang kata, "Dan Ibrahim perchaya Allah, dan itu sudah di-bilangkan k-pada dia jadi kbnaran:" dan dia sudah di-sbotkan "sohbat Allah."

24Kamu tengok yang orang ada di-bnarkan deri sbab perbuatan, dan bukan saja deri sbab perchaya.

25Dan bgitu juga Rahab, prempuan sundal itu, bukan-kah dia sudah di-bnarkan deri sbab perbuatan, dalam hal dia sudah sambot itu psuroh smoa dan hantarkan dia-orang kluar ikut jalan yang lain?

26Kerna sperti badan kalau t'ada roh ada mati, bgitu juga perchaya itu kalau t'ada perbuatan sama-sama ada mati juga.



 <<  Yakobus 2 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel Single Panel