Alkitab Mobile SABDA
[VER] : [BABA]     [PL]  [PB] 
 <<  Yohanes 1 >> 

1Mula-mula ada perkata'an itu, dan perkata'an itu ada sama-sama Allah, dan perkata'an itu pula Allah.

2Ia'itu ada mula-mula sama-sama Allah.

3Smoa perkara sudah di-jadikan oleh dia; dan dngan t'ada dia satu apa t'ada di-jadikan yang sudah jadi.

4Dalam dia ada hidop; dan itu hidop-lah trang manusia.

5Dan trang itu berchahya dalam glap; dan glap itu t'ada ambil tahu fasal trang itu.

6Ada satu orang yang Allah sudah hantarkan, nama-nya Yahya.

7Ini orang datang kerna ksaksian, mau bersaksi deri-hal trang itu, spaya oleh dia sgala orang boleh perchaya.

8Dia sndiri bukan trang itu, ttapi dia sudah datang spaya boleh bersaksi deri-hal trang itu.

9Trang yang bnar itu ada datang dalam dunia, ia'itu yang trangkan tiap-tiap orang.

10Dia ada dalam dunia, dan dunia sudah di-jadikan oleh dia, ttapi dunia t'ada knal sama dia.

11Dia sudah datang k-pada dia sndiri punya, ttapi orang-nya sndiri t'ada trima sama dia.

12Ttapi s-brapa banyak orang yang sudah trima sama dia, k-pada dia-orang dia kasi kuasa mnjadi anak-anak Allah, ia'itu k-pada orang-orang yang perchaya sama nama-nya:

13yang sudah di-beranakkan, bukan deri-pada darah, dan bukan deri kahandak badan, dan bukan deri kahandak manusia, ttapi deri-pada Allah.

14Dan perkata'an itu mnjadi manusia, dan mnumpang di antara kita (dan kita sudah tengok dia punya kmulia'an, sperti kmulia'an Bapa punya Anak tunggal), dan dia pnoh dngan anugrah dan kbtulan.

15Yahya bersaksi deri-hal dia, dan bertriak kata, "Ini-lah dia itu yang sahya sudah kata, dia yang ada datang kmdian deri-pada sahya sudah jadi lbeh dhulu deri-pada sahya: kerna sudah ada lbeh dhulu sahya."

16Kerna deri-pada dia punya klempahan kita smoa sudah trima, ia'itu anugrah atas anugrah.

17Kerna hukum-taurit sudah di-brikan oleh Musa, anugrah dan kbtulan datang oleh Isa Almaseh.

18Satu orang pun blum pernah tengok Allah, baik bila-bila pun; Anak yang tunggal yang ada di dalam pangkuan Allah, dia sudah nyatakan.

19Ini-lah Yahya punya ksaksian, ktika orang-orang Yahudi hantarkan imam-imam sama orang-orang Liwi deri Yerusalim mau tanya sama dia, "Angkau ini siapa?"

20Dan dia mngaku dngan t'ada bersangkal, dia mngaku, "Sahya ini bukan Almaseh."

21Dan dia-orang tanya dia, "Apa macham pula? Angkau ini llia-kah?" Dan dia kata, "Bukan." "Angkau nabi itu-kah?" Dan dia jawab, "Bukan."

22Sbab itu dia-orang kata sama dia, "Siapa-kah angkau ini? spaya kita boleh kasi satu jawab sama orang-orang yang sudah hantarkan kita. Apa angkau bilang deri-hal angkau punya diri?"

23Dia kata, "Sahya ini suara orang yang bertriak di tanah sunyi, 'Btulkan jalan Tuhan, sperti nabi Yash'aya sudah kata.'"

24Dia ini orang Farisi sudah hantarkan.

25Dan dia-orang tanya, dan kata sama dia, "Kalau bgitu, knapa-kah angkau baptiskan, jikalau angkau bukan Almaseh itu, dan bukan Ilia, dan bukan nabi itu?"

26Yahya jawab sama dia-orang, dan kata, "Sahya ini baptiskan dngan ayer: di antara kamu ada berdiri satu orang yang kamu ta'knal,

27ia'itu dia yang ada datang kmdian deri-pada sahya, yang tali kasut-nya sahya t'ada layak buka."

28Ini smoa sudah jadi di Bait-Ani di sbrang sungai Yordan, di mana Yahya ada baptiskan orang.

29Besok-nya dia tengok Isa datang k-pada dia, dan dia kata, "Tengok-lah Anak-domba Allah, yang bawa pergi dosa orang dunia!

30Ini-lah dia yang deri-hal-nya sahya sudah kata, 'Kmdian deri-pada sahya ada satu orang datang, yang sudah jadi lbeh dhulu sahya, kerna dia sudah ada lbeh dhulu sahya."

31Dan sahya pun dhulu blum knal sama dia; ttapi spaya dia boleh di-nyatakan k-pada Isra'el, sbab itu-lah sahya sudah datang baptiskan orang dngan ayer."

32Dan Yahya bersaksi, dan kata, "Sahya sudah tengok Roh turun deri langit sperti burong komba; dan tinggal di atas dia.

33Dan sahya blum knal sama dia: ttapi dia itu yang sudah hantarkan sahya mau baptiskan dngan ayer, dia juga sudah kata sama sahya, 'Itu orang yang angkau tengok Roh turun dan tinggal di atas-nya, dia-lah yang baptiskan dngan Roh Alkudus.'

34Dan sahya sudah tengok dan sudah bersaksi yang ini-lah Anak Allah."

35Dan besok-nya lagi skali Yahya ada berdiri sama dua anak-murid-nya;

36dan dia pandang sama Isa yang ada berjalan-jalan, dan dia kata, "Tengok-lah Anak-domba Allah!"

37Dan itu dua anak-murid dngar dia chakap, dan dia-orang ikut sama Isa.

38Isa balek muka, dan tengok dia-orang ikut, dan dia kata sama dia-orang, "Apa kamu chari?" Dia-orang kata sama dia, "Rabbi tinggal di mana?" (Rabbi kalau tersalin arti-nya 'Guru')

39Dia kata sama dia-orang, "Mari-lah, dan kamu nanti tengok." Jadi itu dia-orang datang, dan tengok di mana Isa tinggal; dan itu hari dia-orang tinggal sama-sama dia: itu ktika ada dkat pukol ampat ptang.

40Satu deri-pada itu dua orang yang sudah dngar Yahya, dan yang sudah ikut sama Isa, dia itu-lah Andrias sudara Petrus.

41Mula-mula dia chari sudara-nya sndiri, ia'itu Simon, dan kata sama dia, "Kita sudah jumpa Masiha itu" (yang tersalin arti-nya Almaseh).

42Dan dia bawa dia k-pada Isa. Isa pandang sama dia, dan kata, "Angkau ini Simon anak Yahya: angkau nanti di-namakan Kifas" (yang tersalin arti-nya Petrus).

43Besok-nya Isa mau pergi di Galil, dan dia jumpa Filipus, dan kata sama dia, "Ikut-lah sahya."

44Ini Filipus orang Bait-Saida, satu negri sama Andrias dan Petrus.

45Filipus jumpa sama Natana'el, dan kata sama dia, "Kita sudah jumpa dia itu yang deri-hal-nya Musa sudah tulis dalam taurit, dan nabi-nabi pun, ia'itu Isa anak Yusof, orang Nasarat."

46Natana'el kata sama dia, "Boleh-kah apa-apa yang baik kluar deri Nasarat?" Filipus kata sama dia, "Mari tengok."

47Isa tengok Natana'el datang k-pada dia, dan kata deri-hal dia, "Tengok-lah, satu orang Isra'el yang btul, yang dalam-nya t'ada tipu-daya!"

48Natana'el kata sama dia, "Bagimana Tuhan knal sama sahya?" Isa jawab kata sama dia, "S-blum Filipus panggil angkau, waktu angkau ada di bawah pokok ara lagi, sahya sudah tengok angkau."

49Natana'el jawab sama dia, "Ya Rabbi, guru-lah Anak Allah; guru-lah Raja Isra'el."

50Isa jawab kata sama dia, "Perchaya-kah angkau sbab sahya kata sama angkau, sahya sudah tengok angkau di bawah pokok ara? angkau nanti tengok perkara-perkara yang lbeh bsar deri-pada ini smoa."

51Dan Isa kata sama dia, "Dngan sunggoh-sunggoh sahya kata sama kamu smoa, kamu nanti tengok langit terbuka, dan mla'ikat Allah naik turun atas Anak-manusia."



 <<  Yohanes 1 >> 


Bahan Renungan: SH - RH - ROC
Download
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
© 2010-2019
Alkitab.SABDA.org

Android.SABDA.org
SABDA.mobi
Bantuan
Single Panel

Laporan Masalah/Saran