Alkitab Mobile SABDA
[VER] : [BABA]     [PL]  [PB] 
 <<  Yohanes 17 >> 

1Ini smoa Isa sudah chakap, dan angkat mata-nya k-langit, dan kata, "Ya Bapa, waktu-nya sudah sampai; muliakan-lah Anak-mu, spaya Anak boleh muliakan Bapa:

2sperti Bapa sudah kasi dia kuasa atas sgala manusia, spaya smoa yang Bapa sudah kasi sama dia, k-pada dia-orang dia boleh kasi hidop yang kkal.

3Dan ini-lah hidop yang kkal, ia'itu kalau dia-orang knal sama Bapa, ia'itu Allah yang satu dan yang btul, dan sama Isa Almaseh yang Bapa sudah hantarkan.

4Sahya sudah muliakan Bapa di atas bumi, sdang sahya sudah habiskan itu kerja yang Bapa srahkan sahya buat.

5Dan skarang, ya Bapa, muliakan-lah sahya sama-sama Bapa sndiri, dngan kmulia'an yang sahya ada sama-sama Bapa s-blum ini dunia jadi.

6Sahya sudah nyatakan nama Bapa k-pada orang-orang yang Bapa sudah kasi sahya deri antara orang dunia ini: dia-orang smoa Bapa-lah punya, dan Bapa sudah kasi dia-orang sama sahya; dan dia-orang sudah turut Bapa punya perkata'an.

7Skarang dia-orang sudah tahu yang smoa perkara yang Bapa kasi sahya, smoa-nya deri-pada Bapa juga:

8kerna itu pngajaran yang Bapa sudah kasi sama sahya, sahya pun sudah kasi sama dia-orang; dan dia-orang sudah trima, dan sudah tahu dngan s-buah-nya yang sahya sudah kluar deri Bapa, dan dia-orang sudah perchaya yang Bapa sudah hantarkan sahya.

9Sahya minta do'a kerna dia-orang: bukan sahya minta do'a kerna orang dunia, ttapi kerna itu orang-orang yang Bapa sudah kasi sama sahya; kerna dia-orang-lah Bapa punya:

10dan sahya punya smoa-nya Bapa punya, dan Bapa punya smoa-nya sahya punya: dan sahya di-muliakan dalam dia-orang.

11Sahya t'ada lagi dalam dunia, dan ini orang-orang ada dalam dunia, dan sahya datang k-pada Bapa. Ya Bapa yang kudus, pliharakan-lah dalam Bapa punya nama itu orang-orang yang Bapa sudah kasi sama sahya, spaya dia-orang mnjadi satu, sperti kita bgitu.

12S-lagi sahya sama-sama dia-orang, sahya sudah pliharakan dalam nama Bapa itu orang smoa yang Bapa sudah kasi sama sahya: dan sahya sudah jaga sama dia-orang, dan satu orang pun antara-nya t'ada binasa, chuma itu anak kbinasa'an; spaya kitab boleh di-bnarkan.

13Ttapi skarang sahya datang k-pada Bapa, dan ini smoa sahya chakapkan dalam dunia, spaya dia-orang boleh dapat sahya punya ksuka'an dalam diri-nya dngan gnap.

14Sahya sudah kasi Bapa punya perkata'an sama dia-orang; dan orang dunia bnchi sama dia-orang, sbab dia-orang bukan deri-pada dunia ini, sperti sahya pun bukan deri-pada dunia ini.

15Sahya t'ada minta Bapa ambil dia-orang kluar deri dunia, chuma spaya Bapa pliharakan dia-orang deri-pada yang jahat.

16Dia-orang bukan deri-pada dunia ini, sperti sahya pun bukan deri-pada dunia ini.

17Kuduskan-lah dia-orang dalam kbtulan itu: Bapa punya perkata'an itu-lah kbtulan.

18Sperti Bapa sudah hantarkan sahya dalam dunia, bgitu juga sahya hantarkan dia-orang dalam dunia.

19Dan deri sbab dia-orang sahya kuduskan diri sahya sndiri, spaya dia-orang pun boleh di-kuduskan dalam kbtulan itu.

20Dan sahya minta do'a bukan saja kerna ini orang smoa, ttapi kerna smoa orang yang perchaya sama sahya sbab dia-orang punya pngajaran;

21spaya smoa-nya jadi satu; sperti Bapa ada dalam sahya, dan sahya pun dalam Bapa, spaya dia-orang pun dalam kita: sampai orang dunia boleh perchaya yang Bapa-lah sudah hantarkan sahya.

22Dan itu kmulia'an yang Bapa sudah kasi sama sahya, sahya sudah kasi sama dia-orang; spaya dia-orang jadi satu, sperti kita pun satu;

23sahya dalam dia-orang, dan Bapa dalam sahya, spaya dia-orang di-smpurnakan dalam satu; spaya orang dunia boleh tahu yang Bapa-lah sudah hantarkan sahya, dan sudah kaseh sama dia-orang, sperti Bapa kaseh sama sahya pun.

24Ya Bapa, apa-apa yang Bapa sudah kasi sama sahya, sahya punya mau, di mana sahya ada, di situ biar-lah dia-orang pun ada sama-sama sahya; spaya dia-orang boleh tengok sahya punya kmulia'an, yang Bapa sudah kasi sama sahya: kerna Bapa sudah kaseh sama sahya dhulu deri-pada kjadian dunia.

25Ya Bapa yang bnar, ini dunia punya orang t'ada knal sama Bapa, ttapi sahya ini sudah knal Bapa, dan ini orang smoa sudah tahu yang Bapa sudah hantarkan sahya.

26Dan sahya sudah kasi tahu sama dia-orang Bapa punya nama, dan sahya nanti kasi tahu lagi; spaya itu kaseh yang sperti Bapa sudah kaseh sama sahya boleh ada dalam dia-orang, dan sahya pun dalam dia-orang."



 <<  Yohanes 17 >> 


Bahan Renungan: SH - RH - ROC
Download
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
© 2010-2019
Alkitab.SABDA.org

Android.SABDA.org
SABDA.mobi
Bantuan
Single Panel

Laporan Masalah/Saran