1Kmdian deri-pada itu Isa pergi sbrang tasek Galil, ia'itu tasek Tibirias.
2Dan banyak skali orang ikut sama dia, sbab sudah tengok tanda-tanda yang dia buat di atas orang yang sakit.
3Dan Isa naik gunong, dan di sana dia dudok sama-sama murid-murid-nya.
4Dan Paska, ia'itu orang Yahudi punya hari-bsar, sudah dkat.
5Dan Isa angkat mata, dan tengok banyak skali orang ada datang k-pada dia, sbab itu dia kata sama Filipus, "Di mana kita mau bli roti, spaya boleh kasi ini smoa makan?"
6Isa kata ini sbab mau choba sama dia, kerna dia sndiri tahu apa dia mau buat.
7Filipus jawab sama Isa, "Kalau satu orang makan sikit pun saja, dua-ratus dinar punya roti pun t'ada chukop kerna ini smoa."
8Ada satu anak-murid-nya, ia'itu Andrias, sudara Simon Petrus, kata sama dia,
9"Di sini ada satu budak yang ada lima biji punya roti bras blanda, sama dua ekor ikan: ttapi itu apa guna sama ini macham banyak punya orang?"
10Isa kata, "Kasi orang-orang ini dudok." Di situ ada banyak rumput, dan orang-orang dlaki dudok, ada dkat lima-ribu orang.
11Sbab itu Isa ambil itu roti; dan bila dia sudah mnguchap shukor, dia bhagi-bhagikan sama orang yang sudah dudok; dan sama ikan itu pun bgitu juga, s-brapa banyak dia-orang suka.
12Dan bila dia-orang sudah knnyang, dia kata sama dia punya murid-murid, "Pungut itu sisa-sisa roti, spaya jangan terbuang apa-apa."
13Jadi itu, dia-orang pungut-lah, dan pnohkan dua-blas bakul dngan itu lima biji roti bras blanda punya sisa-sisa, yang lbeh orang makan.
14Jadi bila orang-banyak itu tengok itu tanda yang Isa sudah buat, dia-orang kata, "Dia ini btul-lah itu nabi yang patut datang dalam dunia."
15Isa tahu yang dia-orang mau datang ambil dia dngan kras, dan jadikan dia raja, sbab itu dia undor pergi gunong s'orang-s'orang.
16Bila sudah ptang, murid-murid-nya turun pergi tasek;
17dan dia-orang naik satu prahu, mau mnybrang tasek pergi Kafarnahum. Dan sudah glap, ttapi Isa blum juga datang k-pada dia-orang.
18Dan tasek itu pun berombak sbab angin kras tiop.
19Sbab itu bila dia-orang sudah berdayong tiga ampat batu punya jauh, dia-orang tengok Isa berjalan di atas tasek dan datang dkat prahu itu: jadi dia-orang naik takot.
20Ttapi dia kata sama dia-orang, "Ini sahya; jangan takot."
21Bharu-lah dia-orang suka mau sambot dia naik prahu: dan itu juga prahu itu sudah sampai darat yang dia-orang mau pergi.
22Besok itu orang-banyak yang berdiri di sbrang tasek sudah tengok t'ada lain prahu di situ, chuma satu saja, lagi pun Isa t'ada naik itu prahu sama-sama murid-nya, ttapi itu murid-murid sudah blayer sndiri saja
23(ttapi ada juga lain-lain prahu yang datang deri Tibirias, dkat itu tmpat di mana dia-orang sudah makan roti, bila Tuhan sudah mnguchap shukor);
24sbab itu bila itu orang-banyak tengok Isa t'ada di situ, dan murid-murid-nya punya t'ada, bharu dia-orang pun naik prahu, dan datang di Kafarnahum mau chari Isa.
25Bila dia-orang jumpa dia di sbrang tasek, dia-orang kata sama dia, "Hei Rabbi, bila-kah Rabbi sudah sampai di sini?"
26Isa jawab kata sama dia-orang, "Dngan sunggoh-sunggoh sahya bilang sama kamu, kamu chari sama sahya bukan-nya sbab kamu sudah tengok tanda-tanda, ttapi sbab kamu sudah makan itu roti dan sudah knnyang.
27Baik kamu kerja bukan-nya mau chari makanan yang nanti binasa, ttapi makanan yang nanti tinggal sampai hidop yang kkal, yang Anak-manusia nanti kasi sama kamu: kerna dia-lah yang sudah di-akukan oleh Bapa, ia'itu Allah."
28Sbab itu dia-orang kata sama dia, "Apa patut kita buat spaya buat perbuatan Allah?"
29Isa jawab dan kata sama dia-orang, "Ini-lah perbuatan Allah, ia'itu kamu smoa perchaya sama dia yang Allah sudah hantarkan."
30Sbab itu dia-orang kata sama dia, "Apa-kah tanda guru ada buat, spaya kita tengok dan perchaya sama guru? Apa-kah yang guru kerjakan?
31Kita punya nenek-moyang sudah makan Manna di tanah sunyi, sperti ada tersurat, 'Dia kasi dia-orang roti deri shorga jadi makanan-nya.'"
32Isa kata sama dia-orang, "Dngan sunggoh-sunggoh sahya bilang sama kamu, bukan-nya Musa yang sudah kasi kamu itu roti deri shorga, ttapi Bapa sahya yang kasi sama kamu itu roti yang btul deri shorga.
33Kerna roti Allah, ia'itu dia yang turun deri shorga, dan yang kasi hidop sama ini dunia."
34Dia-orang kata sama dia, "Ya Tuan, kasi-lah ini roti sama kita slalu."
35Isa kata sama dia-orang, "Sahya-lah itu roti hidop: orang yang datang k-pada sahya t'ada nanti lapar, dan orang yang perchaya sama sahya t'ada skali-kali nanti haus.
36Ttapi sahya sudah bilang sama kamu, yang kamu sudah tengok sahya, ttapi t'ada juga perchaya.
37Smoa yang Bapa kasi sama sahya nanti datang k-pada sahya; dan orang yang datang k-pada sahya, t'ada skali-kali sahya nanti buangkan dia kluar.
38Kerna sahya sudah turun deri shorga, bukan-nya mau buat kahandak sahya sndiri, ttapi kahandak dia yang sudah hantarkan sahya.
39Dan kahandak dia yang hantarkan sahya ada bgini: ia'itu antara smoa orang yang dia sudah kasi sama sahya, jangan satu pun hilang, ttapi sahya nanti bangkitkan smoa-nya hari pnghabisan.
40Kerna kahandak Bapa sahya ada bgini: ia'itu siapa-siapa yang tengok Anak itu, dan perchaya sama dia, nanti dapat hidop yang kkal; dan sahya nanti bangkitkan dia hari pnghabisan."
41Sbab itu orang Yahudi bersungut-bersungut deri-hal dia, sbab dia sudah kata, "Sahya-lah itu roti yang turun deri shorga."
42Dan dia-orang kata, "Bukan-kah dia ini Isa anak si Yusof, yang mak-bapa-nya kita pun knal? bagimana pula dia kata tadi, 'Sahya sudah turun deri shorga?'"
43Isa jawab kata sama dia-orang, "Jangan bersungut-sungut antara kamu sndiri.
44T'ada orang boleh datang k-pada sahya, kalau tidak Bapa yang hantarkan sahya tarek hati-nya: dan sahya nanti bangkitkan dia hari pnghabisan.
45Ada tertulis dalam buku nabi-nabi, 'Dan sklian-nya nanti di-ajar oleh Allah.' Tiap-tiap orang yang sudah dngar deri-pada Bapa, dan sudah blajar, dia pun datang k-pada sahya.
46T'ada siapa pun yang sudah tengok Bapa, chuma dia saja yang datang deri Allah, dia sudah tengok Bapa.
47Dngan sunggoh-sunggoh sahya kata sama kamu, orang yang perchaya dia-lah ada hidop yang kkal.
48Sahya-lah roti-hidop itu.
49Kamu punya nenek-moyang sudah makan Manna di tanah sunyi, dan dia-orang mati juga.
50Ini-lah roti yang turun deri shorga, spaya orang boleh makan, dan t'ada mati.
51Sahya-lah roti yang hidop yang turun deri shorga: kalau siapa-siapa makan ini roti, dia nanti hidop s-lama-lama-nya: dan roti yang sahya kasi, ia'itu badan sahya, mnjadi ini dunia punya hidop."
52Sbab itu orang Yahudi berbantah satu sama lain, dan kata, "Bagimana pula ini orang boleh kasi kita makan dia punya badan?"
53Jadi Isa kata sama dia-orang, "Dngan sunggoh-sunggoh sahya bilang sama kamu, jikalau kamu tidak makan badan Anak-manusia dan minum darah-nya, kamu t'ada hidop dalam kamu punya diri.
54Orang yang makan badan sahya dan minum darah sahya dia ada hidop yang kkal; dan sahya nanti bangkitkan dia hari pnghabisan.
55Kerna badan sahya-lah makanan yang btul, dan darah sahya-lah minuman yang btul.
56Orang yang makan badan sahya dan minum darah sahya, dia tinggal dalam sahya, dan sahya pun tinggal dalam dia.
57Sperti Bapa yang hidop itu sudah hantarkan sahya, dan sahya pun hidop deri sbab Bapa; bgitu-lah juga orang yang makan sahya dia nanti hidop deri sbab sahya.
58Ini-lah roti yang turun deri shorga: bukan-nya sperti yang nenek-moyang sudah makan, dan mati juga: orang yang makan ini roti nanti hidop s-lama-lama-nya."
59Ini smoa Isa sudah kata dalam rumah-smbahyang, waktu dia ada ajar di Kafarnahum.
60Sbab itu banyak juga dia punya murid-murid, bila dia-orang dngar bgini, kata, "Ini susah-punya chakap, siapa boleh dngar ini?"
61Ttapi sbab Isa tahu dalam diri-nya yang murid-murid-nya bersungut deri-hal itu perkara, dia bilang sama dia-orang, "Perkara ini-kah kasi kamu terantok?
62Apa lagi kalau kamu tengok Anak-manusia naik pergi tmpat asal-nya?
63Roh itu-lah yang hidopkan, badan t'ada satu pun dia punya fa'idah: perkata'an yang sahya sudah chakapkan sama kamu, itu-lah roh dan itu-lah hidop.
64Ttapi antara kamu ada juga yang ta'perchaya." Kerna deri mula-nya Isa sudah tahu siapa yang t'ada perchaya, dan siapa dia itu yang nanti srahkan dia.
65Dan dia kata, "Itu sbab-lah sahya sudah kata sama kamu, satu orang pun ta'boleh datang k-pada sahya, kalau Bapa t'ada kasi dia."
66Deri sbab ini banyak juga murid-murid-nya undor blakang, dan t'ada ikut dia jalan lagi.
67Sbab itu Isa kata sama yang dua-blas itu, "Kamu ini pun mau pergi?"
68Simon Petrus jawab sama dia, "Ya Tuhan, sama siapa-kah kita mau pergi? Tuhan-lah ada hidop kkal punya perkata'an.
69Dan kita sudah perchaya dan kita tahu juga yang Tuhan-lah Allah punya Orang Kudus itu."
70Isa jawab sama dia-orang, "Bukan-kah sahya sudah pileh kamu dua-blas orang ini? dan antara kamu ada satu jadi iblis?"
71Ini dia chakap deri-hal Yudas anak Simon Iskariot, kerna dia-lah yang nanti srahkan Isa, dan dia pun satu deri-pada dua-blas murid itu.
Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel