1Kmdian deri-pada ini smoa, Isa berjalan-jalan di tanah Galil pula, kerna dia ta'mau berjalan di tanah Yahudiah, sbab orang Yahudi chari jalan mau bunoh sama dia.
2Dan orang Yahudi punya hari-bsar sudah dkat, ia'itu hari-bsar pondok.
3Sbab itu sudara-sudara-nya kata sama dia, "Baik angkau pindah deri sini pergi Yahudiah, spaya angkau punya murid-murid boleh tengok angkau punya perbuatan yang angkau ada buat.
4Kerna satu orang pun t'ada buat apa-apa dalam glap, jikalau dia sndiri mau jadi mashhur. Jikalau angkau buat ini smoa, nyatakan-lah diri angkau k-pada orang dunia ini."
5Kerna dia punya sudara-sudara pun t'ada perchaya sama dia.
6Sbab itu Isa kata sama dia-orang, "Sahya punya waktu blum lagi sampai; ttapi kamu punya waktu slalu ada siap.
7Ini dunia ta'boleh bnchi sama kamu; ttapi sama sahya dia bnchi, sbab sahya bersaksi deri-hal dia, yang smoa perbuatan-nya ada jahat.
8Kamu sndiri naik-lah pergi hari-bsar: sahya ini blum naik pergi ini hari-bsar; kerna waktu sahya blum lagi gnap."
9Dan bila dia sudah kata ini smoa sama dia-orang, dia tinggal juga di Galil.
10Ttapi bila sudara-sudara-nya sudah naik pergi hari-bsar itu, bharu-lah dia pun pergi, bukan nyata-nyata, ttapi sperti tersmbunyi bgitu.
11Jadi orang Yahudi chari sama dia di hari-bsar itu, dan dia-orang kata, "Mana dia itu?"
12Dan itu orang banyak bersungut banyak skali deri-hal Isa: ada yang kata, "Dia orang baik;" ada pula kata, "Bukan, ttapi dia ssatkan orang-banyak."
13Dalam pada itu, t'ada satu orang chakap fasal dia dngan bebas-nya, sbab takot orang Yahudi.
14Ttapi tngah-tngah hari-bsar, Isa naik masok di ka'abah dan mngajar orang.
15Jadi orang Yahudi kata dngan hairan-nya, "Bagimana dia ini tahu surat, sdang dia blum blajar?"
16Sbab itu Isa jawab dan kata sama dia-orang, "Sahya punya pngajaran ini bukan-nya sahya sndiri punya, ttapi dia punya yang hantarkan sahya.
17Jikalau satu orang punya kahandak mau buat kahandak dia, itu orang-lah nanti tahu itu pngajaran deri-pada Allah-kah, atau sahya punya chakap kluar deri sndiri.
18Kalau orang punya chakap kluar deri sndiri, dia chari kmulia'an-nya sndiri: ttapi orang yang chari kmulia'an dia yang sudah hantarkan dia, dia itu-lah btul, dan tidak ada kjahatan sama dia.
19Bukan-kah Musa sudah kasi hukum-taurit sama kamu, ttapi antara kamu t'ada satu orang pun yang buat sperti taurit? Knapa kamu ada chari jalan mau bunoh sama sahya?"
20Orang-banyak jawab, "Angkau ini terkna jin: siapa ada chari jalan mau bunoh angkau?"
21Isa jawab kata sama dia-orang, "Sahya sudah buat satu pkerja'an, dan kamu smoa jadi hairan.
22Ini sbab-lah Musa sudah kasi hukum-sunat sana kana (bukan-nya ini deri-pada Musa, ttapi deri-pada nenek-moyang); dan tempo hari-perhentian pun kamu sunatkan orang.
23Jikalau tempo hari-perhentian pun orang boleh di-sunatkan, spaya hukum Musa itu jangan di-langgarkan, kamu marah-kah sama sahya sbab tempo hari-perhentian sahya sudah buat satu orang satu badan skali baik?
24Jangan kamu jatohkan hukum mnurut rupa saja, ttapi jatohkan hukum yang adil."
25Sbab itu ada brapa orang negri Yerusalim kata, "Bukan-kah dia ini yang orang ada choba mau bunoh?
26Tengok, dia ada berchakap dngan bebas-nya, dan dia-orang t'ada kata apa-apa sama dia? 'Ntah pnghulu-pnghulu btul tahu-kah yang dia ini Almaseh?
27Ttapi kita sudah pun tahu ini orang datang deri mana: ttapi bila Almaseh itu datang, satu orang pun ta'tahu deri mana dia."
28Sbab itu Isa bertriak tngah dia mngajar dalam ka'abah, dan kata, "Kamu tahu juga sama sahya, dan kamu tahu sahya deri mana; dan sahya datang bukan-nya deri diri sahya sndiri, ttapi dia yang hantarkan sahya ada btul yang kamu ini t'ada knal.
29Sahya ini knal sama dia; kerna sahya datang deri dia, dan dia sudah hantarkan sahya."
30Itu sbab dia-orang chari jalan mau tangkap sama dia, dan t'ada satu orang pun taroh tangan atas dia, sbab waktu-nya blum sampai lagi.
31Ttapi antara itu orang-banyak ada banyak yang perchaya sama dia, dan kata, "Bila Almaseh itu datang, nanti-kah dia buat tanda-tanda lbeh banyak deri-pada yang ini orang sudah buat?"
32Orang-orang Farisi dngarkan orang-banyak bersungut-sungut deri-hal dia; dan kpala-kpala imam sama orang Farisi suroh mata-mata pergi tangkap sama dia.
33Sbab itu Isa kata, "Chuma lagi sikit lama sahya nanti ada sama-sama kamu, kmdian sahya nanti pergi k-pada dia yang hantarkan sahya.
34Kamu smoa nanti chari sama sahya, dan t'ada nanti dapat: dan di mana sahya ini ada, kamu ta'boleh datang."
35Sbab itu orang Yahudi kata satu sama lain, "Di mana pula ini orang mau pergi, sampai kita ta'nanti dapat dia? dia mau pergi k-pada orang yang bertaburan antara orang Grik itu-kah? dan ajar orang Grik itu?
36Apa ini perkata'an yang dia ada bilang, 'Kamu smoa nanti chari sama sahya, dan t'ada nanti dapat: dan di mana sahya ini ada, kamu ta'boleh datang?'"
37Dalam hari yang pnghabisan, ia'itu hari yang bsar skali dalam itu hari-bsar, Isa berdiri, dan bertriak kata, "Barang-siapa haus, baik dia datang k-pada sahya dan minum.
38Dia yang perchaya sama sahya, deri-pada prot-nya, sperti ada tersbot dalam kitab, sungai-sungai ayer yang hidop nanti mngalir."
39Ttapi dia chakap ini deri-hal Roh, yang orang-orang yang perchaya sama dia nanti trima: kerna itu ktika Roh blum lagi datang; sbab Isa blum di-muliakan.
40Sbab itu deri antara orang-banyak itu, bila dia-orang dngar ini smoa, ada orang kata, "Btul-lah dia ini itu nabi."
41Lain orang pula kata, "Dia ini-lah Almaseh." Ttapi ada orang pula kata, "Apa? Almaseh itu datang deri Galil-kah?
42Bukan-kah kitab sudah bilang yang Almaseh itu nanti datang deri kturunan Da'ud, dan deri negri Bait-Lahim, ia'itu kampong tmpat Da'ud itu?"
43Sbab itu orang-banyak itu berbhagi dua deri sbab dia.
44Dan ada orang yang mau tangkap sama dia, ttapi satu orang pun t'ada taroh tangan atas dia.
45Jadi itu mata-mata datang k-pada kpala-kpala imam dan orang-orang Farisi; dan dia-orang kata sama itu mata-mata, "Knapa kamu smoa t'ada bawa dia datang?"
46Mata-mata jawab, "Blum pernah orang chakap sperti dia ini."
47Jadi itu orang Farisi jawab sama dia-orang, "Kamu pun sudah kna ssatkah?
48Antara pnghulu-pnghulu ada-kah satu orang pun yang sudah perchaya sama dia? atau antara orang Farisi-kah?
49Ttapi ini orang-banyak yang ta'tahu hukum-taurit sudah kna kutok."
50Nikodimus kata sama dia-orang (kerna dia yang dhulu sudah datang k-pada Isa ada dalam bilangan orang itu),
51"Ada-kah kita punya hukum-taurit hukumkan satu orang s-blum mula-mula dngar sama dia, dan dapat tahu apa-kah yang dia sudah buat?"
52Dia-orang jawab kata sama dia, "Angkau pun deri Galil-kah? Preksa-lah, dan tengok yang deri-pada Galil t'ada nabi ada terkluar."
53Dan masing-masing orang pulang rumah-nya sndiri.
Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel