Alkitab Mobile SABDA
[VER] : [BABA]     [PL]  [PB] 
 <<  Yohanes 8 >> 

1ttapi Isa pergi di Bukit Zaitun.

2Dan pagi-pagi dia pergi lagi skali di ka'abah, dan smoa orang bangsa itu datang k-pada dia; dan dia dudok mngajar dia-orang.

3Dan orang-orang pnulis sama orang Farisi bawa satu prempuan yang orang dapat jumpa buat zina; dan bila dia-orang sudah kasi itu prempuan berdiri di tngah-tngah,

4dia-orang kata sama Isa, "Hei guru, ini prempuan orang sudah dapat jumpa s-tngah dia buat zina.

5Dalam hukum-taurit Musa ada suroh kita hntam batu sama ini macham punya prempuan; guru pula apa kata fasal dia?"

6Dan dia-orang kata bgini sbab mau choba sama dia, spaya dia-orang boleh dapat salahkan dia. Ttapi Isa tundok tulis di tanah dngan jari-nya.

7Ttapi bila itu orang smoa t'ada berrnti-rnti tanya sama dia, Isa angkat diri-nya, dan kata sama dia-orang, "Barang-siapa antara kamu t'ada berdosa, biar dia itu mula-mula hntam batu sama dia."

8Lagi s-kali Isa tundok, dan dngan jari-nya tulis di tanah.

9Bila dia-orang dngar ini, smoa-nya kluar habis satu satu, mula'i deri yang tua-tua, sampai yang blakang skali: dan Isa tertinggal s'orang-s'orang, dngan prempuan itu di tngah-tngah.

10Isa angkat diri-nya, dan kata sama dia, "Hei nyonya, mana dia-orang smoa? t'ada-kah satu orang pun hukumkan angkau?"

11Dia kata, "T'ada satu orang pun, Tuhan." Dan Isa kata, "Sahya pun t'ada hukumkan angkau: pergi-lah, dan deri-pada skarang jangan berdosa lagi."

12Jadi lagi s-kali Isa berchakap sama dia-orang, dan kata, "Sahya ini-lah trang dunia: orang yang ikut sama sahya t'ada nanti jalan dalam glap, ttapi nanti ada trang hidop."

13Sbab itu orang Farisi kata sama dia, "Angkau ada bersaksi deri-hal angkau punya diri sndiri; ksaksian angkau bukan btul."

14Isa jawab kata sama dia-orang, "Jikalau sahya bersaksi deri-hal sahya punya diri sndiri skali pun, ksaksian sahya ada btul; kerna sahya tahu deri mana sahya datang, dan di mana sahya pergi; ttapi kamu ta'tahu deri mana sahya datang, atau di mana sahya pergi.

15Kami smoa hukumkan mnurut tabi'at dunia; sahya ini t'ada hukumkan orang.

16Dan jikalau sahya hukumkan orang pun, sahya punya hukuman ada btul; kerna sahya bukan s'orang-s'orang saja, ttapi sahya sama Bapa yang sudah hantarkan sahya.

17Lagi pun sudah tersurat dalam kamu punya hukum-taurit, yang dua orang punya ksaksian ada btul.

18Sahya-lah yang bersaksi deri-hal diri sndiri, dan Bapa yang hantarkan sahya dia pun bersaksi deri-hal sahya."

19Sbab itu dia-orang kata sama dia, "Mana angkau punya Bapa?" Isa jawab, "Kamu ta'knal sahya, dan kamu ta'knal Bapa pun: jikalau kamu sudah knal sama sahya, tntu-lah kamu knal Bapa sahya juga."

20Ini perkata'an smoa Isa berchakap di tmpat simpan wang, ktika dia mngajar di dalam ka'abah: dan t'ada orang tangkap sama dia; sbab waktu-nya blum sampai.

21Jadi lagi s-kali dia kata sama dia-orang, "Sahya ini mau pergi, dan kamu nanti chari sama sahya, dan kamu nanti mati dalam kamu punya dosa: di mana sahya pergi kamu ta'boleh datang."

22Itu sbab-lah orang Yahudi kata, "Dia mau bunoh diri-nya sndiri-kah? sdang dia bilang, 'Di mana sahya pergi kamu ta'boleh datang.'"

23Dan dia kata sama dia-orang, "Kamu ini deri bawah; sahya ini deri atas: kamu deri ini dunia; sahya bukan deri ini dunia.

24Itu sbab-lah sahya sudah bilang sama kamu, yang kamu nanti mati dalam kamu punya dosa-dosa; kerna kalau kamu t'ada perchaya yang sahya-lah dia, kamu nanti mati dalam dosa-dosa kamu."

25Jadi dia-orang kata sama dia, "Angkau ini siapa?" Isa jawab sama dia-orang, "Sperti sahya sudah chakapkan sama kamu deri mula-mula.

26Sahya ada banyak perkara mau chakap dan mau bicharakan deri-hal kamu: ttapi dia itu yang hantarkan sahya ada btul; dan apa-apa yang sahya sudah dngar deri-pada dia, itu-lah sahya chakapkan sama dunia ini."

27Dia-orang t'ada juga mngerti yang dia ada berchakap sama dia-orang deri-hal Bapa.

28Jadi Isa kata, "Bila kamu sudah tinggikan Anak-manusia, bharu-lah kamu nanti tahu yang sahya-lah dia, dan sahya t'ada buat apa-apa deri sahya punya diri, ttapi sperti Bapa sudah ajarkan sahya, bgitu-lah sahya katakan ini smoa.

29Dan dia yang hantarkan sahya ada sama-sama sahya; dia t'ada tinggalkan sahya s'orang-s'orang; kerna slalu sahya buat apa-apa yang berknan sama dia."

30Sambil dia chakap ini smoa, banyak orang perchaya sama dia.

31Sbab itu Isa kata sama orang Yahudi yang sudah perchaya sama dia, "Jikalau kamu tinggal ttap dalam perkata'an sahya, bharu-lah kamu jadi murid-murid sahya yang btul;

32dan kamu nanti tahu kbtulan itu, dan kbtulan itu nanti kasi kamu bebas."

33Dia-orang jawab sama dia, "Kita smoa kturunan Ibrahim, dan blum pernah kita jadi hamba k-pada satu orang pun: bagimana pula tuan boleh kata, 'Kamu nanti jadi bebas'?"

34Isa jawab sama dia-orang, "Dngan sunggoh-sunggoh sahya bilang sama kamu, tiap-tiap orang yang buat dosa, dia itu jadi hamba dosa.

35Dan hamba orang t'ada tinggal dalam rumah tuan-nya s-lama-lama-nya, ttapi anak-nya ada tinggal s-lama-lama-nya.

36Sbab itu jikalau Anak kasi kamu bebas, kamu nanti jadi bebas btul.

37Sahya pun tahu juga yang kamu ini kturunan Ibrahim; ttapi kamu chari jalan mau bunoh sahya, sbab perkata'an sahya t'ada tmpat lga dalam diri kamu.

38Sahya ini chakapkan apa-apa yang sahya sudah tengok sama Bapa sahya: dan kamu ini buat apa-apa yang kamu dngar deri bapa kamu."

39Dia-orang jawab, kata sama dia, "Ibrahim-lah kita punya bapa." Isa kata sama dia-orang, "Jikalau kamu btul anak-anak Ibrahim, kamu nanti buat Ibrahim punya perbuatan.

40Ttapi skarang kamu chari jalan mau bunoh sahya, yang sudah bilangkan kbtulan itu sama kamu, sperti sahya sudah dngar deri-pada Allah: Ibrahim t'ada buat ini macham.

41Kamu ini buat kamu punya bapa punya perbuatan." Dia-orang kata sama dia, "Kjadian kita bukan-nya deri zina; Bapa kita satu saja, ia'itu Allah."

42Isa kata sama dia-orang, "Jikalau Allah btul Bapa kamu, tntu-lah kamu kaseh sama sahya, kerna sahya sudah kluar dan datang deri Allah; dan sahya bukan datang deri sndiri, ttapi dia-lah sudah hantarkan sahya.

43Knapa-kah kamu ini t'ada mngerti sahya punya chakap? sbab-nya kamu ta'boleh dngar perkata'an sahya.

44Kamu ini deri-pada kamu punya bapa, ia'itu iblis, dan sgala k'inginan bapa kamu, itu-lah kamu suka buat. Dia-lah satu pmbunoh deri asal, dan t'ada tmpat dalam kbtulan itu, kerna dalam dia tidak ada kbtulan itu. Bila dia chakap bohong, dia chakap deri sndiri punya perkara: kerna dia-lah pmbohong, dan bapa sgala bohong.

45Ttapi sbab sahya ini chakap kbtulan, kamu t'ada perchaya sama sahya.

46Antara kamu siapa-kah salahkan sahya deri-hal buat dosa? Jikalau sahya chakap kbtulan, knapa pula kamu t'ada perchaya sama sahya?

47Barang-siapa yang deri-pada Allah, dia dngar perkata'an Allah: dan ini-lah sbab kamu t'ada dngar perkata'an Allah, ia'itu sbab kamu bukan deri-pada Allah."

48Orang Yahudi jawab kata sama dia, "Bukan-kah patut kita smoa kata yang angkau ini orang Samariah, dan ada terkna jin?"

49Isa jawab, "Sahya t'ada terkna jin; ttapi sahya hormatkan Bapa sahya, dan kamu kurang hormatkan sahya.

50Ttapi sahya bukan-nya chari kmulia'an sahya sndiri; ada satu yang chari dan hukumkan.

51Dngan sunggoh-sunggoh sahya bilang sama kamu, jikalau satu orang plikarakan perkata'an sahya, skali-kali dia t'ada nanti mati."

52Orang Yahudi kata sama dia, "Skarang bharu kita tahu yang angkau ada terkna jin. Ibrahim sudah mati, dan nabi-nabi pun sudah mati; dan angkau bilang pula, 'Jikalau satu orang pliharakan perkata'an sahya, skali-kali dia t'ada nanti rasa mati.'

53Angkau ini lbeh bsar-kah deri-pada kita punya nenek-moyang Ibrahim yang sudah mati itu? dan nabi-nabi pun sudah mati juga: angkau buatkan angkau punya diri siapa?"

54Isa jawab, "Jikalau sahya muliakan diri sahya sndiri, kmulia'an sahya itu satu pun tidak; Bapa sahya-lah yang muliakan sahya, yang kamu kata dia-lah Allah kamu;

55dan kamu ta'knal sama dia; ttapi sahya ini knal sama dia; dan jikalau sahya bilang sahya ta'knal sama dia, sahya pun jadi pmbohong sperti kamu: ttapi sahya ada knal sama dia, dan sahya turut dia punya perkata'an.

56Kamu punya nenek-moyang Ibrahim sudah bersuka-suka mau tengok jman sahya; dan dia tengok dan suka-hati."

57Sbab itu orang Yahudi kata sama dia, "Angkau blum lima-puloh tahun punya umor lagi, sudah-kah angkau tengok Ibrahim?"

58Isa kata sama dia-orang, "Dngan sunggoh-sunggoh sahya bilang sama kamu, s-blum Ibrahim di-beranakkan, sahya ini ada."

59Sbab itu dia orang pungut batu mau hntam sama dia: ttapi Isa smbunyikan diri-nya, dan kluar deri ka'abah.



 <<  Yohanes 8 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel Single Panel