Putra
1Puniki kulawargan Dane Harun miwah Dane Musa duk Ida Sang Hyang Widi Wasa masabda ring Dane Musa ring duur Gunung Sinaine.
2Dane Harun madue putra lanang petang diri, inggih punika: Sane pinih duura Dane Nadab, arin Danene Dane Abihu, Dane Eleasar miwah Dane Itamar.
3Dane sareng patpat kalinggihang dados pandita malantaran upacara kasriokin minyak ring duur danene suang-suang.
4Nanging Dane Nadab miwah Dane Abihu sampun seda ring tegal melakang Sinaine, rikala dane ngaturang geni pasepan sane nenten suci ring ayun Ida Sang Hyang Widi Wasa. Sang kalih nenten madue putra. Duaning punika, sapanyeneng Dane Harun, wantah Dane Eleasar miwah Dane Itamar kewanten sane ngamargiang darma kapanditan.
Wong
5Ida Sang Hyang Widi Wasa masabda ring Dane Musa sapuniki:
6“Tundenja suku Lewine ento tangkil mai di ajeng Ulune, lakar manggehang Ulun dadi pangayah-pangayah Harune.
7Ia ajaka makejang patut nyalanang paundukan-paundukan ane patut kalaksanayang pabuat Kemah Linggih Ulune, tur nglaksanayang tetegenan pabuat parapanditane muah parakaulan Ulune makejang.
8Ia patut nabdabang muah mrateka saananing prabot Kemah Sucine, tur nyalanang tetegenan buat wong Israele ane lenan.
9Tetegenan wong Lewine ento tuah dadi pangayah buat Harun muah pianak-pianakne.
10Kita patut ngamanggehang Harun muah pianak-pianakne buat nyalanang darma kapanditan. Lenan teken ia ajaka amonto, nyenja nagih nyalanang darma kapanditane ento, ia patut kukum mati.”
11Ida Sang Hyang Widi Wasa masabda ring Dane Musa, kadi asapuniki:
12“Ane jani wong Lewine ento patut dadi duen Ulun. Dugase Ulun ngamatiang sakancan pianak-pianak bangsa Mesire ane paling keliha, Ulun suba nyelik tur nganehang pianak muani ane paling keliha sig asing-asing kulawargan wong Israele, muah sakancan panak ingon-ingonnyane ane lekad jumun daana. Ane dadi silur pianak wong Israele ane muani paling keliha ento, Ulun tuah nyuang wong Lewine ento. Ia ajaka makejang lakar dadi duen Ulun. Ulun ene Ida Sang Hyang Widi Wasa.”
13(3:12)
Cacah
14Ring tegal melakang Sinaine, Ida Sang Hyang Widi Wasa ngandikayang Dane Musa,
15mangda naptarang wong Lewine manut palingsehan miwah kulawargannyane suang-suang. Asing-asing anak lanang sane sampun mayusa asasih wiadin langkungan mangda sami kadaptarang.
16Irika Dane Musa nglaksanayang titah Ida Sang Hyang Widi Wasa punika.
17Dane Lewi madue putra lanang-lanang tetiga, inggih punika Dane Gerson, Kehat miwah Merari. Sang tiga punika dados leluur palingsehan-palingsehan sane ngamanggehang pesengan dane sareng tiga punika. Dane Gerson madue putra lanang kekalih, inggih punika: Dane Libni miwah Dane Simei. Dane Kehat madue putra lanang petang diri, inggih punika: Dane Amram, Yisar, Hebron miwah Usiel. Dane Merari madue putra lanang kekalih, inggih punika: Dane Mahli miwah Musi. Dane sareng sami punika dados leluur kulawarga sane ngamanggehang pesengan danene.
18(3:17)
19(3:17)
20(3:17)
21Sane dados palingsehan Dane Gerson, inggih punika kulawargan Dane Libni, miwah kulawargan Dane Simei.
22Gebogan anak lanang-lanang sane mayusa asasih wiadin langkungan kacatet wenten 7.500 diri.
23Sane dados panglingsir palingsehan puniki, inggih punika Dane Eliasap okan Dane Lael. Palingsehan puniki patut ngwangun kemahnyane ring sisi kauh, ring ungkur Kemah Linggih Ida Sang Hyang Widi Wasa.
24(3:23)
25Dane sareng sami polih tetegenan buat nabdabang tur ngenterang Kemahe punika, makamiwah tutupnyane sane ring jero miwah ring jaba, taler korden sane ring lawang genahe ngranjing.
26Taler korden sane wenten ring natare sane ngiter Kemah miwah pamorboran aturane, miwah kordene sane wenten ring gapuran natare punika. Dane polih tetegenan nglaksanayang sakancan pakaryan sane ngeniang indik barang-barange punika.
27Sane ngranjing dados palingsehan Dane Kehat, inggih punika: kulawargan Dane Amram, Yisar, Hebron miwah Usiel.
28Gebogan anak lanang-lanang sane mayusa asasih wiadin langkungan, kacatet wenten 8.600 diri.
29Dane Elisapan okan Dane Usiel sane dados pamimpin palingsehane puniki. Palingsehane puniki patut ngwangun kemahnyane ring delod Kemah Linggih Ida Sang Hyang Widi Wasa.
30(3:29)
31Tetegenannyane ngetangang Peti Prajanjiane, meja, genah lampu, pamorboran-pamorboran aturan, prabot sane kanggen antuk parapanditane ring Genahe Sane Suci, miwah korden sane ring Genahe Sane Maha Suci. Dane polih tetegenan nglaksanayang sakancan pakaryan sane ngeniang indik barang-barange punika.
32Sane dados panglingsir suku Lewine punika, Dane Eleasar, okan Dane Harun. Dane polih tetegenan buat ngenterang anake sane ngayahin ring Genahe Sane Suci.
33Sane dados palingsehan Dane Merari inggih punika kulawargan Dane Mahli miwah kulawargan Dane Musi.
34Gebogan anake lanang-lanang sane mayusa asasih wiadin langkungan kacatet 6.200 diri.
35Sane dados panglingsir palingsehane puniki: Dane Suriel okan Dane Abihail. Palingsehane puniki patut nyujukang kemahnyane, baler Kemah Linggih Ida Sang Hyang Widi Wasa.
36Dane sareng sami polih tetegenan buat ngenterang miwah nabdabang tulang kemahe punika, minakadinipun, balok-baloknyane, saka-sakannyane, dasar-dasarnyane miwah sakancan prabotnyane. Dane polih tetegenan buat nabdabang tur ngenterang sakancan pakaryan sane ngeniang indik barang-barange punika.
37Dane taler polih tetegenan buat nabdabang tur ngetangang sesaka, dasar, sendi-sendi, lait-lait miwah tali-tali sane kanggen ring natare sane ring jabaan Kemahe punika.
38Dane Musa miwah Dane Harun kasarengin antuk oka-okan danene, patut nyujukang kemah danene ring ajeng Kemah Linggih Ida Sang Hyang Widi Wasa, inggih punika ring dangin Kemahe punika. Dane sareng sami polih tetegenan buat ngamargiang upacara pangubakti, ring Genahe Sane Suci, pabuat bangsa Israele makasami. Anak lianan, sapasiraja sane mamanah jaga ngamargiang upacarane punika, ipun patut kadanda pati.
39Sakancan anake lanang-lanang ring suku Lewi sane mayusa asasih wiadin langkungan, sane kadaptarang antuk Dane Musa satinut ring pituduh Ida Sang Hyang Widi Wasa manut palingsehannyane suang-suang, wenten 22.000 diri akehipun.
Wong
40Ida Sang Hyang Widi Wasa ngandika ring Dane Musa sapuniki: “Sawatek pianak wong Israele ane muani, ane paling keliha, ento druen Ulun. Sawireh keto catetja adan sawatek pianak wong Israele ane muani ane paling keliha, ane matuuh abulan wiadin kelihan teken ento. Nanging makadadi silurnyane, Ulun jani netepang sakancan wong Lewine ento dadi druen Ulune. Ulun ene Ida Sang Hyang Widi Wasa. Ulun masih netepang ingon-ingon wong Lewine dadi silur sakancan ubuh-ubuhan wong Israele ane lekad jumun daana.”
41(3:40)
42Dane Musa raris ngamargiang sakancan titah Ida Sang Hyang Widi Wasa. Dane nyatet pesengan sakancan oka lanang sane pinih duur,
43sane mayusa asasih wiadin langkungan. Gebogannyane makasami wenten 22.273 diri.
44Ida Sang Hyang Widi Wasa raris ngandika ring Dane Musa sapuniki:
45“Ane jani kita patut ngaturang wong Lewine ento dadi duen Ulune, makadadi silur sakancan pianak wong Israele ane muani ane paling keliha. Aturangja masih ubuh-ubuhan wong Lewine, makadadi silur ubuh-ubuhan wong Israele ane lekad jumun daana.
46Sawatek pianak wong Israele ane muani ane paling keliha ento lebihan buin 273 diri teken pianak-pianak wong Lewine, dadinne lebihne ento patut tebus kita.
47Buat anake ane adiri kita patut nebus aji pipis perak limang keteng manut ukuran ane resmi.
48Pipise ento patut kaserahang teken Harun muah teken pianak-pianakne.”
49Dane Musa raris nglaksanayang titah Ida Sang Hyang Widi Wasa punika. Dane raris ngambil,
50jinah perak 1.365 bidang akehipun,
51tumuli kaserahang ring Dane Harun miwah ring oka-okan danene.
Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel