Dosan
1Sedek rahina anu putran Dane Harun, Dane Nadab miwah Abihu, raris ngambil pasepan danene suang-suang tumuli kadagingin baa miwah menyan raris katurang ring ayun Ida Sang Hyang Widi Wasa. Nanging genine punika nenten suci, santukan Ida Sang Hyang Widi Wasa nenten mituduhang dane ngaturang pasepane punika.
2Tan dumade Ida Sang Hyang Widi Wasa raris nedunang geni, sane ngeseng dane sareng kalih ngantos seda irika ring ayun Ida Sang Hyang Widi Wasa.
3Sasampune punika Dane Musa raris mabaos ring Dane Harun, sapuniki: “Puniki paindikan sane sampun kasabdayang antuk Ida Sang Hyang Widi Wasa, ritatkala Ida masabda sakadi asapuniki: ‘Sawatek anake ane ngancangin Ulun ia patut ngluihang kasucian Ulune. Ulun lakar nyinahang kaluihan Ulune teken kaulan Ulune.’” Nanging Dane Harun meneng kewanten.
4Dane Musa raris mabaos ring Dane Misael miwah Dane Elsapan okan Dane Usiel pernah paman Dane Harun, sarwi ngandika ring dane sapuniki: “Maija paman gosongja sawan kaponakan pamane uli Kemah Sucine, tur pejangja di jabaan pakemahane.”
5Duaning punika dane sareng kalih raris ngosong sawane sami rauh panganggennyane kabakta ka jabaan pakemahane, sakadi sane sampun kapangandikayang antuk Dane Musa.
6Sasampune punika Dane Musa tumuli ngandika ring Dane Harun miwah paraputran danene, Dane Eleasar miwah Itamar, sapuniki: “Sampunangja semeton manggayang rambut semetone nenten masuahin tur sampunang mesbes kawaca sane makacihna semeton pada sungsut. Yening semeton kadi asapunika, semeton jaga seda, tur Ida Sang Hyang Widi Wasa jaga menggah piduka ring pasamuane makasami. Nanging semeton bangsa Israele makasami dados sedih kingking mangenang sang padem, sane kageseng antuk geni sane tedun saking Ida Sang Hyang Widi Wasa.
7Sampunang semeton matilas saking gapuran Kemah Sucine mangda sampunang semeton seda, santukan semeton sampun kasuciang buat ngancangin Ida Sang Hyang Widi Wasa.” Duaning punika dane raris nglaksanayang sakadi sane sampun kapangandikayang antuk Dane Musa.
Pidab
8Ida Sang Hyang Widi Wasa raris ngandika ring Dane Harun sapuniki:
9“Kita muah pianak-pianak kitane tusing pesan dadi macelep ka Kemah Sucine, sasubane kita nginem anggur wiadin arak, apanga eda kita mati. Pidabdabe ene patut kamanggehang baan katurunan kitane makejang.
10Kita patut maminayang apa ane kasuciang buat Ida Sang Hyang Widi Wasa, muah apa ane dadi anggon ajak liu, buina encen ane suci muah encen ane leteh.
11Kita patut ngurukang sakancan bangsa Israele sakancan pidabdabe ane suba paicayang Ulun teken kita majalaran I Musa.”
12Dane Musa raris mabaos ring Dane Harun miwah putran danene sane kantun nyeneng, inggih punika Dane Eleasar miwah Dane Itamar, sapuniki: “Ambilja aturan sesajen sane kantun ring aturan rayunan sane katurang ring Ida Sang Hyang Widi Wasa. Rarisang makarya roti tan paragi antuk tepunge punika, raris ajengang ring sisin pamorboran aturane, santukan aturane punika kalintang suci.
13Ajengangja rotine punika ring genahe sane suci. Punika sane dados eduman semetone miwah oka-okan semetone, saking gandum sane katur ring Ida Sang Hyang Widi Wasa. Punika titah sane sampun kasabdayang antuk Ida Sang Hyang Widi Wasa ring tiang.
14Nanging semeton miwah kulawargan semetone dados ngajengang tangkah miwah buntut wewalungan sane durian sane katurang dados aturan istimewa ring Ida Sang Hyang Widi Wasa, pabuat pikolih sang panditane. Semeton kengin ngajengang punika ring genah-genahe sane suci manut sopacaraning agama. Aturane punika sampun kapaicayang ring semeton miwah oka-okan semetone, makadados eduman semetone saking aturan karahayuan wong Israele.
15Ipun sareng sami patut makta buntut sane durian, miwah wewalungane punika rikala muluknyane katurang makadados aturan rayunan ring ayun Ida Sang Hyang Widi Wasa. Bagiane punika dados pikolih semetone miwah oka-okan semetone salami-laminipun sakadi sane kapituduhang antuk Ida Sang Hyang Widi Wasa.”
16Dane Musa raris nakenang kambinge sane pacang kanggen aturan panyupat dosa tur kuningayang ring dane mungguing aturane punika sampun maborbor. Indike punika ngawinang dane duka ring Dane Eleasar miwah Dane Itamar, tumuli ngandika sapuniki:
17“Napi awinan semeton nenten ngajengang aturan panyupat dosane punika ring genahe sane suci? Aturane punika suci pisan, tur Ida Sang Hyang Widi Wasa sampun maicayang punika ring semeton mangda dosan bangsa Israele kampurayang.
18Santukan getihnyane nenten kabakta ka jeroan Kemah Sucine, sapatutipun semeton ngajengang aturane punika ring genahe sane suci, sakadi sane sampun baosang tiang ring semeton.”
19Dane Harun mabaos ring Dane Musa sapuniki: “Boyake bangsa Israele ring rahinane puniki sampun ngaturang aturan panyupat dosa miwah aturan maborbor ring Ida Sang Hyang Widi Wasa? Nanging yadiastu kadi asapunika bencanane puniki taler nibenin tiang. Yen menawi tiang sampun nunas aturan panyupat dosane punika ring rahinane puniki, janten taler Ida Sang Hyang Widi Wasa pacang nenten ledang ring kayun.”
20Riwau Dane Musa mireng indike punika dane rumasa liang.
Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel