Ida S
1Pada ngaturang panyuksmaja ring Ida Sang Hyang Widi Wasa. Critayangja kagungan Idane, tur tuturangja ring parabangsane sami saluiring paindikan sane sampun kardi Ida.
2Pada makidungja muji Ida Sang Hyang Widi Wasa, dartayangja saluiring pakardin Idane sane tawah-tawah.
3Pada liangja, santukan iraga puniki dados druen Idane. Sakancan jadmane sane ngastiti bakti ring Ida patut pada masuka rena.
4Nangkil tur nunas tulungja ring Ida Sang Hyang Widi Wasa, tur ngastitija ring Ida tan papegatan.
5Semeton katurunan Dane Abraham, parekan Idane. Semeton katurunan Dane Yakub, anak seselikan Idane. Elingangja katawahan-katawahan sane sampun kasinahang antuk Ida Sang Hyang Widi Wasa miwah tetepasan sane sampun tibakang Ida.
6(105:5)
7Ida Sang Hyang Widi Wasa punika, Widin iragane. Titah Idane punika pabuat sadaging jagate makasami.
8Ida jaga ngamanggehang prajanjian Idane ngantos salami-laminipun. Prajanjian Ida punika pabuat panyiuan turunan.
9Ida jaga ngamanggehang pasubaya sane sampun kardi Ida sareng Dane Abraham miwah prajanjian Idane ring Dane Ishak.
10Ida Sang Hyang Widi Wasa ngardi prajanjian sareng Dane Yakub, prajanjian sane pacang manggeh ngantos salami-laminipun.
11Ida ngandika sapuniki: “Ulun lakar maicayang tanah Kanaane teken kita. Tanahe ento lakar dadi gelah kitane.”
12Kaulan Ida Sang Hyang Widi Wasa punika wantah akidik cacakanipune, samaliha dados wong pendonan ring tanah Kanaan.
13Ipun ngumbara saking gumine sane asiki ka gumine sane lianan, saking kaprabon sane asiki ka kaprabon sane lianan.
14Nanging Ida Sang Hyang Widi Wasa nenten nglugrain anake jaga nyangsaren kaulan Idane, tur buat nyayubin kaulan Idane Ida miteketin pararatune sami, kadi asapuniki:
15“Eda pesan mlegendahang parekan seselikan Ulune, tur eda pesan nundik paranabin Ulune.”
16Ida Sang Hyang Widi Wasa ngadakang sayah ageng ring jagat kaulan Idane punika tur ngambil bekelnyane makasami.
17Nanging Ida ngutus anak adiri ngriinin ipun, inggih punika dane Yusup, anak sane sampun kadol dados panjak.
18Cokor danene kategul antuk ante miwah kantan danene kante antuk ante besi,
19kantos saluiring sane sampun ramalang dane sawiakti prasida kasidan. Sabdan Ida Sang Hyang Widi Wasa sane muktiang mungguing dane patut.
20Sapanglanturipun, sang prabu ring Mesir sampun mebasang dane. Pamrentah bangsane punika sane mebasang dane.
21Ida maicayang pamrentahan idane ring Dane Yusup, tur ngamanggehang dane dados pamrentah buat jagat idane makasami.
22Ida maicayang wewenang ngamong paraprakanggen idane, tur kakuasan buat mrentahang parabaudandan idane.
23Sasampune punika Dane Yakub raris lunga ka Mesir, tur jenek irika.
24Ida Sang Hyang Widi Wasa mapaica oka akeh pisan ring parakaulan idane, tur nadosang ipun sitengan ring meseh-mesehipune.
25Ida Sang Hyang Widi Wasa ngawinang wong Mesire pada geting ring kaulan Idane, tur ngawinang ipun nibakang pangindrajala ring kaulan Idane.
26Sasampune punika Ida raris ngutus Dane Musa, parekan Idane miwah Dane Harun sane sampun selik Ida.
27Sang kalih nyinahang pakardin Ida Sang Hyang Widi Wasa Sane Maha Wisesa, tur ngardi katawahan-katawahan ring tanah Mesir.
28Ida Sang Hyang Widi Wasa nedunang peteng dedet ring jagate irika, nanging wong Mesire nenten ngiringang pituduh Idane.
29Tukad-tukade ring Mesir ubah Ida toyanipune kadadosan rah, tur Ida ngamademang sawatek ulame sane wenten irika.
30Jagat Mesire sami kabekin antuk katak. Kantos rauh ka purin ida sang prabu sami bek antuk katak.
31Ida Sang Hyang Widi Wasa tumuli mapituduh, raris wenten buyung miwah legu ngriung nglikub jagatnyane makasami.
32Makadados gentos sabehe sane biasa, Ida nedunang ujan es miwah kilap ring tegalnyane.
33Ida ngrusak wit anggur miwah wit aanipun, tur mungkatang sawatek wit tarune.
34Ida masabda, raris wenten balang rauh, nenten keni wilangin katahipun.
35Sawatek sane ring tegale sami teda ipun, tur sakancan pamuponnyane sami teda ipun.
36Ida ngamademang sakancan pianak muani sane pinih kelih saking sawatek kulawargan wong Mesire.
37Sasampune punika Ida raris nuntun bangsa Israele rarud saking irika. Bangsane punika pada makta mas miwah perak, tur ipun sareng sami pada seger tur siteng-siteng.
38Wong Mesire pada ajerih ring ipun, tur pada liang rikala ipun makaon saking irika.
39Ida Sang Hyang Widi Wasa nyayubin kaulan Idane antuk mega, tur mapaica geni rikala wengi, buat nyuluhin ipun.
40Ipun sareng sami pada mapinunas, tur Ida mapaica paksi puuh. Ida mapaica ajengan saking suarga mangda ipun sareng sami prasida wareg.
41Ida mungkah gunung batu, tumuli wenten toya muncrat tur membah ring tegal melakange, waluya sakadi tukad.
42Ida eling ring prajanjian Idane sane suci ring Dane Abraham, parekan Idane.
43Duaning punika Ida nuntun kaulan Idane rarud saking Mesir, mawinan ipun sareng sami pada makidung miwah masuryak-suryak saha liang.
44Ida mapaica tanah druen bangsane lian ring ipun, tur nglugrain ipun pada ngambil pategalanipune dados druenipune suang-suang,
45mangda kaulan Idane pada satinut ring pidabdab Idane, tur ngamanggehang pituduh-pituduh Idane makasami. Pujija Ida Sang Hyang Widi Wasa!
Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel