Dasa
1Dane Musa raris ngesengin tur munduhang bangsa Israel makasami raris dane ngandika asapuniki: “Parasemeton bangsa Israel, pirengangja pidabdab-pidabdab sane aturang tiang ring parasemeton ring rahinane puniki. Plajahinja pidabdab-pidabdabe punika tur laksanayangja saha tuon.
2Ida Sang Hyang Widi Wasa, Widin iragane sampun ngardi prajanjian ring iraga ring Gunung Sinai,
3boya wantah ring leluur iragane kewanten, nanging taler ring iraga makasami sane kantun urip ring rahinane puniki.
4Ring gununge punika, Ida Sang Hyang Widi Wasa masabda saking tengah genine marep-arepan ring semeton.
5Daweg punika tiang majujuk ring pantaran parasemetone ring Ida Sang Hyang Widi Wasa buat ngrauhang sabdan Idane ring parasemeton, duaning parasemeton ajerih ring genine tur nenten kayun munggah ka gununge punika. Ida Sang Hyang Widi Wasa ngandika sapuniki:
6‘Ulun ene Ida Sang Hyang Widi Wasa, Widin kitane, ane ngajak kita pesu uli Mesir, di tongos kitane kapanjakang.
7Edaja kita nyungsung widi-widi ane lenan. Sungsungja Ulun dogen.
8Eda pesan kita ngae arca pabuat dewek kitane yadiastu ane marupa apa jua, ane ada di langite muah di gumine, wiadin ane ada di yehe di beten gumine.
9Edaja kita nyungsung muah nyumbah arcane ento, sawireh Ulun Ida Sang Hyang Widi Wasa, Widin kitane tusing lila yening ada ane nyamenin Ulun. Ulun nyisipang anake ane geting teken Ulun, kanti neked katurunan ane kaping telu wiadin kaping pat.
10Nanging Ulun nyinahang sih pasuecan Ulune teken panyiuan katurunan anake ane astiti bakti teken Ulun tur nglaksanayang titah Ulune.
11Edaja kita ngawag-awag nyambat parab Ulune, sawireh Ulun Ida Sang Hyang Widi Wasa, Widin kitane lakar nyisipang anake ane ngawag-awag nyambat parab Ulune.
12Luihangja dina Sabate, tur ajiang dinane ento dadi dina ane suci, sawireh Ulun ene Ida Sang Hyang Widi Wasa, Widin kitane ane nitahang ento teken kita.
13Kita kalugra magarapan sajeroning nem dina.
14Nanging dinane ane kaping pitu ento, dina parerenan ane kasuciang pabuat Ulun. Di dinane ento tusing ada anak ane dadi magarapan. Yadian kita wiadin pianak-pianak kitane, panjak-panjak kitane, ingon-ingon kitane, aketo masih wong sunantara ane nongos di gumin kitane. Panjak-panjak kitane patut mareren patuh buka kita.
15Ingetangja dugas kitane kapanjakang di Mesir, tur Ulun Ida Sang Hyang Widi Wasa, Widin kitane suba mebasang kita malantaran kawisesan ane gede. Ento awanane Ulun nitahang apanga kita ngluihang dina Sabate.
16Baktija kita teken meme bapan kitane. Ento titah Ida Sang Hyang Widi Wasa, Widin kitane apanga kita rahayu tur dawa tuuh kitane, di gumine ane lakar paicayang Ulun teken kita.
17Edaja ngamatiang jlema.
18Edaja mamitra.
19Edaja mamaling.
20Edaja dadi saksi bobab marep teken anak len.
21Edaja ngedotang kurenan anak len, edaja ngedotang umahnyane, tanahne, panjakne, ingon-ingonne, keledaenne wiadin barang ane lenan ane dadi pagelahannyane.’
22Punika pituduh-pituduh sane kapaicayang antuk Ida Sang Hyang Widi Wasa pabuat parasemeton sareng sami, daweg semeton mapunduh ring gununge punika. Wantah titah-titahe puniki sane paicayang Ida, rikala Ida ngandika antuk suaran kerug-krebek saking geni miwah saking megane sane tebel punika. Sasampune punika Ida raris nyuratang pituduhe punika ring papan batune kekalih, tumuli kapaicayang ring parasemeton.”
Wong
23“Rikala sakuub gununge punika ngendih, tur semeton mireng wenten sabda saking peteng dedete, parapamimpin miwah panglingsir suku bangsan semetone raris pada rauh ring tiang.
24Dane pada mabaos sapuniki: ‘Ida Sang Hyang Widi Wasa, Widin iragane sampun nyinahang kagungan miwah kaluihan Idane rikala tiang miragi Ida ngandika saking genine punika. Ring rahinane puniki tiang sampun ngantenang mungguing jadmane kantun mrasidayang urip, yadiastu Ida Sang Hyang Widi Wasa sampun masabda ring ipun.
25Nanging napi pikenoh tiange ngetohang jiwan tiange malih. Genine sane madurgama punika jaga ngeseng tiang makasami. Tiang pracaya mungguing tiang pacang padem yening Ida Sang Hyang Widi Wasa, Widin tiange malih jaga ngandika ring tiang sareng sami.
26Naeninke wenten anak kantun urip sasampun ipun miragiang Ida Sang Hyang Widi Wasa, Sang Maraga Urip, masabda saking genine?
27Duaning punika, inggih semeton Musa, rarisang semeton sane lunga buat mirengang sakancan sabdan Ida Sang Hyang Widi Wasa, Widin iragane. Sasampune punika rarisang malih mawali ring tiang buat nartayang napi sane sampun sabdayang Ida ring semeton. Tiang sareng sami sadia jaga miragiang tur nglaksanayang sabdane punika.’
28Rikala Ida Sang Hyang Widi Wasa mireng indike punika, Ida tumuli ngandika ring tiang sapuniki: ‘Ulun suba mireng apaja ane suba orahanga teken bangsane ene, tur mula beneh raosne ento.
29Yen sasajaan ia setata marasa buka keto, yen sajaan ia setata ngajiang Ulun tur nglaksanayang sakancan titah Ulune, ia ajaka makejang muah katurunanne lakar rahayu salawas-lawasne.
30Ane jani kemaja kita majalan tur tunden bangsane ento mulih ka kemahe suang-suang.
31Nanging kita, Musa, nongosja kita dini ajak Ulun. Kita ane lakar icen Ulun sakancan pidabdab muah titah Ulune. Kita patut ngurukang unduke ento teken bangsane ento apang pada laksanayanga di gumine ane lakar paicayang Ulun teken ia.’
32Parasemeton bangsa Israel, pada pagehja nglaksanayang titah Ida Sang Hyang Widi Wasa, Widin semetone. Sampunang wenten angan asikiko sane purug semeton.
33Laksanayangja makasami, mangda parasemeton rahayu tur prasida jenek ring jagate sane pacang aug semeton punika.”
Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel