Kota
1Ida Sang Hyang Widi Wasa malih ngandika ring tiang, sapuniki:
2“Ih manusa, edengangja teken kota Yerusaleme, laksanannyane ane cemer ento.
3Orahang teken ia, sabdan Ida Sang Hyang Widi Wasa Sang Maha Luur ane katiba teken ia, kene: Iba lekad di tanah Kanaan. Bapan ibane wong Amori muah memen ibane wong Het.
4Dugas ibane mara lekad, tusing ada anak ane ngetep pungsed ibane, wiadin manjusin iba, wiadin ngosot iba aji uyah, wiadin ngangkebin iba aji pangaput.
5Tusing ada anak ane madalem iba, buat nglaksanayang unduke ento pabuat iba. Dugase iba mara lekad, tusing ada anak ane tresna teken iba. Iba kentungang di tegale.
6Sasubane keto Ulun lantas ngliwat di tongose ento, ditu cingak Ulun iba glalang-gliling nguyak getih ibane. Iba kakaput baan getih, nanging Ulun tusing nglugrain iba mati.
7Ulun numbuhang iba buka entik-entikan ane mokoh. Iba tumbuh siteng tur landung dadi anak luh bajang. Nyonyon ibane nyangkih tur bok ibane suba mentik dawa nanging iba malalung.
8Dugas Ulune buin ngliwat ditu, cingak Ulun iba suba pantes kasemaran. Ulun ngangkebin awak ibane ane malalung ento aji bajun Ulune, tur majanji lakar nresnain iba. Nah ditu Ulun masubaya lakar nganten ngajak iba, tur iba dadi gelah Ulune.” Kadi asapunika sabdan Ida Sang Hyang Widi Wasa Sane Maha Luur.
9“Sasubane keto ulun lantas nyemak yeh, tur masehin getih ibane. Ulun ngapunin awak ibane aji lengis saitun.
10Ulun nyalukin iba panganggo ane masulam, tur maang sepatu ane malakar aji kulit ane paling melaha, kamben cerik aji kain lenen muah slendang sutra.
11Ulun nganggoin iba aji gelang muah kalung sesocan.
12Ulun maang iba anting-anting ane mapasang di kuping muah di cunguhe muah nyalukin iba gelungan ane melah.
13Iba nganggo pepayasan aji mas muah perak, tur iba setata nganggo panganggo kain lenen muah sutra ane masulam. Iba ngamah roti ane malakar aji tepung ane paling melaha muah ngelah madu muah lengis saitun ane lakar amah iba. Kajegegan ibane dumilah tur iba dadi pramesuari.
14Iba sayan kasub di pantaran sakancan bangsane, baan kajegegan ibane ane tan paceda, sawireh tuah Ulun ane ngae iba dadi jegeg buka keto.” Kadi asapunika sabdan Ida Sang Hyang Widi Wasa Sane Maha Luur.
15“Nanging kajegegan muah kakasuban ibane ento anggon iba melah buat medem ngajak sakancan anake ane nekain iba.
16Makudang-kudang panganggon ibane, anggon iba mayasin tongos-tongos ibane mabakti, tur patuh buka sundele, iba nyerahang awak ibane teken sakancan anake.
17Perak muah mas ane baang Ulun iba, jemak tur anggon iba ngae pepindan anak muani, laut iba mamitra ngajak togoge ento.
18Panganggo ane masulam ane baang Ulun, ento jemak iba laut anggoin iba bedogole ento, tur sasubane keto iba laut ngaturang lengis saitun muah menyan paican Ulune teken togoge ento.
19Ulun ngicen iba pangan kinum luire: tepung ane paling melaha, lengis saitun muah madu, nanging ento aturang iba dadi aturan buat ngalih pasuecan arca-arcane ento.” Kadi asapunika sabdan Ida Sang Hyang Widi Wasa Sane Maha Luur.
20“Sasubane keto, pianak-pianak ibane luh muah muani, ane lekadang iba ngajak Ulun, jemak iba anggon iba aturan pabuat arca-arcane ento. Tusingke unduk tusing satia tuu teken Ulun ento suba jele pesan?
21Apa buin yen iba nyemak putran Ulun, anggon iba aturan teken arca-arcane ento.
22Sanun ibane nyalanang laksana ane cemer dadi sundel, iba tusing pesan taen inget teken unduk ibane dugase iba enu cerik, dugas ibane malalung glalang-gliling nguyak getih ibane.”
Laksa
23Ida Sang Hyang Widi Wasa Sane Maha Luur ngandika, sapuniki: “Sengkala iba! Sengkala! Iba nglaksanayang sakancan kacorahane ento,
24buina disabilang sisin margane iba ngae tongos nyungsung arca muah tongos nyundel.
25Iba maid kajegegan ibane ka endute. Iba nyerahang awak ibane teken sakancan anake ane kema, tur nglemah iba lebihan teken sundele.
26Iba ngajak pisagan ibane wong Mesire ane buang ento medem, tur unduk ibane ento anggon iba mangunang pidukan Ulune.
27Ane jani Ulun suba ngamengang liman Ulune buat ngukum iba, tur ngaadang duman mertan Ulune uli sig ibane. Ulun suba nyerahang iba teken wong Pilistine, ane geting teken iba muah seneb teken laksanan ibane ane dursila.
28Sawireh iba tusing marasa lega teken ane lenan, dadinne iba malaib nututin wong Asure. Iba dadi mitrannyane, nanging ia masih tusing ngranayang lega keneh ibane.
29Iba masih mamitra ngajak wong Babele, bangsa sudagare ento, nanging ia masih tusing ngranayang keneh ibane lega.”
30Sapuniki sabdan Ida Sang Hyang Widi Wasa Sane Maha Luur: “Iba suba nglaksanayang sakancan unduke ento, buka sundele ane tusing ngelah kimud.
31Sig sabilang margane iba ngae tongos nyungsung arca muah tongos nyundel. Nanging iba tusing ngalih pipis buka sundele ane biasa.
32Iba tan bina buka anake luh ane mamitra ngajak wong sunantara buat nyilurin tresnannyane teken somahne.
33Sundele biasanne maan upah, nanging iba maang upah sakancan anake ane nresnain iba muah ngupahin sakancan anake ane teka medem ngajak iba uli milehan.
34Iba dadi sundel ane tawah pesan. Tusing ada anak ane maksa ngajak iba medem. Iba tusing nagih upah, nanging iba ane ngupahin anake. Sasajaane iba ene bina pesan.”
Tetep
35Duaning punika, sane mangkin ih anak istri panayang kota Yerusalem, piragiangja sabdan Ida Sang Hyang Widi Wasa.
36Sapuniki sabdan Ida Sang Hyang Widi Wasa Sane Maha Luur: “Iba ngelus panganggon ibane tur buka sundele iba nyerahang awak ibane teken mitran ibane muah teken arca-arcan ibane ane cemer, buina iba ngamatiang pianak-pianak ibane anggon iba aturan teken arca-arcane ento.
37Sawireh keto, Ulun lakar munduhang sakancan anake ane dadi mitran ibane yadian ane demenin iba, yadian ane getingin iba. Ulun lakar ngajak ia ajaka makejang ngiter iba, tur sasubane keto, Ulun lakar ngelus panganggon ibane, apang tepukina iba malalung.
38Ulun lakar ngukum iba, majalaran pajalan ibane mamitra muah amati-mati, tur sajeroning pidukan muah bebendun Ulune, Ulun lakar nibakang danda pati teken iba.
39Ulun lakar nyerahang iba teken ia ajaka makejang, tur ia lakar nguug tongos-tongos ibane nyundel muah nyungsung arca. Ia lakar nyuang panganggo muah sesocan ibane, tur ngutang iba enu malalung.
40Ia lakar ngangsok anake liu apanga ngencur iba aji batu, tur ia lakar mokeng-mokeng iba aji pedangne.
41Ia lakar nunjel umah ibane tur lakar ngukum iba di arepan anake luh-luh liu pesan. Ulun lakar nyuudang iba dadi sundel, tur ngae apang iba suud ngupahin mitran ibane.
42Sasubane keto pidukan Ulune lakar suud, tur Ulun lakar lemper. Ulun lakar suud duka muah iri ati.
43Iba suba engsap teken laksanan Ulune marep teken iba dugas ibane enu bajang, tur iba suba ngawanang Ulun duka majalaran sakancan laksanan ibane. Ento kranane Ulun ngwales sakancan unduke ento teken iba. Ngudiang dadi iba buin ngimbuhin sakancan laksanan ibane ane cemer ento aji laksana nyolong semara ane dursila ento?” Kadi asapunika sabdan Ida Sang Hyang Widi Wasa Sane Maha Luur.
Sakad
44Ida Sang Hyang Widi Wasa ngandika sapuniki: “Ih Yerusalem, anake lakar nganggon sesonggane ene katiba teken iba, kene: ‘Buka imeme muah buka nyamane luh.’
45Iba sasajaane dadi pianak luh memen ibane. Ia gedeg teken somah muah pianak-pianakne. Iba patuh buka nyaman ibane luh, ane geting teken somah muah pianak-pianakne. Iba muah kota nyaman ibane ngelah meme wong Het muah bapa wong Amori.
46Embok ibane ento Samaria ane bedaja makamuah desa-desannyane. Adin ibane luh makamuah desa-desannyane ento Sodom, ane bedelod.
47Apake iba lega nuut tindakannyane muah nempa laksanannyane ane cemer ento? Tusing! Malahan singja buin amunapa makelonne iba jeg mabikas jelekan teken ia, di saluiring laksanan ibane.”
48Ida Sang Hyang Widi Wasa Sane Maha Luur ngandika sapuniki: “Sasajaane Ulun ene Widi ane nyeneng. Adin ibane Sodom muah desa-desannyane, tusing taen nglaksanayang paundukan ane corah, buka ane laksanayang iba makamuah desa-desan ibane.
49Ia muah nyama-nyamaannyane ane luh pada nyumbungang dewek baana ia cukup ngelah pangan kinum muah muponin sutrepti raharja, nanging ia tusing rungu teken anake ane tiwas-tiwas muah ane sangsara.
50Ia sumbung muah bengkung tur nglaksanayang paundukan ane getingin Ulun. Ento awanane Ulun nyirnayang ia, buka ane suba tawang iba.
51Dosan Samariane tusing ada atenga yen bandingang teken dosan ibane. Iba suba nglaksanayang paundukan ane cemeran teken paundukan ane taen laksanayanga. Yen bandingang, kajaatan ibane ngranayang nyaman ibane ngenah buka anake tan padosa.
52Ane jani iba patut negen kimud ibane. Dosa-dosan ibane bes sanget gedenan teken dosa-dosan nyama-nyamaan ibane kanti pangenahne ia tan padosa yan saihang teken iba. Ane jani taanang muah tegen kimud ibane, sawireh iba ngranayang nyama-nyamaan ibane ngenah tan padosa.”
Kota
53Ida Sang Hyang Widi Wasa ngandika ring kota Yerusaleme, sapuniki: “Ulun lakar ngadakang apanga ia buin gemuh landuh, nah ento kota Sodom muah desa-desannyane, keto masih kota Samaria muah desa-desannyane. Nah Ulun masih lakar ngadakang apanga iba gemuh landuh.
54Iba lakar kimud teken awak ibane padidi, tur kanistan ibane lakar nyinahang teken nyama-nyamaan ibane, mungguing ia aget pesan.
55Ia lakar gemuh landuh, tur iba muah desa-desan ibane masih lakar kabenahin.
56Dugas ibane sumbung muah satonden kacorahan ibane kasinahang, tusingke kota Sodome anggon iba embal-embalan? Ane jani iba patuh buka ia, iba dadi embal-embalan di pantaran wong Edom, wong Pilistin muah pisaga-pisagan ibane ane lenan, ane geting teken iba.
57(16:56)
58Iba patut negen pikolih laksanan ibane ane cabul muah cemer ento.” Kadi asapunika sabdan Ida Sang Hyang Widi Wasa.
Pasub
59Ida Sang Hyang Widi Wasa Sane Maha Luur masabda sapuniki: “Ulun lakar nibakang teken iba, unduk ane suba kapastiang buat iba, sawireh iba tusing inget teken prajanjian ibane muah lompang teken pasubayan ibane.
60Nanging Ulun lakar ngamanggehang prajanjian ane gae Ulun ngajak iba dugase iba enu bajang, buina Ulun lakar ngae prajanjian ane langgeng ngajak iba.
61Iba lakar inget teken laksanan ibane, tur iba lakar nandang kimud ulihan ento, dikalan ibane buin matemu teken embok muah adin ibane. Ulun lakar nglugrain ia dadi embok muah adin ibane, yadiapin unduke ento tusing mungguh sig pasubayan Ulune ngajak iba.
62Ulun lakar nganyarang pasubayan Ulune ngajak iba, tur iba lakar nawang, mungguing Ulun ene Ida Sang Hyang Widi Wasa.
63Ulun lakar ngampurayang sakancan laksanan ibane ane pelih nanging iba lakar inget teken laksana-laksanan ibane ane pelih ento tur iba lakar kimud pesan ngemelang bungut ibane.” Kadi asapunika sabdan Ida Sang Hyang Widi Wasa Sane Maha Luur.
Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel