Indik
1Ida Sang Hyang Widi Wasa Sane Maha Luur ngandika sapuniki: “Ih manusa, uman-umanja Gog, kepalan pamrentah bangsa Mesek muah Tubale, tur orahang teken ia, mungguing Ulun ene dadi musuhne.
2Ulun lakar malikang ia ngungsi tongos ane anyar tur nuntun ia pesu uli tongos ane joh bedaja, kantos ia neked di pagunungan Israele.
3Sasubane keto, Ulun lakar manteg bantang panahe uli limanne kebot muah besin panahne uli limanne kenawan.
4Gog muah wadua balannyane muah parakantinnyane lakar pada bah mati di pagunungan Israele, tur Ulun lakar nepang bangkennyane dadi amah-amahan sakancan kedis muah sato alase.
5Ia lakar pada bah mati di tegale ane jimbar. Ulun Sang Hyang Widi Wasa Sang Maha Luur ane suba masabda buka keto.
6Ulun lakar ngancungang api sig Magoge muah di pasisi ane tongosina baan anake saha sutrepti, tur sakancan anake lakar pada nawang, mungguing Ulun ene Sang Hyang Widi Wasa.
7Ulun lakar masekenang pesan, apanga kaulan Ulune Israel nawang parab Ulun ane suci, buina Ulun tusing nglugrain buin parab Ulune kanistayang. Ditu parabangsane lakar nawang, mungguing Ulun ene Sang Hyang Widi Wasa Widin Israele ane suci.”
8Ida Sang Hyang Widi Wasa Sane Maha Luur ngandika sapuniki: “Dina ane sabdayang Ulun ento suba pasti lakar teka.
9Jlemane ane nongos di kota-kotan Israele lakar pada pesu tur munduhang sanjata ane tan kadi-kadi liunne lakar anggona saang. Ia pada lakar ngendihang api aji tameng, bantang panah muah besin panah, tumbak muah pentong. Saangne ento lakar cukup anggone kanti pitung taun makelonne.
10Ia tusing perlu buin munduhang saang di alase sawireh ia lakar ngelah sanjata liu pesan ane lakar anggona saang. Ia lakar ngrampas muah nyarahin anake ane laad ngrampas muah nyarahin ia.” Ida Sang Hyang Widi Wasa Sane Maha Luur sampun ngandika kadi asapunika.
Ida S
11Ida Sang Hyang Widi Wasa ngandika sapuniki: “Yen sakancan paundukane ene suba kasidan, Ulun lakar mapaica tanah sema teken Gog, ditu di tanah Israel, di lebak ane madan Pangumbara, dangin Segara Matine. Ditu Gog muah sakancan wadua balannyane lakar katanem, tur lebake ento lakar kadanin ‘Lebak Wadua Balan Gog’.
12Pitu bulan makelonne wong Israele lakar nanem sakancan bangkene ento muah mresihin gumine buin.
13Sakancan anake ane di gumine ditu pada nulungin nanem bangkene ento, tur baan laksananne ento paraanake ento lakar kaluihang didina kamenangan Ulune. Ulun Sang Hyang Widi Wasa Sang Maha Luur ane suba masabda buka keto.
14Sasubane liwat pitu bulan, ada makudang-kudang anak muani lakar kapilih, buat nylajah gumine ento, buat ngalih-alihin tur laut nanem bangke-bangkene ane enu makutang duur tanahe, apanga ia nyidaang mresihin gumine.
15Dikalan anake ento pada majalan kema mai di gumine ento, sabilang nepukin tulang jlema, ia lakar ngejang pinget di sisin tulange ento, apanga juru taneme nyidaang teka tur nanem tulange ento di Lebak Wadua Balan Goge.
16(Ditu lakar ada kota ane paek teken tongose ento kadanin manut adan wadua balane ento.) Aketo unduk gumine ento buin kabresihin.”
17Ida Sang Hyang Widi Wasa Sane Maha Luur ngandika ring tiang sapuniki: “Ih manusa, kaukinja sakancan kedise muah burone apanga ia pada teka uli milehan buat ngamah banten ane sediang Ulun pabuat ia ajaka makejang. Lakar ada pesta ane gede pesan di pagunungan Israele. Ditu ia pada maan ngamah daging muah nginum getih.
18Ia pada lakar ngamah bangken paraprajurit muah nginem getih parapamrentahe di gumine, nah ento sakancan anake ane lakar kamatiang buka biri-birine muani wiadin buka panak biri-birine, wiadin buka kambinge wiadin buka sampine mokoh.
19Dikalan Ulune ngamatiang jlemane ento buka carune, kedis-kedise muah burone lakar ngamah sakancan muluk ane dadi baana ngamah muah nginem getih kanti ia pada punyah.
20Di mejan Ulune ia pada lakar ngamah sawatek ane dadi baana ngamah nah ento soroh jaran muah anake ane negakin, paraprajurit muah soroh anake sura dira. Ulun Sang Hyang Widi Wasa Sang Maha Luur ane suba masabda buka keto.”
Bangs
21Ida Sang Hyang Widi Wasa ngandika, sapuniki: “Ulun nglugrain parabangsane nepukin kaluihan Ulune, tur Ulun ngedengang kakuatan Ulune buat nyalanang kaputusan Ulune ane adil.
22Ngawit uli ento kanti saterusne, wong Israele lakar pada nawang, mungguing Ulun ene Sang Hyang Widi Wasa, Widinnyane.
23Buina parabangsane lakar pada nawang mungguing bangsa Israele suba maselong, ento tuah ulihan dosa-dosannyane ane gaena marep teken Ulun. Ulun suba nilar ia, tur nglugrain musuh-musuhnyane ngalahang tur ngamatiang ia di pasiatan.
24Ulun ngicen ia pikolih ane suba kasediaang pabuat kacemeran muah kadursilannyane, tur Ulun suba matilar uli sig iane.”
25Ida Sang Hyang Widi Wasa Sane Maha Luur ngandika sapuniki: “Nanging ane jani, Ulun rumasa sih kapiolasan teken katurunan Yakube, bangsa Israele, tur nadiang ia buin gemuh landuh. Ulun lakar nyayubin parab Ulune ane suci.
26Yen ia suba buin nongos saha rahayu di guminne padidi tur tusing ada buin anak nyangsaren ia, ia lakar nyidayang ngengsapang unduk iane kanistayang, baane ia suba nilar Ulun.
27Buat lakar ngedengang teken parabangsane makejang, mungguing Ulun ene suci, Ulun lakar ngamulihang kaulan Ulune uli sakancan gumi tongos musuh-musuhne.
28Ditu kaulan Ulune lakar nawang mungguing Ulun ene Sang Hyang Widi Wasa, Widinnyane. Ia lakar pada nawang unduke ene, sawireh Ulun suba ngentungang ia dadi tawanan, tur ane jani buin munduhang tur ngajak ia mulih ka guminnyane padidi, buina angan aukudko tusing ada ane makutang.
29Ulun lakar mriokang roh Ulune sig bangsa Israele tur Ulun tusing lakar buin nilar ia. Ulun Sang Hyang Widi Wasa Sang Maha Luur ane suba masabda buka keto.”
Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel