Alkitab Mobile SABDA
[VER] : [BAUZI]     [PL]  [PB] 
 <<  1 Korintus 12 >> 

1Emti vahi Kristus bake tu vuzehi meedam dam oa, sunit uho amu eba oluhuda lam uho eba vi ailo modemda meida lam eho neo uba vi vameadalo mozo. Uho amu neha, “Alam Aha Nutabe Neàna labe meia modi vizi teudi meedam bak lam akatihasu modemna modela?” lahame vabili eba vi ailo modemu uho aime ozobohudi neàdem bake eho uba vameadalo mozo.

2Uho amu Kristus bake tu vuzehi im Abada meedaha vab di iube uho lab meedam bak laba it ozodale. Di labe ubu uho amu modi baleàlehe bak labet modi um ahu adat vei iedi na ostamna it modi alali vou baedamna abo dae vabna ba Alat vameadaha im uba gagom biemda meida laba uho tu vuzehi vou baeda. Labi neo meida laba neo tu vuzehi vou baeda. Gi labihadam bohu vuusu meedaha damat modem bak.

3Labihàmu uho Alam Aha Nutabe Neàna labe meia modi vizi teudem bak biem labe eho nehasu uba vameadalo mozo. Alam Aha Nutabe Neàna labe meia modi vizi vi teudeheda labe ba nehame gagom vabak. “Yesus fà beose,” lahame ba uloome gagodam vabak. Labi laha Alam Aha Nutabe Neàna labe meia modi vizi teudehe vabda labe ba nehame gagom vabak. “Ame Da Yesus im Boehàda am bak,” lahame ba gagom vabak.

4Gi neham bak. Alam Aha Nutabe Neàna labe Aba Aho meia modi vizi teudi meedam im lam ba bisi dam ahebu im ulohona modi vizi teudi meedam vabak. Aho gi ahala modi ahala modidam bak. Labihadamnàme ame ahala modi vizi modidam bak lam gi Alam Aha Nutabe Neàna lam ame na debu modeheda vàmtea am bak.

5Labi laha iho Kristus bake tu vuzehi meedam dam nibe, “Iho im Boehàda Yesus fà iba deelese,” lahame im Abadata meedam im lam gi im mei im meime meedamnàme ibi iho lab meedam bak lam, “Fà iba deelese,” lahame ozome gagomda lam gi vàmtea Boehàda Yesus am bak.

6Labi laha iho dam imti vahi Kristus bake tu vuzehi meedam dam totbaho labe im neàdem bak laba ozome iho im feà bak meedam im lam gi im mei im mei lahadam bak. Lahadamnàme ame bak lam iba modi vizi teudi meedamda lam gi vàmtea Ala am bak.

7Eho etei uba neo gagolo modem im nidi nim uho mahate aime vi ozodale. Alam Aha Nutabe Neàna labe iba modi vizi teudedam di labe gi im mei meia modi vizi teudem im feàna mei meeda. Labi neo im mei meia modi vizi teudem im feàna mei meeda. Gi labihasu ahala modidam bak. Ame lab ahala modidam bak lam gi iho Kristus bake tu vuzehi vahi meedam dam ahebu neàdedam bak laba ozome labihadaha bak.

8Ame Alam Aha Nutabe Neàna labe ame bak lam meedam di gi nehada. Aho uba meidate modi vizi teudi bisi im ozobohudi meia vameadam bak ame. Labi ame Alam Aha Nutabe Neàna vàmtea labe Aho neo uba meidate modi vizi teudi Alam im aime fa meia vahokedume ozobohudedume fi gatedam bak ame.

9Labi ame Alam Aha Nutabe Neàna vàmtea labe Aho neo uba meidate modi vizi teudi, “Na damat ihimo modem biem im feàna lam Alat modem meo bak,” lahame am ahu abobo tu vuzehi meedam bak ame. Labi ame Alam Aha Nutabe Neàna vàmtea labe Aho neo uba meidate modi vizi im dedateli dam gailedahada lam modi fa neàdedam bak ame.

10Labi Aho neo uba meidate modi vizi teudi na damat ihimo modem biem im feàna meedam bak ame. Labi Aho neo uba meidate modi vizi teudi Alat aha Abadat vameadaha im lam ame da laba modi ozobohudi fi gatei aho aime fa dam bake ahate vameaidam bak ame. Labi Aho neo uba meidate modi vizi teudi ame da labe aho dat meida labe vameadaha im aim di, “Ame im vameadamda lam Alam Aha Nutabe Neàna labe ame da laba modi vizi imbona vameadào? Setan ame da laba modi vizi giomim vameadào?” laham bak lam Alam Aha Nutabe Neàna labe ame da laba modi vizi ahamo ozobohudi gagodam bak ame. Labi Aho neo uba meidate modi vizi teudi ame da labe aho naedat it aim biem dae mei dae meime vameadam bak ame. Labi Aho neo uba meidate modi vizi teudi ame da labe ahamo fa dat meida labe am naedat it aim biem dae lab vameadaha bak lam vi aime, “Ame da labe akatihasu vameadàla?” laham bak ozobohudi fi gatei fa dam bake iademe ahate vameadam bak ame.

11Alam Aha Nutabe Neàna vàmtea labe Ahamo labihasu ame dam laba ahala modi vizi teudi modidam bak. Labi Aho ame bak lam meedam di gi Aba Aho ozoho bak labet la modi le modidam bak.

12Iho Kristus bake tu vuzehi vahi im Abada meedam dam nibe im dam zi dua bak lamti im dam so niba modealahana zi nimti ulohote. Neham bak. Im dam so niba modealahana nim zi dualehenàme ot odosiame fa vahi ab dat sobuleham bak. Labi Kristus laha labihaha bak. Am gi Dat vàmtea. Lahana im dam Aba tu vuzehi Amti vou ali ahu vàmadehe dam nim dua labe fa vazisi debu vàmadehe bak.

13Eho gi neham bak ozome uba labi gagoho bak. Iho Kristus bake tu vuzehi vahi meedam dam nim abo dam mei debuti dam mei debuti am bak. Im dam totbaho Yahudi damat modem bak. Labi im dam totbaho Yahudi damat modem vab damat modem bak. Labi im dam totbaho mei na teo meedam damat modem bak. Labi im dam totbaho mei na teo meedam vaba gi ihimo ozome meedam damat modem bak. Labihadaha bak. Labihadamnàme meit iba vuu valo baptisleidaha di lam Alam Aha Nutabe Neàna vàmtea labe Ahamo im ahebu modi vizedaha labe im Yesus Kristusam dam debuli ab vàmadeham bak. Abo gi Alat Aho im dam ahu ahebu laba modi vizi teudi modesdam Aha Nutabe Neàna vàmtea am bak.

14Uho a git ozodamule. “Alam Aha Nutabe Neàna labe Aho iba modi vizi teudi meedaha di lam akati ulohona vizi meedaha vaba? Akati gi ahala vizi modidàla?” Laham bak lam a labi git vi ozodamule. Eho gi neham bak ozome uba labi gagoho bak. Im dam so nim gi na vàmtea modesuhu vabak. Abo na meiti na meiti ahebu im so niba modealadume uloholehe bak. Ame bak lam gi neham bak. Alam Aha Nutabe Neàna labe iba ahala modi vizi teudi modidaha bak lamti im so niba modealadume na zi dua bak lamti ulohote. Lahana dam totbaho vedi nehi ozoda. “Alam Aha Nutabe Neàna labe akati bisi eba feà bak modi vizehe vaba? Akati da lada lamota modi vizehela? Làhà em ba Kristusam dam meida modem vabak,” lahame ozohoda lam git ozoho. A labi ozodamule.

15Eho gi ame bak laba vi ozome im dam so modealahana zi niba vàlu uba vouhodalo modem im nidi nim uho mahate ozodale. Im dam naba nibe ahali nehameam, “Em ame da so nim modealaha di lam em anekehàlehe vaba? Akati gi naba na feàna modem biem datelehela? Làhà em ba da so niba modealahana labe meida modem vabak. Em gi na mei,” lahame labi gagomeam làhà uho ozom, ame naba lam ba ame da so laba modealaha vaba? Vabà! Labiham biem bak. “Am feà kaio,” lahadamnàme geàmu ame da so laba modesuhu bak.

16Labi uho ozom, im dam dogoi labe ahali nehameam, “Em ame da so nim modealaha di lam em fakolehe vaba? Akati gi dogoi na feàna modem biem datelehela? Làhà em ba da so niba modealahana lam meida modem vabak. Em gi na mei,” lahame labi gagomeam làhà uho ozom, ame dogoi lam ba ame da so laba modealaha vaba? Vabà! Labiham biem bak. “Am feà kaio,” lahadamnàme geàmu ame da so laba modesuhu bak. Ba modesuhu vaba vabalem vabak.

17Neham labe labihaha bak. Im dam so nim gi fakobu faita modesumeam làhà ba im meit gagomda aim vabak. Labi laha im so nim gi dogoibu faita modesumeam làhà im ba na ahana ba naum biem bak. Im dam so niba modealahana meida vekemeam làhà im ba na keàtedi meedam biem bak. Ame bak lam gi neham bak. Iho Kristus bake tu vuzehi vahi meedam dam nibe ibi meida laba neha, “Da lada lam feidam neàte,” lahame ba ame da laba labi gagu utasi voom vabiem bak. Im gi dam debu vàmtea modem labe im gi ahebu vahi, “Ame bak meedase,” lahame vabademsu meedam damat modem bak.

18Ame bak lam vabiem vabak lam gi Alat Ahamo ozobohudi ahit im so nim modehe di labe Aba Aho ozoho baket na zi keobe nim abo fakoti omtoti dogoiti labihasu ahebu modealadume ot odosiaha bak.

19Uho ozom, im dam so niba modealahana zi lam meida utasi fa ahamo bu faita modesumeam làhà im ba soaleo? Vabà! Ba soalem vabak.

20Labiham vabiem bak. Im so vàmtea nim gi na keobe zi modealaha bak. Ame bak lam fa neham bakti ulohote. Alam Aha Nutabe Neàna labe Aho iba ahala modi vizi teudi modidamnàme im gi ahebu vabademsu meedam bak.

21Labihàmu dam zoho labe Alam Aha Nutabe Neàna labe iba im feàna modi vizi teudi meedam dam labe vedi nehi it daetbada. “Im abo im feàna meedam dam im am tame,” lahame labi daetbadam dam labe ba dam totbaho laba neha, “Um gi im feà vabna meedam dam um gi feidam neàte,” lahame ba labi gagom vabak. Ame bak lam gi neham bakti ulohote. Im dam fako labe ba ahali fa anekehà laba ba nehame gagom vabak. “Om nasi feidate. Ihimo mode tame,” lahame ba labi gagom vabak. Labi laha im dam ohu labe ba ahali naba zoho laba ba nehame gagom vabak. “Om nasi feidate. Ihimo mode tame,” lahame ba labi gagom vabak.

22Fa gi neham bak. “Im dam so niba modealahana lam meida nim bisi feà kaio. Beeda am bak. Fa feidam neàte,” lahame labi ozohoda lam modi fa tombali abo ibi iho modi vekeheda modi fa vi ozome voom biemna am bak.

23Labi laha iho nehi ozo, “Im dam so niba modealahana lam ohuta nim bisi feà kaio,” lahamda lam iho vedi neha, “Damat fà aame deelese,” lahame ahit na feàna demsoti ulohona lam visoi dusu damti lahiti ab aadamam bak. Labi laha im dam so niba modealahana lam totbaho nim damat aameam im lademda lam iho ahit na baana visoi it vastedam bak.

24Labi im dam so niba modealahana lam im ladem vabna totbaho nim gi damat aam neàna im ba ozom vaba gi labihasu ozahit geàmodam bak. Lahana Alat im so modehe di labe iho damat ozo, “Na bisi feà vabna ziat moz,” lahame feàtàmna lam Alat ahit, “Damat fà aame vou baedase,” lahame ahit modi fa feànali zisiddaha bak.

25Alat gi neham bak ozome labihadaha bak. Im dam so niba modealahana zi lam ahebu fa vahi vabademsu na modem di ot taui ot tauidam bak laba vi ozome labihaha bak. Fa ahala utasi modesum bak Alat mali gi bakamta modealaha bak. Ame bak lam gi neham bak. Ibi iho vahi Kristus bake tu vuzehi meedamda meida laba iho neha, “Om feà kaio. Om feidam neàte. Ihimo mode tame,” lahame labi gagu utasi voom bak labna zohàme Alat ahit mali im dam modi fa vahi vabademsu ot taui ot tauidam bake Alat ahit im dam debu vàmteadehe bak.

26Neham bak vi ozomale. Im dam so niba modealahana keobe zi nim meida kikezi geàdameam làhà im so niba modealahana totbaho ahebu vi tau kikehena ozomomna meedam bak. Laham vabameam im dam so niba modealahana keobe zi nim meida damat aame nehame gagomeam, “Abo na neàna modesuhe?” lahame labi vou baedameam làhà so niba modealahana zi nibe ame na laba vi tau deelem bak. Ame bak lam gi neham bak. Iho vahi Kristus bake tu vuzehi meedam dam meidavat geàdameam làhà im dam totbaho ahebu tau àvodi ahu faidi ame da laba iademe vabiedam bak. Laham vabameam im meidavat meit git modem vaba abo iademe meedume damat am ee vousameam làhà iho ibi meida ee vousahemu, “Feàte,” lahame vi tau deeli vou baedam bak.

27Eho etei lab vameadaha bak lam gi im dam so niba na keobe zi modealaha bak laba gi vàlu uba vameadaha bak. Alat ahit im dam so niba na keobena zi modealaha bak lam fa vazisi im sobulehe bak lamti ulohona modi im Kristus bake tu vuzehi meedam dam zi nim modi fa Yesus Kristusam dam debu vàmadehe bak.

28Iho Kristus bake tu vuzehi vahi meedam dam debu gi vàmadehenàme Alat ozahit iho vahi ototo tauidam bak laba vi ozome iba nehame ahala modi vizi teudi modidam bak. Aho amu nasi im dam zoho laba modi fa Kristusat Aho gagu olu Am im vameadume esmozi laiam damali meedam bak ame. Labi im dam zoho laha neo modi fa Alat aha Abadat vameadaha im aime fa dam bake ahate vameaidam damali meedam bak ame. Labi im dam zoho laha neo modi fa Am im ve fa dam bake vahokedam guru damali meedam bak ame. Labi im dam zoho laha neo modi fa damat amu aaha vabna meedume damat aame àvodem im feàna meedam damali meedam bak ame. Labi im dam zoho laha neo modi fa mei gailedaha dam zi laba ulasi fa neàdedam damali meedam bak ame. Labi im dam zoho laha neo modi fa mei na modem biem bake vi tau meedam damali meedam bak ame. Labi im dam zoho laha neo modi fa iho Kristus bake tu vuzehi vahi meedam dam totbaho vuusu im faheme modidam damali meedam bak ame. Labi im dam zoho laha neo modi fa dae im naedamat it aim biemna vameadam damali meedam bak ame. Gi labihadaha bak.

29Eho etei lab vou vameadaha bak lam um ozom vaba? Alat iba modi vizi teudedaha di lam im ulohona modi vizi teudi meedam vab damat modem bak. Aho gi ahala modi vizi teudi modidam bak. Aho iba dam ahebu modi vizi teudi im ahebu fa Kristusat Aho gagu olu Am im vameadume esmozi laiam damali meedam vab taia? Labi laha Aho iba dam ahebu modi vizi teudi im ahebu fa Alat aha Abadat vameadaha im aime fa dam bake ahate vameaidam damali meedaha vab taia? Labi laha Aho iba dam ahebu modi vizi teudi im ahebu fa am im ve fa dam bake vahokedam guru damali meedam vab taia? Labi laha Aho iba dam ahebu modi vizi teudi im ahebu fa damat amu aaha vabna meedume damat aame àvodem im feàna meedam damali meedam vab taia?

30Labi laha Aho iba dam ahebu modi vizi teudi im ahebu fa mei gailedaha dam zi laba fa ulasi fa neàdedam damali meedaha vab taia? Labi laha Aho iba dam ahebu modi vizi teudi im ahebu fa dae im naedamat it aim biemna vameadam damali meedam vab taia? Labi laha Aho iba dam ahebu modi vizedume teudi im ahebu fa dam totbaho im naedamat it aim biem dae lam vi aime ozobohudi fa dam bake iademe vameadam damali meedam vab taia? Lahana Alat gi iba ahala modi vizi teudi modidam bak.

31Labihàmu eho nehi ozo. Uho Ala bake tom gagodam di lam uho neha, “Eba nehi modi vizi teudele. Eba nehi modi vizi teudele,” labihasu modelo àhàki Ala bake tom gagodam di lam gi im bisi feàna, “Oba modi vizi teudese,” lahamda lamota Ala bake tom gagodale. Alat iba modi vizi teudi ame im lam meedam di bisi neà bak lam eho etei uba ab vameadalo modem am bak.



 <<  1 Korintus 12 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel Single Panel