1Labi Yesusat ame im lada lam vahokedume neàdi Aho Fihasi Ala Bake Vou Baedam Num Vàmteabu labe am ad oli aam bak tomba abo damat Ala bake lodamna vahedamnabu modesuhu bak laba netàdi nusu aidam di labe gut aaha dam na duada labe doi ibida Ala bake lolo modem doi vou li duadam bak laba vi aasda.
2Labi neo gut aaha na vab maboe labe neo li aba aho Ala bake lolo modemna abo doi oona koena behàsu tembagat modehena ab vou li tau dusuham. Ame doi lam ozom di na vam biemna ozomomnat modem bak.
3Yesusat ame bak lam aahemu Aba vi tau meedam dam laba ab vameadamam. “Eho etei uba gagolo modem im imboda nidi nim nasi aima. Na vab maboe labe aba aho etei Ala bake loho doi lamti dam duada labe ibi iho Ala bake lodaha doi lamti labihasu ozom di bisi na duana Ala bake lohona ozomomda gi maboe abada am bak. Neham bak.
4Ame nazoh dua dam labe vedi doi dua totbaho iho naedamat vada. Labi gi totbaho Ala bake loda. Lahadam bak. Lahana nam maboena lam labiham kai. Ame maboe lam am na vab nam modemnàme abada gi ahebu loho bak. Aba aho modi ahedelo modem bak gi ab lu seteham bak,” lahame Yesusat ab vameadaham.
5Labi ame di labe Yesus bake vi tau meedam dam labe ame Fihasi Ala Bake Vou Baedam Num Vàmteabu laba tom nabidume Yesus bake ab gagoham. “Guru oa, ame Num Vàmteabu nim Om aadào? Abo ke neànat modehe numat moz. Ame Num Vàmteabu niba damat Ala bake vahedaha nazoh nim abo na neàna taumahe làbohonat moz. Abo neàte,” lahame labi vou baedume modeha Yesusat fa ab vi gagoham.
6“Uho etei lab aadamna lam bisi labaha bohu modesdam vabak. Ame ke mei ahoba vou vahe zihina zi lam ba fa faamome gi alimdi seddam bak,” lahame ab gagoham.
7Lahame labi gagoha ame dam labe Yesus bake neo vi gago, “Guru oa, Oho etei lab vi ozome gagoho im lam adi diat modemna gagohela? Labi ame bak lam modelo modem diat amu ana nasi iba fet vouhoho bak iho aame ozo, ‘Ame bak lam ab modelo modem ame?’ lahame iho ana aame ozobohudela?”
8Lahame labi gagoha Yesusat fa ab gagoham. “Iho bak niba esu meedam im zi ahebu ba novai vaitolo modem digat fuseo modem di lam amu im nehamda nasi meeda tame. Amu dam duada totbaho labe uba nasi li neha, ‘Em abo Alat Gagu Fihasi Vimteme Oluhu Dat Boehàda am tame.’ Labi, ‘Etei di nim Alat abo Boehàdateboli Aho dam bake deeli vame vuusu im vahokedalo modem di ab vou fuham tame,’ lahame uba li ahit vageme keobaedam bak ehete. Lahana ame dam labe uba li keobaedam im lam a aime tu vuzehemule.
9Labi laha ame ba novai vaitolo modem digat fuseo modem di lam damat uba nasi li neha, ‘Dam bak kia bak ium ot fakiame ot belui ot beluidalo.’ Labi, ‘Dam bak ium dae gai feà zidam labe nohisi mei nazoh beluidalo.’ Labihasu meit uba nasi li vameadam bak ehete. Lahana uho im labihasuhuna aim di um ahu a bisi iedi vi ozodamule. Ame ba novai vaitom digat lam di labe taho fum vabak.”
10Lahame labi vameadume afoezobe Yesusat neo vi susume vameada. “Ame ba novai vaitolo modem digat fuseo modem di labe im nehasu laha meeda tame. Dam debu fa vàmadiaha bak lamti dam debu fa vàmadiaha bak lamti ot fakiame ot belui ot beluidam bak ame. Labi bak amomoi vuusdam boehàda am damti bak amomoi vuusdam boehàda am damti labihasu ot fakiame ot belui ot beluidam bak ame.
11Labi bak iuba modeo, bak iuba modeo, balim feàna nigome dam beodume foedam bak ame. Labi bak iuba modeo, bak iuba modeo, di neà faasi bak aotbali na debe soali àm vabili idoali ibzidume dam elodam bak ame. Labi bak iuba modeo, bak iuba modeo, gailem bak vou vizealamna modi ket vua dou fi hiludam bakti ulohona vou vizialadam bak ame. Labi laha asum laba damat fet aame iedemna im amu aam vabna feà damat aadam bak ame. Labihasu ahamte faasi meedam im zi am bak.
12Ame im zi lam ahebu meedalo modem di labe uho Eba tu vuzehi vi tau meedam damat modemu uba nehada tame. Yahudi dam labe ibi iho tu vuzehi meedam bak gagu faheme modiam dam labe fa uba faki vabidume fai baket meedam bak ame. Labi laha uba fakemoholehe dam labe um siàdume fa uhumo fi hasi bakamta vahi Alat vameadaha im ahamda dogoit aidam bakti im meiti meedam num laba vou le ame num vuusdam dam labe uba uloodume ame im aihizobe dam amomoi gagu um si mei ousu teudem num laba um oumahedam bak ame. Labi laha uho Eba tu vuzehi vi tau meedam damat modemu uba fakemoholehe dam labe ozo, ‘Im boehàda zi labe laha dam nim uloodume vi aime beodase,’ laham bak laba ozome um siàdume bak ahaladiame vuusuidam boehàdatebo zi lamti dam eeda zi lamti laham dam laba vou le duzu uba uloodume aidam bak ame.
13Lahana ame bak lam meedam di a iedemule. Neham bak. Damat uba lab meedam bak labet modi Ebe Eho meedam im lam uho fi desi tombalem di am bak. Uho modi tombalehe labe fa ame Roma boehàda zi lamti Yahudi damat modem vab dam totbaho lamti iho fa aime ozobohudem bak am bak.
14Ame dam labe uba tet uloodalo modem di labe uho dam laba fa veibadam bak lam, ‘Iho im akatihasu fa vi gagoela?’ laham bak a bisi àvodi vi ozodamule. Gi ahu keahumtedesu vou faodale.
15Damat uba uloodam di labe uho fa gagom dae lam Ehemo uba modi ozobohudi fi gatehe labe uho ame bak lam gagodam bak. Uho lab gagodam dae lam uba fakemoholehe dam labe ba uba ot vai dae meoli vi daetesu gagom vabak.
16Labi laha ame di labe uho Eba tu vuzehi vi tau meedam damat modemu dam duadat uba faki im nehasu meeda tame. Um aiti oiti modeo, ubu meidam modeo, um ame dam modeo, um ot vou aliam dam modeo, laham dam Eba tu vuzehi meedaha vab dam labe laha um fa vou fohome meia gagu si ame eeda zi laba vou ladume ub loda tame. Labi um dam totbaho lam ame eeda zi labe im meo dam laba gagu um odda tame.
17(21:16)
18Lahana um eloi it oazehena lam ba Alati vaitesum vaba gi Amti vahi ahe neàna bohu vuusdam bak.
19Ame na uba lab vabidamna zi lam uba modi bedi Eba tu vuzehem bak voomna zohàme abo mahate keàtedi Eba tu vuzehi meedale. Uho labi meedameam làhà um abo gi Alati vahi ahe neàna bohu vuusda tame,” lahame Yesusat ab vameadaham.
20Lahame labi vameadume neàdi Yesusat neo vi susume vameada. “Um nasi aimale. Dam ahamda Alat vameadaha im aime fa dam bake ahate vameaidaha dam labe aham di iube neha, ‘Kota Yerusalem laba vahi azim dam labe iho faina meedàmu Alat faki ame dam lam beoda tame,’ lahame amu nasi fet toeme esuhu bak lam abo modi imbodem di fuhuzobe abo neham bak. Yahudi dam bake fakem dam labe im meo damat kota Yerusalem dam labe im numti ahiledou vabousuhu bak lam uho aa tame. Uho aameam làhà nehame vi ozoda tame. ‘Kota Yerusalem dam lam im num lamti ahebu beodume foli seddam bak ab fuhame?’ laham bak um ab ozobohudemam bak. Labiham bake um Yudea bak laba azim dam labe uho laba a esdamule. Um foli seddam bak labna zohàme ahedem bak laba ozome gi taho sibu bak laba iitaole. Labi ame Yudea bak labe aba zoho kota Yerusalem laba vahi azim dam labe laha num debu ibida vou esmozi iitaole. Labi laha kota Yerusalem bàhàgo bak laba na meedam dam labe a, ‘Imo fa li ahedese,’ laham bak lam a ozome fa lemule. Gi bak iuba iitaole.
21(21:20)
22(21:20)
23Ame di labe Yahudi dam labe iho faina meedàmu Alat faki ame Yahudi damat azihi bak lam ahebu gi fai bak tadehemu beodam bak lam akati modelo. Aiee! Lahana lahi zubuleheda zi lamti data tatvamda do àm lahasuhuda eheda zi lamti iitaom vanamam bak akati modelo. Làhà gi emoem vabilemnàme taho ozahit betea iitaole.
24Ame Yahudi dam bake fakemoholehe dam labe lab meedam di labe Yahudi dam totbaho gi ae tot mo tot mo lahamna labe oddume voeda. Labi dam totbaho gi tet siàdume fa bak mei bake vou ladume sedda. Labihada tame. Labi ame lab meedam di labe dam debu mei vàmadi vàmadiaha bak abo Ala biem dam labe iho Yahudi dam labe ibi iho azihi kota Yerusalem laba veimai naedamali fa Yahudi dam laba vou vabeotedamehamdi fai baket vou meedume Alat amu neha, ‘Vaitom di am tame,’ lahame fet gagu esuhu bak fum di labe ab vaitomam tame,” lahame Yesusat fet ab vameadume esuham.
25Labi Yesusat neo susume vi vameada. “Labihadam di labe neo nehadam bak aada tame. Asum ahoba iuba tom aam di ala digaddati ala usehedati falo ziti asum bak ium ahebu damat amu fet aame ozobohudemna ba modesu tame. Labi laha nehada tame. Damat bak iuba aimeam itea feàna labe am dae feàna muudam bak aida. Labi laha ame itea labe vao bahot fi tauledam labe foadam bak laha aida. Labihada. Labihadam labe dam bake azim dam ahebu ahu gukedume faa dododume, ‘Im akati modela?’ lahame vabi vi ozoda tame.
26Ala digaddati ala usehedati falo ziti asum bak ium ahebu ibi amu neàt modesuhu bak lam fa vei seti ihevoulai ihevoulaidam bak lam damat fet aadume vi ozo, ‘Im bak niba baka ana im modelo labihahela?’ lahame ahu faidi feà bak fuhu labe im ozom bakti bili ahu faidi setehe labe ahu nasi fet boloda tame.
27Labi ame di labe damat tom aam di Em Abo Asum Ahoba Iubet Bak Niba Li Dateleheda Em Aiat Am na fauha meona fako iedemna ogatei modealaha bak lam fa Eba modi vizi feà Dateli uloti nom vousdam bak lam damat aada tame.
28Eho etei lab vameadaha im zi lam faasi modelo meedam di lam dam bake esuhu dam nibe bisi fai bak tadi vabidam bak lam Alat ab vausdalo modemam tame. Labiham bake um a bisi ladi ohu nom bohusdamule. Um fa ohu vousai ahulat deeli vou faodale,” lahame Yesusat fet ab vameadaham.
29Labi Yesusat neo susume nehame vi fi koada. “Uho ut araso lamti ut oo valemda so amomoi lamti ut labe modem bak laba vi ozodale.
30Ame ut labe bak ibi bak niba et nakbedem bak damat aadam di nehi ozom bak. ‘Ab di neà faalo modem ame?’ laham bak iho aame ozobohudem bak am.
31Labi laha Eho etei lab fet vameadaha im zi lam modesum bak uho aameam làhà uho nehi ozom bak am bak. ‘Alat Eba modi Boehàdateboli Eho fa li Am damalehe dam zi lam vazisi vuusu im vahokedam bak lam ab fuseo vabalehame?’ laham bak uho vi ozobohudem bak am bak.
32Nasi aima. Eho etei uba gagolo modem im imboda nidi nim mahate tu vi ozodam bohu meedale. Eho etei lab vameadaha im zi lam ahebu meedume neàdehe vabna um eteida nim ahe lahasuhuna ame im zi lam imbodehe bak aadume neàdi ba eloda tame.
33Asumti asum ahoba iuba modealahana zi lamti labi bak nimti bak niba modealahana zi nimti labihasu ahebu ba beodume foedume sedda tame. Lahana Ebe Eho vameadam im zi lam ahebu ba setem vabak. Gi labaha bohu vuusdume imbodedam imot modem bak,” lahame Yesusat fet ab vameadaham.
34Lahame labi vahokedume neàdi Yesusat neo im meida vi vahokeda. “Eho ba fa lem diat gi neham bak. Damat felik vààsu dohot vabi duzu sim bakti ulohona modehe labe dam bakda ahebu gi vabiem di labe Em taho fa lem bak. Labiham bake um iademe it vou faovoi ozodale. A bisi dihasi vao meona uddume bak bi bobidam labe ostame la gagoi le gagoidume ahusobuli igeao. Labi dihasi neo ame baket neo vi meeda. Uho etei bak niba esdam di uba modi neàdemna, ‘Modem vabna ozomo?’ lahame a bisi dihasi vi ozo. Labi dihasi neo vi ozo. A bisi labihadamule. Uho labihasu ahu fi goaitoi meedam di labe Em ba taho lem bake uho vabilemna zohàme Eho uba neha, ‘Iademe mahate it vou faovoi ozodale,’ lahame gagodam bak.
35(21:34)
36Labi it vou faovoi ozodam labe mahate Ala bake tom gagodale. Neham bak. Ubu uho amu neà bak esdam bak lam fa veimdi vàhàdeme meedam di labe um ahu iedehe vaba gi ahe neàt lahasu vou meedume vaitom bake mahate tom gagodale. Labi laha Em Abo Asum Ahoba Iubet Bak Niba Li Dateleheda nim Em ba Boehàdateboli fa li dam vuusu im vahokedalo modem diat Eho uba gagu aidalo modem di labe uho gi ladem vaba teut Eba li duzum bake laha mahate tom gagodale,” lahame ab vahokedaham.
37Labi Yesusat kota Yerusalem laba le aidam di lam Am gi nehada. Amu digad di lam ame Fihasi Ala Bake Vou Baedam Num Vàmteabu labe am ad oli aam bak tomba laba le dam bake vahokeda. Labi disidam di labe fa Zaitun Dee Dozeadaha Bak Buzoho laba laisi izi fa lezida. Labihada.
38Labihadam di labe dam totbaho dua bak di fi zeadam diat Yesusat im vahokem bak vi ailo ame Num laba valada. Labi dihasi dihambe neo ame im lam vi ailo neo ame Num laba valada. Labihada.
Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel